CDM i aa telmi Cozah Riantuan hna bawmhnak kongah

CDM i aa telmi Cozah Riantuan hna bawmhnak kongah
=================
Atulio ah CDM i itel ruangah Cozah riantuantu tampi, zung a kai tilomi tampi an um. Kawlrampi hup in zeizat an va si hnga, milu millions tluk an si lai. Chin State huap in thousands an si ve lai. Bawmhnak hi pumpak, hawikom rual, bu ngan he bu hme he an kawl cio. Kawlrawn lei hi international in bawmhnak a rat caan ah Tlangcungmi kan hmun ah a phan tawnlo. Cu caah CDM bawmhnak ahhin kanmah Chin State chung bawmhnak ah kan cawlcangh ve a hau. Asi khawh ahcun kanmahle Myone (Township level) cio in, ramchung ramleng ikop in committee tuah ahcun a thabik. Kawlrawn cu mirum le ramleng ummi Kawlmi nih fund biatakte in an kawl caah an harsa lai ka zum lo. Kanmah Chinmi nih va bawmh len hna dingah a hau in ka hmulo. (Mahle hmuhning ruahning cio asi i mu).

Bawmhnak pek tik ah a biapibikmi ah ka ruahmi cu Hakha Khualipi hi asi. Aruangcu; Cozah zung (Departments/ Ministries) vialte aa funnak khuapi asi. Cozah Departments/Ministries vialte hi Township Office an um, District Office an um, State Office an um caah milu an tam khun. Tahchunhnak ah; atu Hakha i Chin State GAD Office lawng ahkhin riantuantu staffs 250 leng an um ti asi. Hakha District GAD Office ah tamlak an um rih lai. Hakha Township GDA Office ahkhin an va tamtuk rih lai. Cubantukcun departments dangdang ; Health, Education, Taxation, Audit, Municipal, Fire Brigade, Roads & Constructions, Immigration, Banks le a dangdang tampi a um rih. Cozah offices vialte a hme he a ngan he 70 leng a um. Cu caah zung riantuan hi an tam kho taktak ti hngalh khawh asi.

State Khualipi asi i, office hi hmun 3 (Township, District, State) lengmang ah a um caah; Kawlrawn, Chin state chaklei thlang lei, le khuate kip in zung an rak kainak Khualipi asi. Hakha khuasa an si hna lo caah, tam-u cu Cozah pekmi hostel ah an um hna. Cu hna pawl cu CDM ah an itel caah Cozah Hostel ah umnak nawl an ngei tilo. Minung 300 tluk cu an si lai ka zumh. Hinak tam an vun itel chap rih ahcun an tam chinchin rih lai. Salary (thla hlawh) loin an si, chungkhar he khuasak an si fawn hna caah harsa ngai, lungre thei le vansang in an um hna. Hibantuk an harsat lai an zenh ruangah CDM ah an itel ngamlo zong asi. Sizung riantuantu hna zong CDM ah an itel caah Free Clinic an tuah i cu zongah cun; sii-ai le a dangdang in bawmh an herh tuk rih fawn. Nifatin lam zawhnak ah herhhai le chawva leiin tanpi an herhtuk fawn!

Vun funtom ka duhmi cu; Mahle Township cio in ramchung ramleng committee iser cio seh! Fund kawlnak le bawmhnak tuanvo ila cio seh. Thantlang cu an tuah cang. Ramleng lei i Bu ngan deuh hna nih fund kawlmi hi cu Hakha Khualipi ah papek siseh! A cunglei ah tam ngai ka langhter cang. Hakha cu zumhtlak mino, pastors le bochanmi khuanu khuapa hna in committee an ser cang. Ramleng ramkip zongah pehtlaih ding minung (contact persons) an ngei cang. Sangkip zongah mino hna nih runvennak tuanvo an lak. Free Clinic zong a um cang. (Ralkap chungkhar lila hmanh nih an panh hna). Himnak (security) ruangah lenglang in cathanh le min langhter an hun hrial rih! Hibantuk caan ah kan sining cio i hman in, kutsamh cio hram ko hna usih! Credit: Ram Tinthei