Chin ramkulh Tidim peng Haimual khua ah an lut i khuami hna cu an hrocer hna

ZRA Hriamtlai Phu Pawl Nih CNA Ralkap An Ti Ning Hna Hi Thil Mak Taktak Cu A Si Cang!
=========
CNA ralkap pakhat le a dang Chin hriamtlai bu pathum in miphun ralkap hna nih Tidim peng chungah Dec 15, 16 le 17 i an thil tuah mi he pehtlai in Zomi Political Coordination Committee/Zomi Revolution Army (Eastern command) nih UNHRC, ASEAN hruaitu le NUG sinah ripawt (report) kan tuah hna tiah December 18, 2021 ah cathanh an chuah. zomi revolutionary army/zomi revolutionary army nih an cathanh chungah cun a tanglei bantukin an ṭial.

“Commander pakhat hruaimi CNA ralkap pakhat le hriamtlai bu pathum in miphun ralkap 50 drawing cu December 15, 2021 ah Chin ramkulh Tidim peng Haimual khua ah an lut i khuami hna cu an hrocer hna hnuah Zomi kong, Zomi ramkhel cawlcanghnak le zomi revolutionary army a dirkamhtu nan si maw tiah an hal hna.

Cun miphun ralkap (anmah ṭialning in cun The terrorist armed groups) hna nih inntek Khrihfabu hruaitu Pastor Laang (kum 60) le a chungkhar le chungkhar dang hna cu an theilo nak hmun ah an kalpi/kidnapped hna i biahalnak an ngeih hna hnuah hliamhma he khua ah an chiah ṭhan hna. Asinain Pastor pa le a chungkhar cu an kalpi ṭhan hna i atu tiang an konglam kan thei ti lo”.

“A thaizing December 16, 2021 ah cu hna cu ngakchia pakhat cu ralphaw ah hmangin Ngawsing khua ah an lut. December 17, 2021 zinglei ah Ngawsing khua i zomi revolutionary army ralkap an umnak inn cu an nam i meithal an thlah caah zomi revolutionary army lei zong nih an kah colh ve hna i an tei hna. Hi bantuk cawlcanghnak hi CNA le an hnuzul hriamtlai hna nih NUG le PDF zulhphung an buar a si.

“NUG nih a thanh cang bantukin tlangcung hriamtlai hna cu anmah hmunhma kilven ding le mizapi himnak kha an ṭuanvo a si. Voitampi meeting ah ZRA nih Zomi hmunhma kilven dingin kan halmi an zulh duh lomi kongah kan lung a dong cang, cun Zogam in hriamtlai bu dang hna cu ṭhawl le dawi an herh, ralhrang uknak doh loin miphun buainak le ramchung ral thawhter bantuk a si”.

“Thilcang kong he pehtlai in Dec 17, 2021 ah CNA hruaimi ralkap hna chungin hruaitu hna nih Zomi Revolutionary Army hruaitu hna cu phone an chawnh hna i Haimual le Ngawzing ah a cangmi kha CNA ralbawi nawlpeknak kan el ruangah a si. ZRA an umnak hmunhma ah lut lo dingin kan ralkap kan chimh cang hna.

Haimual khua ah kan ralkap an lut ti kan theih in a rannak in chuak ṭhan dingin nawl kan pek ko hna nain kanmah theih loin khuami hna cu an hrocer hna. Cun CNA ralbawi hruainak tangah ZRA le khuami hna cu an doh hna. Kan palhnak kan theih caah kan ngaithiam hram u tiah kan in nawl hna, cu tikah ZRA lei zong nih Tidim peng chungin chuahnak lam kan in onh hna ding a si ahcun nan kan nawlnak hi Media ah kan thanh lai tiah kan leh hna”.

“An kan nawlnak le biakam cu kan upat ko ti langhternak caah phone chawntu le chawnhmi min hna cu kan langhter lo. Nawngeihnak latu ralhrang teinak dingah Myanmar ramchung mizapi cawlcanghnak ah Zomi Revolutionary Army le ZNV zong kan i tel ve ko ti kha Zogam hmunhma chung i kan cawlcanghnak nih a langhter ko”.

Hi a cunglei i italic in ka ṭialmi hna khi Zomi Political Coordination Committee/Zomi Revolution Army nih Mirang holh in cathanh an chuahmi ka lehmi a si. Anmah ṭialning ah cun CNA le CDF hna hi “ralhrang ralkap (The terrorist armed groups)” tiah an auh. Cucu ka duh lo caah miphun ralkap tiin ka lehnak a si. Hi kong he pehtlai in CNF/CNA lei nih zeihmanh chimrelmi an ngei rih lo. Credit: The Chin Post