SAC Ralhrang Le CDF-Mindat Kar Kahdohnak Ah Ralhrang 8 An Thi
=========
Chin ramkulh thlanglei Mindat khuapawng kahdohnak SAC ralhrang 8 an thi tiah CDF-Mindat nih July 30 ah an langhter. July 29 zing suimilam 7: 25 ah ralhrang sakhan khah-lah-yah (ခလရ) 274 pawng kahdohnak ah ralhrang 1 a thi i CDF-Mindat ralkap in minung 2 hliamfak lo an tuar.
Zanlei suimilam 3:40 ah humhimnak lak ah aa chok mi SAC ralhrang le palik hna cu an kah than hna caah ralhrang lei 7 an thi than. Ralhrang lei motor le an hriamnam cu thil sining nih a pek lo caah kan la kho lo, a si nain ralhrang lei a thi mi le hliamtuar hna cu motor in an vun lak hna tiah CDF-Mindat nih an langhter chih.
Mindat Khuapi Ah SAC Ralhrang Nih Pastor 1 Le Khrihfa Upa 3 An Thah Hna! Chin ramkulh, Mindat khuapi hrambunh Khah-lah-yiah 274 Battalion SAC ralhrang nih pastor 1 le khrihfa upa 3 hna cu an tlaih hna i an hrem hna hnu ah an thah hna, tiah Mindat peng mipi ukhruai tu hna sin in theih a si.
“Tlaihkhih an ton caah an chungkhar hna nih SAC ralhrang pawl an hal hna i biahalnak kan tuah lio hna tiah an chim. A hnu deuh i nan tlaihmi hna teh tiah an hal ṭhan hna i kan thei lo, an umlo tiah an ti ṭhan hna. Bia an hal hna lio ah an thah hna hi a si men lai. Pawngkam mi hna zong nih an hrem hna thawng kan theih tiah an chim.
Hremnak in an thih a si zong ah an ruak tu cu kan pe ko uh kan ti hna nain SAC ralhrang nih kan thei lo, an umlo an kan ti caah an nunnak a liam cang i siko lai tiin kan ruah” tiah mipi ukhruainak phu in ṭuanvo ngeitu Salai Yaw Maan nih a chim.
Mindat khuapi nitlaklei sang um, Khrihfa biakinn ralhrial Camp ah Cycle a dirmi pawl a tamtuk tiin a ruang an kawl i Khah-lah-yiah 274 Battalion in zuri mi SAC ralhrang pawl nih Pastor 1 le Khrihfa upa (An zapi minung 4) hna cu July 16 lio ah an tlaih hna hi a si, tiah kan theih.
Tlaihkhih a tongmi hna hi khuapi chung ah ral a hrialmi mipi tawlreltu hna an si. Tlaihkhih an ton hnu ni 10 rauh hnu ah chungkhar hna le biaknak lei hruaitu upa hna nih a voi 2 naak an hal ṭhan hna i kan thei lo, an um lo an ti hna caah an hremnak hna ah an nunnak a liam si lai tiin an ruah hi a si, tiah kan theih.
SAC ralhrang nih atu bantuk in Pastor le biaknak lei hruaitu upa hna an thahmi hna cu Mindat peng mipi ukhruainak phu nih fakpi in kan doh, tiah July 27 thawng an thanh. Mindat khuapi um mipi nih SAC ralhrang pawl tuahsernak cu nan theih dih cang caah mipi ralkap hna he fonh in i tel cio ding in Mindat peng mipi ukhruainak phu nih thawng an thanh chih.
Yangon ah Police Sakhan Hmu Police Captain Lin Lin Tun, A kuttang nih Meithal in a kah. Yangon North Okkalapa Sakhan Hmu Police Captain Lin Lin Tun cu a kuttang Police senngei lo Ar Khar Soe nih meithal in a kah. Siizung ah zualhma ngai in a um hnu, July 27 zan ah a thi tiah theih a si.
July 18 zan 8:30 pm ah North Okkalapa Myomya police sakhan ah Sakhanhmu Police Captain bawi Lin Lin Tun nih a kuttang police pawl cu zan duty dingin nawl a pek hna lio ah Police Ar Kar Soe nih zankhat chungah voi 2 duty tuan a sinak kongah an pahnih karlak bia-elnak a um. Cu hnu ah Police Ar Kar Soe nihcun, police bawi Lin Lin Tun cu M -16 meithal in voi 1 kahnak in Lin Lin Tun cu hliamtuar in a zualhma ngai i North Okkalapa sii zungah an kalpi hmasa.
A hma a zualngai caah Yangon siizung pi ah an thial`han hnu, an thlop kho ti lo caah July 27 zan ah a thi. Meithal a kap tu police Ai Kar Soe cu North Okkalapa Myomya police thonginn ah hrem a si tiah theih a si. Police Captain Lin Lin Tun cu July 29 ni ah a ruak vui a si lai tiah sakhan um police nih Khet Tit media ah a chim.
Budalin Peng Ah Kahdohnak A Chuak; SAC Ralhrang Bawi Bo(2) 1 Telh In 4 An Thi. Sagaing ramṭhen, Budalin peng, Ywarthar khua le Kyetyoekone khua karlak ah kahdohnak a chuak i SAC ralhrang bawi bo(2) 1 telh in 4 an thi, tiah Student Armed Force in ṭuanvo ngeitu pakhat nih a chim.
July 28 zan ah Budalin pengchung ah rallam sialmi SAC ralhrang thazaang 100 hrawng nih mipi cheukhat an tlaih hna i an hrem hna hnu ah an thilri zong an fiarpiak hna caah mipi ralkap ṭangṭi phu hna nih an bawh hna i an kah hna hi a si, tiah theih a si.
“Minute 10,15 chung hrawng naih tein kahdohnak a chuah hi a si. SAC ralhrang pawl cu atu tiang Budalin pengchung ah an um ko rih. Bo-2 1 telh in 4 an thi pinah hliamhma a pumi zong an tam ngai” tiah a cunglei upa nih Khit Thit ah a chim. Kahdohnak cu Student Armed Force, Anonymous Hero (Local PDF) le tualchung hriamtlai ṭangṭi phufonh hna kan si i mipi ralkap lei in nunnak liammi le hliamhma tuarmi kan um lo, tiah an langhter chih. Credit: Lungmili Media