CNA Ralkap Kyaw Zan Le Tin Tin Hlaing Lawmhpi Cia Hna Usih.

“Kyaw Zan le Tin Tin Hlaing” Lawmhpinak Caah, Bawipa a țha tuk, Kum dongh lai te ah kan ralkap chung veve in “Lehthah Țhit-um Thlacamnak “ sunglawi taktak in kan tuah. Caan sunglawi a kan serpiaktu Pathian a min kan thangțhat!

Ralkap a țuan vevemi an i țhit-um hi a țha. zeica’h tiah Dothlennak rianțuan timi hi a fawimi a si lo caah a ingțuar bal cangmi lawng nih hmuhthiam theihthiamnak an i ngeikho deuh. An chungkhar fek sehlaw ram le miphun caah bochan awktlakmi siko hna seh.

Bawipa atha, nan dih lak tein kan lawmHpi hna i, Pathian tu nih lam hruai le kilveng zungzal ko hna seh! Bawipa nih chungkhar nuam ah ser hram ko hna seh, bochanmi nusaltha le pasaltha ah ser hram ko hna seh.

An pang par tamHmi hrimhrim kha ai dawh tuk ka uar tuk, hi pangpar hi Camp Victoria pawngkam a ummi ram pangpar an si ko, phaisa dih hau lo tein Pathian nih aa dawhtukmi pangpar a kan pek.

Mah Pathian bia in thazaang vun lak ve hmanh a tha kho tuk hringhran. Pathian Bia, I Samuel 30:6., “Cun David cu a lungre a thei ngaingai; zeitintiah mi vialte kha an fapa hna le an fanu hna kongah khan an ngaih a chia ngaingai caah mi nih khan amah kha lung i cheh awk an ceih lengmang. Sihmanhsehlaw David cu Bawipa a Pathian ahkhan aa hrim țhan.” And David was very troubled because the people talked about killing him with stones. For all the people were very angry in their sorrow for their sons and daughters. But David got his strength from the Lord his God. (NIV)

Tulio caan cu Covid 19 pulrai nih kan vawlei pi a den cuahmah lio, vawlei minung vialte nganfak in kan um lio a si. March thla zarh dongh in Union of Myanmar nawlngeitu nih mibu ton kham a si caah khrihfami hna nih Pathian thangțhat pumhnak kan ngeihmi poh kham le phih a si ve. Nihin incun thla 7 pinlei kan hung phan cang, ram dang le khuapi lei ahcun mah le khrihfabu cio in Online pumhnak le caanhmannak tuah a si, nain khuate lei ahcun Pastor le khrihfa upa pawl thlacamnak dah lo cu zeidangdang in caan hmankhawh a si lo. Covid 19 ruangah minung tampi nunnak a liam, mi tampi zawtnak ruangah thinlung rethei thaba in um cio a si, thaizing kongah lungre a thei cio hna, cu ticun kan nunnak ah țihphannak nganpi he caan kan hmang cio hna. Hi lio caan ah Divid nih a tonmi chungin 1Samuel 30:6 nak ah a țialmi “Bawipa Pathian ah thazaang thar la usihlaw, ihriim usihlaw kan tinhmi kawltung lei ah kal hna usih tiah” thazaang thar la ți dingin kan sawm hna.

David cu Israel siangpahrang caah prophet Samuel nih thiti a thuh i a thimmi a si ko nain, hmakhat te ah siangpahrang țhutdan ah țhut ding Pathian nih a sianh lo. Saul siangpahrang nih David nunnak lak dingah a kawl i a dawi lengmang, David cu siangpahrang ah thim a sile cangka in nunnak himnak ding caah tlik le lek in caan a hman a tam ko, khuamaw caan ah lungkua le horthuk hna ah aa thup, cu bantuk lio ah ti hal le rawlțam in a um caan zong a um rih. Bawipa mithim David nunnak ruah tik ah lungfian a har ngai ko. Kan i cherhchanmi 1 Samuel hi Filistin ram ah a zaam i aa dawr lio ah Daivid cung a lungmi lungretheihnak nganpi a si. Saul siangpahrang nih a dawi lengmang caah David nih .,”Hi tihin cun nikhatkhat ah Saul in ka nun a lak taktak te ko lai. Cu caah miphun dang ram a simi Filistin ah zaam ning law Saul nih ramdang ah a zaam cang timi thawng a theih tik ah a ka dawi ti lai lo i ka nun a him lai “ tiah khua a ruat. Cu bantuk cun ralkap 6000 le a nupile pahnih hna le a fale hna he Filistin ram Gath siangpahrang a simi Maok fapa Akhish sin ah a zaam i , Akhish zong nih a cohlan caah Ziklag khua a pek, Ziklag ah kum khat le thlali khua a sa. Nihin tiang zongah hi Ziklag khua cu Israel ram chungah telh a si lan.

Ziklag a um chungah ral a tu lengmang i an minung a thah dih tawn hna, an ngeihmi a lakmi chungin siangpahrang Akhish sin ah a put tawn. David nih ral a tuk tawnmi hna hi Geshur mi, Girzi mi, Amalek mi hna an si. Saingpahrang Akhish nih zei ral dah na tukmi an si tiah bia a hal tik ah David nih Judah ram Negeb le Ken mi hna Neged tiah a ti tawn tik ah siangpahrang Akhish nih a zumh chin lengmang. Nikhat cu Ashish le a ralkap pawl nih Israel pawl tuk dingah an i tim i David le a ralkap zong raltuknak i kal ve dingin an sawm hna. David zong nih nawl el lo tein kal ve dingah a ralkap pawl he an i tim. Ral ram an phanh tik ah Akhish ralkap bawi hotu hna nih David le ralkal pawl cu kan sin kal lo ding, zeitintiah “Israel nu pawl nih Saul nih a thongthong, David nih a sangsang a thah hna tiah hla an phuahmi pa kha a si lo maw. “ kan zum lo, kan sin ah kal hlah seh an ti. Siangpahrang Akhish nih a ralbawi pawl chimning bantuk in David cu an sin kal lo ding le zingka tein Ziklag lei ah tlun dingin a biakchawnh.

David le a ralkap pawl Ziklag lei ah an kir i, Ziklag an phak tik ah Amalek pawl nih Ziklag cu an rak hrawh i an duah dih, David nupi pahnih hnale a fale thok in minung vialte an kalpi dih hna … David le a ralkap pawl nih hi thil an ton tik ah an ngaih a chia ngaingai i fak pi’n an țap. David ralkap pawl nih David cu lung in cheh i thah dingin bia an i ceih a theih tik ah Davih cu a biakmi a Pathian sin in thazaang thar a la (or) aa hriim. Cu ticun aa hrimh hnu ah a tlangbawi angki i hruk in Pathian sin ah thla a cam i Amalek mi pawl ka do hna lai maw, teinak ka hmu lai maw tiin” Pathian a nawl. Pathian sin in biaphuan a theihmi cu,” Kal law do hna, na tei hna lai” ti a si. David le a ralkap pawl cu hriamnam an i serh i Amalek mi pawl doh ah an kal i Pathian nih teinak a pek hna. A dawt bikmi a nupi pahnih hnale a fale hna lengah hranchaw an lakmi dihlak a lak țhan dih hna.

Kan Bawipa Jesuh Khrih calvary vailam cung i a intuar lio i inkhawhnak le teinak tiang a phanh tertu cu Gethsemane dum ah a Pa sin in intuar khawhnak teinnak țhawnnak thazaang thar a laknak aa pumpeknak in aa thokmi a si. Nihin Covid 19 ruangah maw, a phunphun ruangah maw lungre a theimi vialte hna Jesuh nih “Re a theimi le thil a ritmi vialte hna ka sin ah ra tuah uh, dinhnaknak daihnak kan pek hna lai” tiah a kan ti. (Mtt. 11:28) Hawidawt na phorh a rit tuk maw, na lungre a thei tuk maw? David cu a zumhbikmi a ralkap hna sin in lung in cheh i thah ding an timh lio, a thil a rihtuk lio ah Bawipa Pathian sin in thazaang thar a la, aa hriim i a mission a pehzulh bantuk in kan nih zong kan biak Pathian sin in thazaang thar la hna usihlaw kan tinhmi lei ah kal hna usih. Bawipa Pathian nih thluachuahnak kan pekpiak ko seh! Credit: Pastor Tluang Hre