China Le Russian Zong An Cawlcangh Kho Ti Lo

CHINA LE RUSIA ZONG AN COL KHO TI Lo. UN Security Council ah Veto Power hmang in Kawl Ralkap a dirkamh pengtu China le Rusia cu tutan Ralkap Aanaa ting kong biakhiahnak ah a donghnak ahcun an col kho ti ve lo i. Nihin ah UN Security Council ram 15 an dihlak in Kawlram Ralkap Aanaa tingnak cu kanhkuat (Condemn against Military coup) dingin hnatlaknak vote an thlak viar cang. Security Council ah mah bangukin ram dihlak kanhkuat tu umloin in hnatlaknak an ngeih khawh mi hi Security Council ah a um bal setsai lo mi asi.

UN Security Council nih Kawlram Democracy lam cu a mah bawn ah sisehlaw Ralkap nih nan tlaih mi hna Daw Aungsan Suu Kyi le Upa hruaitu dihlak nan thlah dih hna lai tiah Statement nawl an chuah cang. Ralkap caah lam a pit ngai cang. UN in dirkamhtu ram a ngei ti lo caah Ralkap cu Tapung bantuk an si cang tinak asi. Cakei mei tlaih bantuk an si cang. Zeidah a cang lai, zoh rih hna usih.

Relchap, 21 Uprising Ai Thawk Taktak Ko Rua. Biatenh Hi ca ka tial tikah Political party duhdanhnak tel in ka ti hnawhchan mi a si lailo. Ralkap nih uknak an lak in nithum a tling. Ngaihthlem taktak in uknak an lak tikah thaizing deitiang ah cun suimilam 72 ti mi Smart 72hrs a dih cang lai. Cozah tungtlang zong hnawhhnam taktak in an ser i, khuapi (myone) uknak tungtlang tiang an ser cang. Ralkap nih uknak an lak tikah a fawinak in chim ahcun uknak tungtlang pathum Legislature, Executive le Judiciary ning in a lak dih (2008 Constitution 419 ningin ti khi a si). Ai lak dih.

Rampi uknak Council thar (State Administrative Council) a ser. Minung 16 an i tel (tuzaan ah 5 a chap hna). Chairman ah a MAH lila ai thim. NLD cozah chan Attorney General le deputy pawl an rian a phuah hna. Daw Thida Oo cu Attorney General ah a thlen. Palik lukzik rian a dinhter i, Deputy Genral Than Hlaing cu Public Affair Deputy Minister le Palik luzik a kemhter. UEC thar minung paruk a thim hna. Central Bank bawibik thar ah U Thein Nyein a thim. Union Minister thar minung 13 a thim hna. Ramkulh le ramthen Council thar minung 12 le autonomous Council thar minung paruk a thim hna. Khuapi uknak (TAD) ah minung panga in ser ding ah tungtlang a van. A biapi deuh cu hivial hi atulio ralkap nih uknak a lak nithum chung ah rampi uknak a ser mi chung in an si hna kan ti. Hrelh mi tete an um pah. A zapi ning chim zong hi ai huam lemlo.

President U Win Myint le State Counselor cu taza a cuai hna. February 15 ah biacaihnak a chuahpi hna lai. NLD cozah le Hluttaw cu a hrawh cikcek tinak khi a si. Dai tein va um uh, hmaikum ah thimnak kan tuah piak hna lai ti khi a bia tlaih a si. Mah vial kha ralkap uknak lak le NLD cozah kong cu van si rih seh. Ka tlangtar ka nganh pah cang. Mipi lei kong kan hun chim cang lai. Capo ka hun tenh. Lai khuate pakhat cu Ralkap uknak lak cu tuzaan lei lawng an theih an ti (hehehe). Tahlak ah nihchuak. Ngaihthlem taktak a si ca ah. Phone line vialte a thah dih. Radio ngaih a um tilo. Mifir bang a lut kan ti nain a lai ni hrawng thlihran kha cu ai dang ngai ko.

Kan lau. Kan thin a lin. Democracy ram ah zaan kan it nain, ralkap cozah kuttang ah kan i tthang. Thawh phak in 88 Uprising lio bang lamcung chuah a duh an tam ko lai. Asinain, ruah lengmang ah meithal hmai ah kan thih than ding theih ko in lam va chuah cu ahohmanh nih duh le ngamh cio a si ti lo. 88 lio a lo lo. Cheukhat nih ralchiat zong an puh ko. An mawh ve lo ka ti. A hohmanh an mawh lo. A tulio hi ralkap nih mipi sin ah ‘thinlung khuaruah raltuknak’ (Psywar) a ser cuahmah. Smart 72hrs tibantuk, khuapi chung ah raltuknak ttheng he vah le security chah taktak in chiah tibantuk in an tuah. Mi an hip tuk ve. Asinain, mipi an hruh ve ti lo tikah an tei cuahmah kan ti khawh.
Atulio ah ram mipi tam-u nih lungrual tein an tuah cuahmah mi dai tein ralkap cozah dohnak ai thawk. Meithal zunkhat a puak rih lo. Politician pawl le activists pawl cu an tlaih lengluang ko hna nain hi duhlonak langhter ruang ah buai taktak a chuak rih lo. Hi duhlonak tuah mi chung ah Civil Disobedience Campaign hi a ngan bik a hung si.

Civil Disobedience Campaign/Movement ti mi cu mipi ralkap cozah thar kha legitimacy kan pe hna lo ti khi a si. Cozah thlahlawh a la bak mi hna nih uknak latu cozah kuttang ah rian kan tuan lailo tiah an rian vialte an chuahtak. Tuzaan tiang ah ramchung siizung 100 deng siibawi te nih rian an chuahtak. Engineer cheukhat nih an rian an chuahtak. Sipin cheukhat zong an i tel. Thaizing kip ah civil servants phu zeitluk nih dah an rian an chuahtak lai timi cu a lang lai i, hihi a biapi ngaingai mi Campaign a si. Ramchung siibawi le siizung riantuan te upat awk an tlak. Heroes taktak an si.

Cozah riantuan nih an rian an chuahtak tikah cozah a derthawm cuahmah lai. Ngunkhuai tam pipi petu cozah riantuan nih an rian an chuahtak tikah ngunkhuai a zor lai. Phaisa a tla lai. Dollar man 1400 MMK a phan manh. Cozah riantuannak a der tik le mipi nih cozah rian an chuahtak tikah ralkap cozah administration a tla (breakdown) te lai. A tlawm le a tam nih a ngeih ve lai cu! A ngai ti ahcun CDC hi vawleicung ramkhel tuanbia ah a hlawhtling mi an tam lengluang. Zomhtaih ding a si lo.

A pahnihnak ah ramchung khuapi tampi ah ralkap cozah duhlo nak cu zaan suimilam 8:00 pm ah an thawk i, durkecheng tum thawng le mawtaw horn tumthawng nih khuapi a thang chinchin cang. Ningzah hngal lo ningzah ter (Shaming the shameless Movement) kan ti lai. Hihi vawleicung media le ramchung media nih phozar a si tikah ramdang cozah phihkhar nak zong a ranh phum telai. Pehpar ah uknak lak a nihnihnak ah ramchung investment tuahtu hna nih phaisa dollar billion zeimawzat dih in an riantuan mi an ngol hna. Pathumnak ah Nationwide Political Defiance Movement a si. Ram pumpi in ralkap cozah thar theihpi duhlonak a si. Hriamtlai kip nih ralkap an nawr cuahmah. Party (USDP le a kawi pawl telh lo) kip nih thanhca an chuah. Cozah rianfial mi theihpi lo ding a karh cuahmah. Karh chin hram seh.

Hi hna pathum nih hin a tulio ah hma an lak bik rih kan ti lai. Kau pi in mei bang a tlan ahcun hlawh a tling kho mi lam an si. Asinain, dirhmun ngei lo (karlak minung) an tamtuk ahcun #CDC hi a hlawh a tling lailo. Ralkap uknak kan duh lo taktak ahcun nunnak thap kan ngamh lo hmanh ah an cozah riantuan kholo lak in tuah cu kan ngamh a hau. Hi zawn ahhin party kong ka tenh talai. Kei cu miphun party a dirpi tu le CNLD a tanhtu ka si. Zeihmanh va sisehlaw ralkap nih uknak an lak mi cu zei dirhmun hmanh in ka cohlang kho bak lo. Ka riantuan mi cu journalism (soft power) le caholh a si ko. Asinain, democracy a dirpi lo mi dictatorship cu ka khap tawk in 100% ka doh lai. Mahatta Gandhi nih, “ram pakhat ah uknak phung ninglo le rutreu in a chuah ahcun an phungzulh duhlo kha mipi rianthiang (scared duty) a si” tiah a chim. A dik.

21 Uprising (21 A-ye-daw-pung) ai thawk ko cang rua tiah ka ruah. Ram mipi kan rian cu ralkap uknak chiakha doh kha a si. Kan miphun covo a ruat mi (common interest) hna an um ahcun kai tel ve ko lai. Kan i khah lonak zawn ahcun kan i dannak kha lungthiang tein ka chim ko lai. Kan miphun nih a tumtah mi Federal Democracy ram ngah nak ding ah ralkap cozah doh kha kanmah le kan zawn cio ah duty a si ve tiin ka hmuh. Kan miphun kong he pehpar in hun chim ka duh. Chin miphun cu miphun dang kuttang ah kan sifah le kan harsat he kum 120 leng kan um cang. Kan vawlei, kan covo le kan zeizong a ttettiam cuahmah cang. Kan tihphan le kan thlalau nih a kan thah deng lengmang. Zeimaw te ah kan lau a fak tuk. Civil War kum 70 a lonh cang. Civil War kum 100 a phak sual ahcun kan tlau te lai nak ding a fawi tuk telai.

Cu ca ah a tu te hin mino hna nih kan miphun lamthluan cuan pah hna usih. A tulio Kawl miphun he ruru hranghrang ralkap kan doh khawh hna lio ahhin ngamh tein kan doh ve caan a si. Hi ramkomh ah ralkap kan doh khawh nak lam a um ahcun doh ko hna usih. Ralkap tei ahcun kan miphun himnak lam a um. Asinain, ralkap zong teilo, miphun pi chilhnak zong teilo buin Civil War kum 100 kan tlin ahcun kan miphun #duty ai thleng te kho men.
Salai Tial Hram Ling
Yangon.