SAC Ralhrang Nih Hmunhma Nan Theih Lonak Ah Ra In Nan Thih Lengmang Nak Cha Cun Mipi Sinah Rak I Fonh Uh; Salai Htet Ni
===================
Chin ramkulh chung kahdohnak ah SAC ralhrang lei a thi mi an tam, kan lung cu a tha ve lo nain uknak tha lo cu pehzulh in kan doh peng ko lai tiah CNA chimphuannak nawlngei tu Salai Htet Ni nih a chim.
2023 March le April thla chungah Kalay-Falam-Hakha lei in a ra mi SAC ralhrang he kahdohnak ah ralhrang lei a thi le hliamhma pu mi an tam. Mah pin ah Gangaw-Hakha kar kahdohnak zong ah ralhrang lei a thi mi le hliamtuar an tam fawn. “SAC ralhrang hna nih mah hmun le hma a si lo nak ram ah nawlpek nak in kahdohnak nan rak tuah i nan thih lengmang nak cha cun, a caan um lio ah mipi sin ah rak i fonh dih uh” tiah Salai Htet Ni nih a chim.
Hi kahdohnak ah SAC ralhrang chung in kut le ke kiat mi, mit a rawk mi tampi Hakha siizung ah thlop an si nak kong, cu hliamhma tuar mi ralhrang hna nih an pu Min Aung Hlaing an volhpamhnak kong, cung lei an pu le miakmai nak caah nawlpek nak poah tuah lo ding le mipi sin ah tha tein i fonh a bia pit deuhnak kong a cung lei upa nih a chim. Atu lio hmunkip kahdohnak ah SAC ralhrang pawl a thi mi le hliamtuar an tam tuk caah raltuknak vanlawng tamdeuh in hmanh le mipi deuh i sel in kahdohnak a tuah chin khawh caah a hlankan in ralrin a herh nak kong zong a chimchih.
Mingin Peng Ah A Ruang Umlo In SAC Ralhrang Nih Bomb A Thlak Caah Ngakchia Pakhat Telh In Minung 4 An Nunnak Liam; Sagaing ramṭhen, Min-gin peng, Pate-hka-yar (ပိတ်ခယား) khua cu SAC ralhrang nih a ruang umlo in bomb a thlak caah kum 4 ngakchia pakhat relh in minung 4 an nunnak a liam pin ah 5 nih hliamhma faak ngai an tuar, tiah tualchung mipi nih Khit Thit ah an chim. May 4, chun suimilam 1:00 tluk ah Pate-hka-yar khua cu kahdohnak umlo nain SAC ralhrang nih jet vanlawng in bomb a thlak caah kum 4 ngakchia pa Thet Nine Lin le Daw Ohn Sein (Kum 50), Daw Mya Win le U Than Shwe hna an nunnak a liam, tiah kan theih.
“Kahdohnak zong a umlo, Pound 500 tluk a ritmi bomb 3 a rak thlak i, a thlaknak hmun zong an kaur dih, a thlaknak hmunhma hna cu sianginn he aa neihnak hmun le pumpululh chuihnak hmun pawng ah a rak thlak hna caah minung 4 an nunnak a liam pin ah 5 nih hliamhma faak ngai an tuar. Caw 5 zong an thi i, inn tamngai zong aa rawk, caw rawl chiahmi hna zong an kaang dih” tiah tualchungmi pakhat nih a chim. SAC ralhrang nih atu bantuk in bomb a thlak caah mipi hna cu khua chuahtak in kan zaam dih, a kirmi zong an um rih lo, tiah tualchung mipi nih an langhter.
Aunglan Khuapi In A Zaammi Rohingya 9 Hna Cu Yangon-Mandalay Lam Hlun Ah An Tlaih Ṭhan Hna; Magway ramṭhen, Aunglan peng, Kyaukkyar (ကျောက်ကြား) khua pawng ah a thithup in a ra mi Rohingya minung 13 hna cu motor cung ah SAC ralhrang nih an tlaih hna, tiah theih a si.
May 2, zan suimilam 10:00 tluk ah minung 13 an tlaih hna i, motor khaltu pa le minung 9 an zaam nain May ni 3 zing ah Yangon-Mandalay motor lam hlun ah an tlaih ṭhan hna, motor a khaltu pa cu a zaam kho ṭhan, tiah tualchungmi nih an chim.”Tlaihkhih a tongmi hna hi pa 10 le nu 3 (An zapi 13) an si, motor khaltu pa le Rohingya 9 an zaam nain 9 tu cu an tlaihkhawh ṭhan hna, motor a khaltu pa cu a zaam kho, mahka lam hi Rohingya a thlithup in an luhnak lampi a si caah an tlaihkhih lengmang hna nakzong a si” tiah tualchungmi pakhat nih a chim.
Aunglan peng ah tlaihkhih an si hnu in a zaammi Rohingya pa 7 le nu 2 hna cu May 3, zing suimilam 10:00 tluk ah Yangon-Mandalay motor lam ṭhing ah tlaihkhih ṭhan an si i, motor khaltu pa cu a luat rih. Tlaihkhih a tongmi Rohingya 13 hna cu Aunglan khuapi palik sakhan ah dantat an si cang, tiah ralhrang palik bawi pakhat nih a chim.