Chin Mipi Kilvengtu CDF He Pehtlaihnak Tha Kan Ngei Ko!

Chin Mipi Kilvengtu CDF He Pehtlaihnak Tha Kan Ngei Ko – Khaing Thu Khah
========
Chin ramkulh mipi kilvengtu CDF hriamtlai hna he pehtlaihnak tha kan ngei ko tiah Rakhine hriamtlai AA in chimnak nawl ngeitu Khaing Thu Khah nih September 19 ni ah a chim tiah theih a si. “Laymyo tiva lei kap ah a ummi CDF hna he naihniam tein pehtlaihnak tha kan ngei ko, asinain raltuknak kongkau ah i bawmin cawlcanghnak tucu a um lo” tiah Khaing Thu Khah nih cun a chim.

Rakhine ramkulh chungah PDF an um lo, ramri in kan i pehtlaihnak Chin ramkulh, Magwe ramthen lei ah CDF/PDF hriamtlaiphu hna cu ngandamnak kong le thil dangdang ah bawmhchanhnak kan tuah mi zong a um tiah a chim chap tiah theih a si.

CDF Matupi Thangchiat Le Sualhawl Ai Zuammi Pu Roliana Ralrin Pek A Tong. CDF Matupi minchiat le thangchiatnak ding lam a hawl i hruaitu sualhawi ai zuam mi Aizawl khua ah dawr a tuahmi Pu Roliana cu CDF Matupi ralrin an pek i na thih nun kongah kan i ceih lo tiah ralrin peknak ca an chuah hnawh tiah theih a si.

Chin ramkulh, Matupi peng, Saungthia khuami, a tulio, Mizoram, Aizawl ah khua a sa i, Bawngkawn Bazar ah thil a zuarmi U Roliana cu, Myanmar ramchung ah SAC nih hramhram uknak an lak hnuin, kan miphun nih zalong tein mah te uknak nawl a ngeih khawhnak ding le Federal Democracy ngah khawhnak ding ah hriam a tlai i, ral a dotu CDF-Matupi cu, mipi hna sinah minchiatter ding ah a lam kip in a kan doh lawng si loin, CDF-Matupi hruaitu hna zong an limhang zor dingin Facebook cahmai ah a taarlangh hna caah U Roliana a nunnak kong ah le a humhimnak kongah CDF-Matupi kan i ceih lai lo.

Cucaah, hriam a tlai i ral a do cuahmahmi CDF-Matupi cu, hi hnu ah hi ti bantuk in, kan minchia dingin a kan tuah rih a si ahcun, U Roliana a chungkhar sahlawh rualchan hna zong CDF-Matupi nih a herh ning bantukin hma kan lak hna lai. Cun, zeibantuk hriamtlaiphu le zeibantuk minung an si zong ah CDF-Matupi a kan doh i minchia dingin a kan tuahtu vialte cu, a herh ningin hma kan in lak hna lai tiah CDF-Matupi nih nihin September 20 ah cathanh an chuah.

CDF-Matupi Nih SAC Ralkap 6 An Thah Hna, 8 Hliamhma An Pu. Chin ramkulh, Matupi khua ah nizzan September 19 zanlei sml 5:00 hrawngah SAC ralkap sakhan pakhat cu CDF-Matupi nih kan kah caah ralkap 6 an thi i, 8 hliamhma an pu, tiah CDF-Matupi nih cathanh an chuah.

Matupi khuami hna nih um kalnak ah an hmanmi Mindat-Matupi lam cu SAC ralkap nih Matupi hauka(ကြိုဆိုပါ၏) ah umhmun an khuar i, mi tlungkal cu hnahnawhnak an pek hna caah Matupi in meng 2 a hlatnak SAC ralkap sakhan kan kah i ralkap 6 an thi, 8 hliamhma an pu, tiah an langhter.

Chin ramkulh, Falam ah Covid-19 runvennak kong ceihhmainak meeting an tuah! Chin ramkulh, Falam khua ah Covid-19 i runvennak khawhnak ding caah, nizaan September 19 chun sml 1 hrawngah, General Administration, meeting room ah meeting an tuah tiah theih a si.

Pengkomh chairman U Saw Htun Win nih hramthok bia a chim dih in, pengkomh uktu chang Duh-Bu-Hmu Win Zaw Latt, Palik bawi,(secretary)Moe Naing hna nih, covid-19 zawtnak kong le hi zawtnak hi zeitindah kan i runven awk a herh timi kong ah bia chimnak an ngei tiah theih a si.

Cu hnu ah, Falam Hospital uktu Dr. Tuan Cung Thang nih Covid-19 i thlopbulnak kong ah an cawlcangh ning kong a chim dih in, Township Administration chairman U kyaw Kaung nih covid-19 i runvennak caah rian a tuantu hna he i bawm cio dingin le tuanchuah rih dingmi kong ah i ceihhmai thannak ding kong a chim ve tiah theih a si.

Cu hnu ah, meeting a kaimi hna nih, covid-19 zawtnak i runvennak ding caah, Sianginn le Biakinn ah, covid-19 zulhphung le dingrep vial te zulh dih dingin an ceih hnu ah, pengkomh chairman U Saw Htun Win nih donghnak bia cah a chim i an meeting cu an dihter tiah theih a si.

Thailand Ah Myanmar Mi 15 Tlaih An Tong, Minung 2 Covid Zawtnak An Ngei! Thailand ram Kamchan Naburi ramkulh Taung-pha-bun khua pawngah mawtaw pakhat checkhlatnak tuah dingin an dirter i dir duh loin a zam caah tuanvo ngeitu nih an dawi hna hnuah mawtaw an tlaih, mawtaw kuangah myanmar mi 15 a phurhmi hna cu kan tlaih hna tiah, tuanvo ngeitu hna nih an thanh.

Tlaih a tongmi Myanmar mi 15 cu sizung ah zawtnak zohfel an si i cu chung ah minung 2 cu covid zawtnak an ngei tiah, theih a si. A tam u hi cu Yangon, Mawlamyine in an si hna i agent nih Chon Phon le Rat Buri ah rian nan tuan lai tiin a van ratpi mi hna an si, minung pakhat nih agent sin ah baht 25000 pek in a rami an si hna.

Myanmar ah SAC nih uknak a lak hnu in ramchung mipi cu riantuan awk mumal an ngeih lo caah phungning loin Thailand ramri in nifatin a rak lutmi an tam ngai tiah, The Bangkok Post nih cun a tial. Credit: The Chin Post