Chinlung Khuapi Ah A Voi (1) Nak Chin Ram Fimthiam Cawnnak Kongkau Ceihhmainak An Ngei. Chin ramkulh, Chinlung khuapi ah a voi (1) nak Chin ram fimthiam cawnnak kong he pehtlai in tonbiaruahnak le ceihhmai ṭinak an ngei kho, tiah Chinland Council, Ministery of Education nih March 27, ah cathanh an chuah.
Cathanh an chuah mi chung ah March 21 in 24 tiang, Chinlung khuapi ah Chinland Council, Ministery of Education hruainak in Chin ram fimthiam cawnnak kong he pehtlai in tonbiaruahnak le ceihhmai ṭinak kan ngei kho i pengtlang le khuakip in fimthiam cawnnak lei ṭuanvo ngeitu minung 30 leng an kai kho caah Chin ram chung fimthiam cawnnak 90% a haup khawh, tiah an thanh.
A tutan tonbiaruahnak ah Chin ram Education Policy Draft kan ser khawh i hmailei ṭuan chuah ding rian pawl zong mizapi lungtling tein kan suaisam khawh. Cucaah Chinland Council, Ministery of Education nih dothlennak chung ah fimthiam cawnnak kan sunghnak hnga lo le dothlennak a dih hnu tiang pehzulh khawh ding in kan si khawh chung kan i zuam lai, tiah an thanh.
Cun, Chin ram fimthiam cawnnak a tha a der nak hnga lo le Chin ram cu fimthiamnak in kan sersiam khawh nak ding caah ramchung ramleng mizapi nih mah le thil ti khawhnak cio in thazaang chuah cio ding in, an thanh. Lungmili Post