Chinland Defense Force (Kalay-Kabaw-Gangaw) Thawng Chin Seh!

Chinland Defense Force (Kalay-Kabaw-Gangaw) Thawng Chin Seh!
===============
October 1 tiang ah CDF (KKG) sin in CDM a tuah mi Ralhraang Council ralkap pathum an si cang tiah CDF -(Kalay-Kabaw-Gangaw) nih thawng an thanh. An pathum chung ah pakhat cu hriamnam zenthong tling he CDM a rak tuah mi a si ca ah laksawng tangka zong kan pek.

An pathum ning in a himnak hmun ah kan thlah cang hna tiah an langhter. Uknak chuttu Ralhraang Council a doh i rammi sin ah ttan a duh mi ralkap cu kan in don hna i, himnak hmun ah kan in thlah hna lai. Hriamnam tling he a ra mi cu laksawng tangka zong kan in pek hna lai tiah an thanh.

Misual, mifir le thil chuh hmang a voi khatnak kan in tlaih hna ahcun kut tan a si lai i, a voi hnihnak tlaih tthan ahcun nunnak laakpiak a si lai tiah Monywa UG Group nih an thanh.

Ni khat hnu ni khat misual, fir le thil chuhnak a tam chin lengmang ca ah tlaih an si ahcun an kut tan in a voi khatnak ralrin pek an si lai i, a voi hnihnak tlaih than an si ahcun thah an si lai tiah Monywa UG Group nih thawng an thanh.

Myanmar ram ah Ralhraang nih hriamnam bochan in uknak an laak hnu in hmun kip ah misual, mifir le thil chuh hmang an karh. Cucu Ralhrang Council nih tawlrel lo in anmah a dotu hna kha bipi ah chia in tlaihkhih le hremnak lawng an tuah.

Atu ah cun Sagaing ramthen, Monywa peng chung ah ni khat hnu ni khat in misual le mifir an karh ca ah Monywa UG Group nih kan tawlrel lai tiah an thanhnak a si.

Kutkai-Theinni motor lam ah damiah paruk an tlaih hna. Shan ramkulh Chaklei, Kutkai-Theinni motor lam cung ah a um mi, meng 38 Manping khua pawng ah khuami hna nih damiah mino paruk an tlaih hna tiah theih a si. Kutkai khua lei ah caw a va zuar i khua lei ah a rak kir mi minung pahnih cu September 29, zaan sml. 7:00 ah damiah nih thil an chuh hna.

Thil chuh a tong mi hna nih phone in khuami bawmh an hal hna tikah khuami hna nih damiah pawl cu an kal hnawh hna i an tlaih khawh hna tiah tualchung media pawl nih an tial. Damiah phu hruaitu pa cu a zaam manh i, tlaih a tong mi paruk cu khua ah zaan khat an hreen hna hnu, September 30 ah Kutkai Palek Sakhan ah an ap hna tiah theih a si. Credit: The Hakha Post