CNF/A Cu Chin Miphun A Kan Huap Kho Tu Hriamtlai A si
========
Tutan ka tlangtar hi na caah dolh zong a har kho i a fawi zong naa fawih kho. A ruang cu tutan kan dothlennak ah suttung bang in a kan dirpiak ding ahcun Chin ram huap in anmah CNF/A lawng kan ngeih mi a si. Cucaah zeitindah CNF/A cu kan suttung bantuk in a si awk a si maw si lo timi cu nangmah tein hei tuak chun ve te ko tiah biacah kan duh hmasa hna.
Kei cu CNF/A hi ka dirpi peng ko lai nain an riantuan ning a dik ve lo ahcun ka phozar ve ko hna lai. Cucu keimah pom ning le ruah ning a si.MAH nih uknak a kan chuh hnu ah Chin mino tampi nih Cam Victoria panh in an kal cio hna. Nain CNF/A cu an sining nih a rak pek hna lo caah kan Chin mino tampi hna cu anmah le sining hoih cio in an kir ter hna i CDF cu dirh cio a si.
Cutik ah kan dothlennak kum 2 a hun tlin tik ah kan Mino tampi cu mah le hmunhma sining hoih cio in CDF cu an dirh cio tik ah nihin kan Chin ram ah hriamtlai 20 renglo kan um cang lai dah. Hriamtlai an tam ahcun ram a buai deuh ti a si.
Cucaah CNF/A a thawn a hau i CNF/A cu kan suttung or kan Chin hriamtlai pawl a kan funtom kho tu cu a mah lawng hi kan ineih mi a si i kan thawnter bak a hau tiah a lungfiang mi nih cun ruahcio a si. Cucaah CNF/A a thawn khawh nak hnga ding caah le kan Chin hriamtlai pawl a funtom khawh hna nak ding caah cun CNF/A nih tanhhlei ngei lo tein Federal phung ning tein rian a tuan cu a hau mi a si.
Chin hriamtlai vialte CNF/A tangah i fonh dih ding in kan au cuahmah lio ah CNF/A lei nih Senthang Peng chungah tanhhlei neih in rian an tuan timi kong anmah Senthang lei nih social media ah an hun phozar mi nai hrawng cu hun hmuh khawh a si. Cucaah kei zong hi kong ah hin ka hun itenh ta lengmang i ziah CNF/A cu kan suttung or Chin hriamtlai vialte a funton kho tu a si lo maw timi hi ka ruah than.
Nihin ni tiangah CNF/A nih pengkip CDF umnak hmun khuakip ah kal in khuabawi thimnak an tuah timi cu nan theih bal cio cang hnga dek maw? Kei CNF/A supporter pakhat dirhhmun in ka thei bal rih lo. Cucaah tutan Senthang peng lei nih an phozar mi CNF/A lei Salai Htet Ni te nih khuabawi an thim piak hna timi hi a dik i CNF/A cunglei hngalpi nak a si ko ahcun biahalnak a um?
Ziah Senthang peng khua kawngahcun CNF/A nihcun khuabawi cu an thim piak hna?
Pengdang ahtah khuabawi cu CNF/A nih a thimpiak kun hna lo. Pengdang ah a thimpiak ve tung hna lo a si ahcun Senthang pawl an buai awk a si. An mawh lo. An lungfim cu ta. An buailo lehlam ahcun an molh caah a si. Anmah peng chung lawng ah CNF/A nih khuabawi va thimpiak a dang ah va thim piak tung lo ahcun a dik lo cu ta.
Hakha CDF nih sawmnak in vakal riangmang i khuabawi an thimpiak hna ahcun a phung a si lo. A ruang cu CNF/A cu kan suttung bantuk Chin hriamtlai vialte a kan funtom kho tu tiah kan ruah mi hna an si caah tulio Senthang chung an buainak zong hin an hngalhpi hna awk a si i anmah tu nih remnak an serpiak hna awk a si. Kan theih hna bantuk in Senthang chungah Anmah Senthang CDF le Hakha-B2(Senthang) tiah phu hnih in an i thennak hmun a si ve.
Ka chim duh mi cu hi bantuk in ithencheunak hmun ah tanhhlei neih in riantuan si lo kaphnih kar ah suttung bak dir in remnak a ser piak tu CNF/A cu a si awk a si. Anmah Senthang lei nih tutan CNF/A lei in Salai Hte Ni le a phuaihvun pawl nih khuabawi thimnak an tuah tiah an tial mi kong a tangah Link in ka hun thlir chih te lai. CJDC member an si pek si lo pek ah MAH doh ding in a dirmi bu pakhat a si ahcun zwitindah Buttom Up ka tuah timi tu aa hmaithlak ding a si.
Tahchunnak ah nihin tiang kan theih ning ah Senthang CDF cu Mara MATC/MDF le ZRA bantuk in an si kan thei rih lo. An i dang ko tiah ka hmuh. ZRA hna cu Zoland kan dirh lai ti a si i MATC hna cu Maraland tattat tein dirh aa tim mi bu an si. Cucaah tutan CNF/A lei in Salai Htet Ni le a phuaihvun pawl thil tuah hi CNF/A cunglei theihpi nak taktak a si ahcun tulio ah kan i bochan hna i kan suttung or Funtomtu tiah kan ruah mi hna hi pakpalawng an si lai.
Salai Htet Ni nih le Solomon Thang Ding nih Senthang ram chungah a chim tiah an tial mi hna hi a dik ko ahcun MAH hlaing nih a kal pi mi assimilationist approach in kal pi bantuk kan lo sual lai tihi phan a um ngai. Assimilationist rumro in CNF/A nih hin a kalpi ah cun zeitindah hizat kan Chin ram hriamtlai pawl a fonh khawh hna lai. Nain CNF/A a thawn khawh nak dingah mipi kan i zuam lai i a palhnak zawn ah kan palh tiah hngal ve seh tihi mipi nih kan duh awk a si. Na dolh khawh lo ding a si ahcun Comment ah hung chuak ve te ko.