Sagaing, Mandalay, Magwe Ramhṭhen Le Chaklei Shan ram July Thlachung Kahdohnak Ah SAC Ralhrang 400 Leng An Thi
==========
NUG Regional Command No.1 ti mi Sagaing, Mandalay, Magwe ramṭhen le Chaklei Shan ram, July thlachung kahdohnak voi 439 ah SAC ralhrang mi 400 leng an thi, 574 hliam a tuar i, Mipi ralkap lei in 26 nih ram le miphun caah nunnak an pek, 59 nih hliam a pu tiah tiah NUG Defence Minister nih a chim.
Cu kahdohnak ah SAC ralhrang lei hriamnam phun 26 telh in drone 1 bomb lian 1 le kuan phun 84 cu mipi ralkap nih an lak khawh tiah Khit Thit media nih a langhter. SAC le mipi ralkap kahdohnak ah Regional Command no 1 tang a ummi PDF, Pah-kah-phah, le EROs ṭangrual in kahdohnak an tuah i drone in voi 56, landmine in voi 93, kahdohnak voi 188 le hmaitonh kahnak voi 79 a um. SAC lei nih vanlawng in kahdohnak voi 20 le drone kahnak voi 3 an tuah tiah theih a si.
SAC phu nih hramhram in mipi inn an khangh ruang ah 2021 May 1 in 2023 July 31 tiang ah ramchung mipi inn 74,874 a kang cang tiah Data for Myanmar nih August 8 ah cathanh a chuah. Sagaing ramṭhen ah inn tam bik an khangh i mipi inn 57,503 a kaang cang. Cun Magway ramṭhen hi a pahnihnak a tambik an khangh mi a si i inn 11,026 a kaang tiah Data for Myanmar nih a langhter.
Kawkareik Peng, Yuathitkone Ah Hmunhma A Khuar Mi SAC Infantry 343 Kahdohnak Ah SAC Ralkap 6 An Thi! Karen ram, Kawkareik peng, Yuathitkone ah hmunhma a khuar mi SAC Infantry 343 sakhaan cu dothlennak phu pawl nih an kah hna caah SAC ralkap 6 an thi, 6 an i hliam tiah Naga Phyu Colunn nih thawng an thanh.
August 16 zinglei sml 9:00am hrawng ah Kawkareik peng, Yuathitkone khua ah hmunhma a khuar mi SAC LIB 343 sakhaan cu KNLA, PDF le adang dothlennak phu pawl bawm in an va kah hna caah SAC ralkap 6 an thi, hliam a tuar mi lak ah Second Battalion Commander zong aa tel. Mipi hriamtlai phufonh lei in 7 an i hliam ve tiah theih a si. Kahdohnak chung ah KNU, Naga Phyu Column, Kya Phyo Column, S.O.G phu hna bawm in an va kah hna hi a si tiah theih a si.
Hpruso Ah Khrihfa Biakinn SAC Nih Bom A Thlak; Kayah ram, Hpruso peng, Thidawku khuate ah kahdohnak um lo pi in SAC ralkap nih biakinn pakhat kahdohnak vanlawng in bom a thlak caah a rawk tiah KNDF nih thawng a thanh.
August 12 zaan sml 8:00pm hrawng ah kahdohnak vanlawng 1 in bom a thlak ruang ah Thidawku khuate ah a um mi biakinn leng ah biakinn tual chung ah a um mi adang inn pawl le hau zong a rawk tiah theih a si.
Cu khua pawng ah SAC ralkap le Karenni phufonh hna karlak ah kahdohnak a chuak i kahdohnak a daih hnu ah vanlawng in bom a thlak hi a si tiah KNDF nih cun a langhter. Kayah ram lawng siloin Chin ramkulh le Karen ram hna zong ah kahdohnak um lo pi in biakinn le biaknak he aa pehtlai mi inn pawl SAC nih bom an thlak i hriamngan in an kah tiah theih a si.
KIO Headquarters Kiang Kahdohnak, Kawl Ralhrang Tlaih Tongmi Chung In A Thimi An Um. KIA Headquarter kiang Kahdohnak a tuah duh lomi Battalion Commander hna chung in hrem biahalnak ah commander ralbawi a thi, non-CDM pawl raltu ding min cazin an lak cuahmah lio tiah theih a si.
KIA Headquarter pawng Nam San Yang khua ah kahdohnak a tuah duh lomi Battalion Commander hna chung in hrem biahalnak ah ralbawi pakhat a thi tiah Kachin Local news pakhat nih a chim tiah People Spring news nih a langhter. KIA headquarter pawng Nam San Yang khua kahdohnak hi July thla hramthok in kahdohnak a chuak cang tiah theih a si.
SAC ralkap lei in kahdohnak a tuah duh lo mi commander LIB 88 kuttang um battalion 12, Battalion 13, Battalion 411, Battalion 37, Battalion 387 ralbawi hna cu Northern Command lei in an rak tlaih hna.
“Raldoh dingin Lamsial an fial hna. Kal duh lo in hnu lei an kir caah nawl ngai lo case in tlaih an ton. Tlaih a tonmi battalion commander hna chungin Battalion 13 commander cu a luan cia ni 4 ah Bamaw hrambunh Military Operations Commands MOC 20-အမှတ် (၂၁) စစ်ဆင်ရေးကွပ်ကဲမှုဌာနချုပ်(စကခ-၂၁) hrem biahalnak ah a thi tiah thawng kan theih” tiah Kachin wave nih a chim.
July 3 ni in Nam Sam Yang kahdohnak ah SAC lei Keralkap bu Battalion 13, 17, 103, 236, 83, 77, 318, 385 phu 8 an rak si natein battalion adangdang an hun chap than tiah theih a si. July 13 ni ah Kachin Northern Commanders Major General Ko Ko Maung, Deputy Commander major General Ko Ko Maung, Deputy Commander Brigadier Aung Myo Oo, Colonel Aung Kyi Lin (Border Affairs Minister), Hpakant Camp Commander le Officers-2 cu Nay Pyi Taw lei in an rak tlaih cang hna.
Nihin Kachin ramkulh in Myanmar ram pumpi ah nifatiin kahdohnak a um i SAC ralkap an thazaang a der ngai ruang ah Non-CDM pawl raltu ding in min cazin an lak cuahmah lio a si tiah People Spring news nih a chim.
Karenni Kahdohnak ah Ralhrang Battalion Lutlai Telh in A thimi an tam. Karenni kahdohnak ah Kalaw hrambumh Battalion 3 Commander Lt. Colonel, Deputy Commander telh in Mi-16 le Battalion 112 Ralbawi le a ralkap 14 an dihlak ralhrang 30 an thi tiah theih a si. Karenni kahdohnak August zarh hnihnak ah Kalaw hrambumh Battalion 3 Commander Lt. Colonel, Deputy Commander telh in ralkap 16, Battalion 112 ralbawi le a ralkap 14 an dihlak ralhrang 30 an thi tiah SAC Eastern Command nih a chim tiah Khit Tit Media nih a langhter.
Kalaw hrambunh Battalion 3 commander, Deputy Commander 2 le an ralkap 14 fonh in mi 16 an thi. Cun, Kalaw hrambunh thiamthiam battalion 112 ah ralbawi telh in ralkap 14 an thi ve. A thimi ralkap 30 le battalion cu LIB 55 kuttang um an si hna.
Shan ramkulh a ummi SAC ralkap pawl cu Karenni ramkulh chungah operation an hun tuah. SAC lei nih an tlik tak mi sakhan hna lak than ding in Keralkap, Tilawng ralkap, Vanralkap phu fonh in Karenni ram lei ah an rak kai ngai tiah theih a si. Credit: The Chinland Post