CNA nihhin “Mino tampi Refugees an sawk lai caah kan thazang a zawr, ader lai, Kanral kan tei sual lai lo” timi!

CNF/A I Refugees Policy Hi Wrong Theory Asi Sual Hnga Maw?
=========
Hlanchan Refugees kha atak asilo, adeu or a thlam ti khawh asi. Hrawkhrawlh in tuah le phuah cawp arak tam deuh ko, ti cu theihhngalh dih cio mi asi. Tutan lawng hi Refugees atak, adikmi, Kungcung hmin cu asi hnga (Refugees lam hna va um khawh sehlaw)? Depde, Lih, Hrawkhrawl le tawmchawm herh bak lomi asi. Vawleipi nih an theih dih fawn. UN Meeting ah an ceihphai hi a tlawm ve ti lo. Thantlang konglam hna hi cu Tuksapur derhhmun asi. Vawleipi nih tuarpi cio mi Thantlang hrawkralnak le Tionak bak asiko. The Great Exodus Of Thantlang People asi.

Bible he tahchun ahcun Hlanchan Refugees cu Old Testament (Biakamhlun), Tutan Refugees hi cu New testament (Biakamthar) kan hei ti hnga? Old Testament cu New testament i a thlam asi bantukin Hlan Refugees cu Tutan Refugees I a thlam asi ve. Adik mi Refugees cu Tutan hi asi. Tlawlh sual ahcun, hi hnu aum than khawh tilo ding mi Lamthluan asi. “Opportunity doesn’t have 2nd coming” “Cantha hi voi hnih ara nawlh lo” timi Mirang phungthluk a hlawhtlin sual hnga maw?

CNA nihhin “Mino tampi Refugees an sawk lai caah kan thazang a zawr, ader lai, Kanral kan tei sual lai lo” timi Formula hngatchan in Refugees tuah bak lo ding timi Theory le Philosophy hi an chuahpi ti khawh asi. Sikunkaw, Refugees phih ah tah kanral hi kan tei tak tak lai maw? Chin Mino kip nih CNA, CDF ah kan lut dih khawh maw? Chin Mino vialte CNA, CDF si dih awk ah planning aum maw? Ngeihchia thazang nih a phah zawh maw? Tihi tuaklo awk a tha lo.

Chin mino hi ting 1 um hna sehlaw, hnarcheu 50000 tal nih CNA- CDF tuan awk, si awk asi hnga. Cazin zoh awk a um lo caah 10% asimi 10000 kan tling hi zumh a har ngai ngai. Aumcia hmanh hriam le kuanzen kan rinh khawh hna lo. Kan hriam ngeih mi zong Chanthar le IT Weapon ansi hna lo. MAH le Ralhrang Kawl Ralkap cu um rih seh, Thantlang Batallion um 200 hmanh kan namh khawh rih hna lo. Aruang tampi a um ko lai nain Ral teinak caah a herh bak mi hriam le thilri kan I ngeih khawh rih lomi hi a poicem mi asi.

Rev. Dr. Vamramuk nih cun WIN – WIN Theory tiah an kan cawnpiak. Kap hnih caah Teinak le thatnak asi ve ve mi tinak asi. Kanral zong TEI bak i Refugees zong tuah ve, Kal ve timi Theory hi a lam aum ko, tihi asi. Two ways process kan ti lai.

Tehte: Hlan Refugees kha um hlah sehlaw CNF zong nan si-an-ep lailo i CDF zong nan si-di-ep lailo. Zeitintiah CNA, CDF nih kan herhbik cu Phaisa kha asiko. Cunihcun kan herh mi vialte a zalh dih khawh. Cu ngunsawm aratnak tihnah le Tiva cu Refugees in asi.

Cucaah Refugees kanphih ti siloin a kal dan le a tauhto ning mumal tu thlen deuh awk asi. Innchung khar ah Mino raltuk khawh mi cu Refugees loin, adang tu kha refugees ter ah zeidah a lawh hnga? Dam lomi, upa cang mi, kal aduh lomi (Keimah btk) cu Refugees a herh ve lo. Mipi cozah chan ah Refugees a herhlo tiah Joseph Kung Za Hmung le Isacc Khen nih an rak ti i thah nan duh hna kha nan philh cang maw? Isacc Khen zong CNF minung in Kawl minung ah aa chuah siam diam.

Refugees lawng kha ruah ahcun CNA nih a phih mi hi adik ti awkin aum. Hmailei Lairam thanchonak le sersiamnak caah aherh bik mi fimthiam nak kong tuak chih ahcun Tutan Refugees lailo cu a pam hmai tuk. Zanram a um tuk hrinhran. Kawlram ah Covid19 le Junta Crisis ruangah kan fale caa an cawn khawh lo hi kum (3) a tling cang lai. Tutan Refugees khawh ahcun Dotla mi, Ram thanchonak, ram rumnak asi hnga mi cawnnak cu Kawlram miphun dang hna nakin kan i ngeih ve hnga. Cozah riantuan tampi (15000 leng) zong rian tha an va tuan ve hnga i CNA, CDF bawmhtu asi than lehlam hnga, can rau lo te ah.

Kanralpa kan tei hnu ah ram sersiamnak le Miphun thanchonak caah a herhbikmi cu fimnak le mifimthiam hna an si te lai. Cu fimnak cu Kawlram ah aum lo i a minung zong kawlram cacawn bu incun hmuh khawh a har ngai ngai. Tuluk, Japan, Korea, Indonesia, Thailand, Vietnam hna an ram a thancho i an rum, an fim an thiamnak cu USA le Zurup ah caa an cawn caah asi. Annih cu phaisa tampi pekin, cozah nih phaisa relcawklo riakcaw an ronh hna.

Kannih cu Refugees in Kan chungkhar tirawl in caa an cawn lai. Ral kan tei in ram sersiam tikah tutan ngakchia tete hna hi kan hman than te hna lai. MAH le Ralhrang Kawl Ralkap kan tei in Kan mah tein kan ram kan derh ve te tikah, a tu lio a ummi hruaitu hna lawng in cun ram dotla ah kan sersiam khawh lailo. NLD chan Upa Luban nakin level pelte lawng a kai deuh lai. Amay Suh nih duhning in ram a hruai khawh lomi cu a minung an chan bau tuk caah asiko.

Phaisa atam fawn i ram sersiamnak caah a puitling mi le dotla mi fimthiamnak kan i ngeih lo caah, a tuah awk an theih ti lo i, tawnta firhin an fir law law nak cu asi. Corruption ka cehceh an sinak cu asi. Mi firkhut ah aa chuah mi an tampi. Mino hna nih thisen le nunnak pekin, raldoh lio ah, hnangam lungdeih tein (Nifatin Xmas hmang in) Hakha le an khua cio ah a um salam mi, Chin Uktu Luban cheuhkhat hna khi (Hlutdaw Speaker, Minister of Municipal, Minister of Construction, Upadi Chuk)! Inntha tha Lo tha tha an sak rih!

Dr. Lian Hmung Sakhong le Dr. Sa Sa nih kanral kan tei dengmang cang an timi hi nang le kei nithla le kum rel ning he aa khatlo ti hi theih a herh. Pu Thla Hei Chimh nak ahcun hi hnu kum (2) ah aran bik Kanral kan tei lai. NUG ral teinak nithla cu hi hnu kum (5) or Kum (7) ah asi. Thaizing anti duh nak hi; kum 2 hnu tinak asi. Kiptuh an ti ahcun kum (5) hnu tinak asi. Thawhtan an ti ahcun kum(7) hnu ah tinak asi.

Hi hnu thla (6) or Kum khat Refugees khawh ahcun CNA, CDF caah sponsor ansi than colh lai. Rallokap nih Raltuknak Tactic a thlen caah AK 47 le M16 in kahci an si tilo. RPG, 60 MM, Drone le Jet fighter in tukdoh ding tu asi. Hi vialte cawknak caah phaisa tampi kawl a herh. Miram le NUG cu voi (1, 2) hlei in cun an kan bawmh khawh ti lailo. Laimi tampi ramtha nak ah kan um ahcun kan herh mi hriamnam le thilri kan cawk khawh zungzal lai.

Ral kan tei hnu ah Kanram le miphun sersiamnak caah an rumnak kan hmang than hna lai. Cuccah raltuk lio mi, raltuk ding mi cu tang ko hna sehlaw, atangmi cu Refugee’s ko hna usihlaw, Kan miphun le Kanram caah aa hlawk deuh, a tha deuh, miaknak asi ko. Sunghnak pelte hmanh aumlo timi Theory le Philosophy thar ka hung chuahpi.

CNA, CDF dohdalh le soisel in an chimhmi ngaih lo asi hrim lo. Na rel duh lo ahcun lanhtak ko. Dr. Van Tum le Salai. Lung Thli Tum chimh mi i rinh ti tikah, Suingun Lungvar khur btk asimi ram thum nak, rum ve hna seh, fim ve hna seh ti nan duh lo bia, hnahchuah bia asi, Ram kip nih an cohlan lo, Nupin(2) ngei, etc in ngakchia le zurit bia a lawh caah, Upa Lungfim le Tarbia in ka hung langhternak asi. Caa asaunak aruang zong asi fawn.

CNA, CDF dohdalh le an chimhmi ngaihlo asi bak loh. Asi hrim hrim ko tinak asilo. Lam a um ve ve ko tinak asi. IT chan ah lambi te pakhat lawng ah khuasa ding asilo. Lam tampi a um, lam kaupi aum ko. Pathian tinhmi zong asi khawh ko tinak tu asi deuh. Credit: Joseph R. Thang