“Chin State Cozah / Hluttaw Thar Cuanh Chungnak Le Saduhthah ” ( Part 5 )

“Chin State Cozah / Hluttaw Thar Cuanh Chungnak le Saduhthah ” ( Part 5 )

Biahmaithi: Kan tlangtaar part 1, 2, 3 le 4 ah khan Chin State cozah thar cuanh chungnak le saduhthah kong kan tial cang i tutan cu Chin State MLA /MP (Hluttaw Palai pawl) caah saduhthah kong kan tial ve cang lai.

Chin State Hluttaw Palai Pawl Caah Saduhthah. Cozah uknak kan timi ah hin tungtlang pathum an um hna: (1) Cozah uknak (Executive), (2) Phung sernak (Legislation), (3) Biaceihnak (Juriciary) hna hi an si. Mah hi chungah hluttaw rian bik cu phung sernak ( Legislation ) hi a si. Cucaah hluttaw palai hna caah kan saduhthah hna cu: –

(1) Hluttaw palai cu phung sertu an si bantukin Upadi lei theihhngalhnak kong ah biatak tein aa zuam a hau. State hluttaw palai a si ahcun Chin state he aa pehtlaimi Upadi tampin theih aa zuam lai i Pyithawngsuh hluttaw palai nih cun rampi huapmi Upadi tampi theih le hngalh aa zuam ve awk a si.

(2) Liaison Office : Pu Tial Ling nih keimah cu mipi nih nan ka thim ahcun mipi he pehtlaihnak caah Liaison office ka hon lai, a timi kha thil tha ngai a si. Midang zong nih tuah cio kho hna sehlaw a tha hnga. MLA/ MP cu mipi nih anmah aiawhin an thimmi an si caah mipi he aa then kho an si loh, pehtlaihnak an tuah peng a hau. Mipi he i pehtlaih lo ahcun a bial cung an herhmi a tuahpiak kho hna lai loh.

(3) Social media a hman zia thiammi si hna sehlaw a tha bik. A herh lomi ca post hi mi huaha lo rian a si. Sihmanhsehlaw, hluttaw palai pawl nih cun an riantuannak kha mipi sinah social media hmangin theihter peng a hau.

(4) A umnak hmunhma (Constituency) a tlawn peng hna a biapi tuk. Liaison office hmangin thawngpang cu theih khawh a si ko nain, mipi an umnak cio i a kal hnawh hna ahcun a mit bakin a va hmuh khawh lai. Cucu mipi he hmun khat ah riantuanti zong a si fawn. Mipi thimmi palai nih cun Election lai i a cawlcangh bantuk bakin a cawlcangh peng khawh ahcun next election ca zong ah phan awk a um ti hnga loh. Kum 5 chungah a tlawm bak voi khat cio tal cu pal manh awk a si.

(5) Media pawl he pehtlaihnak tha ten a ngeih peng a herh. Amah nih social media i a post mi pinah media pawl sinah a hmuhtonmi tete kha a chimrel peng ve a hau.

(6) A umnak (bial) constituency chung i a ummi CSO le NGO pawl he zong pehtlaihnak tha a ngeih a hau. Mipi ca i riantuanmi an si ve caah zeidah an harnak a si ti kha theih aa zuam lai i hluttaw ah a chimrel pi hna lai.

(7) A bial (constituency) chung khua kip herhmi pawl kha chimrel khawh aa zuam lai. Kum khat ah khua cu zat ca ka hal lai, tiin management tha ten a tuah lai i kum 5 chungah a bial chung herhhai vialte tuahpiak khawh aa zuam lai.

(8) Cozah riantuannak kherhlai le a herhning i control tuah kha hluttaw rian biapi tak takmi a si. Cozah le hluttaw hi Check and balance a um hrim hrim a hau. Cozah riantuannak a pial sualnak hnga lo hluttaw nih control peng a hau. A herh ahcun media pawl zong an auh hna lai i an biaceihnak ah thawng an lakter hna lai. Chin state caah cun corruption doh hi a biapi tuk i corruption dohnak phung hi a tha bikin an ser hrim hrim a hau. Mah cu phung cu cozah nih tlamtling in an hmang msw, hmang lo ti tiangin an zohfelpi lengmang zong a hau lai.

(9) 2008 phunghram he aa kalh lomi Chin miphun caah zei bantuk phung dah kan ser khawh ve lai timi kha biatakin kan tuaktan piak kho hna sehlaw a tha tuk hnga. Tahchunhnak ah, Chin miphun ni hna hi rampi huapin holiday tuah cu a har deuh kho men. Asinain, Chin state huap tal i tuah ahcun a lam a um ko hnga lo maw?

(10) Hluttaw bomhnak tangka felfai ten a tawlrel lai. Peng kip caah hluttaw nih tangka Sing (ting) 1000 cio bomhnak an pek tawnmi cu mikip hmuh khawh awk (Tranparency) le eihmuarnak um lote in felfaiten a tawlrel dih lai i, i tlukrualte in bomhnak a pek hna lai.

Mah kan saduhthah pawl hi atu i thimmi Hluttaw palai pawl nih kan tlinhpiak kho hna sehlaw, Chin State cu fawite in a thangcho hnga i kan MLA/MP pawl ca zongah a ralaimi election caah phan ding a um ti hnga loh. Credit: Victor Pa

Leave a Reply

Your email address will not be published. Required fields are marked *