Chin miphun na lung a dong maw? Na thaba tuk cang maw?

Chin miphun na lung a dong maw? Na thaba tuk cang maw? Kan tei kho bal hna lai lo, dai tein um cang ko usih na ti sual maw?
———-
“A tang lei ca hi tling tein rak rel hmanh,”..! Vawlei cung ah ramrum ramthawng bik kan timi USA khi an ram chung ral ah minung ting 5 reng lo dah kaw an rak thi cu. Minung ting 5 nunnak liam pinah zei tluk in dah inn lo ai rawk i hliamtuar mi an tam. Cu tluk cun an rak tuar ve ruang ah dah kaw US ramchung ahcun civil war um an duh bak ti lo i vawlei cung ah phunghram tha bik a ngeitu le ramtum ramthawng bik ah an i chuah cu.

India ralkap nih MNF hriamtlai tampi an rak thah hna. Mizoram khuate tamtuk an rak duah. Mizo nu pawl India ralkap nih tamtuk an rak tlaihhrem hna. A tu tiang Mizoram ah vai ci a lo kho ti lo. India ralkap nih Jet fighter tiang in MNF cu an rak phomh ve ko hna.

India ralkap nih khuami kha an tlaih hna i khuami hmuh hngan hmaika bak ah meithal in thi bak an rak kah mi hna an tam. Khuate tampi an khua chuahtak in khua dang ah an rak fonh hna. MNF pawl caah khua um hlah seh tiin an rak ruah.

Sinain Pu Laldenga hruaimi MNF an lung a dong lo. Mizoram mipi an lung a dong lo i India ralkap cu khuapi khaute ti loin an rak doh peng hna. Aizawl khuapi chung tiang ah an rak i kap.

Cuticun India ralkap cu an lung a dong. Kan tei kho bal hna lai lo, kan uk kho bal hna lai lo ti an i hngalh tikah India cozah pi nih MNF cu a rak auh hna i daihnak a serpi hna. MNF nih an duh mi kha a rak pek hna i nihin ni ahcun Mizoram chung ah nawlngeihnak sang bik cu anmah Mizo mipi an si cang.

Mizo ram chung ah India cozah nawlngeinak cu ramdang he ramri zawn te lawng ah a si cang. Mizoram chung ah India nawlngeihnak a um ti lo. Kanmah Chin miphun zong kan lungdong hlah seh. Minung kan tlawm tuk ti hlah usih. Kan ram a hmetuk ti hlah usih. Chinram nak in Isreal ram a hme deuh.

Mizoram zong India rampi sinah cun Antamci tia hmanh a si lo. Sinain lungdong loin an rak an doh i an tei ko. Kanmah zong lungdong loin lungrual tein kan ral kan doh hna lai i a donghnak ahcun anmah Kawl ralkap thiamthiam an lung a dong te ko lai. Credit: Van Tin Lian