CDF – Mindat Nih palek 6 le SAC ralkap 2 an thah hna, CDF pasaltha pakhat nunnak a liam!

CDF-Mindat nih palek 6 le SAC ralkap 2 an thah hna, CDF pasaltha pakhat nunnak a liam
================
Chin Ramkulh, thlanglei Laitlang Mindat khuapi chung ah CDF pasal tha hna nih SAC ralkap minung pahnih le palek minung 6 an thah hna i, CDF pasal tha lei in minung pakhat a nunnak a liam.

2021 September 19 zing suimilaam 11:00 hrawng ah CDF nih palek pawl umnak ah an va fuh hna i, atu bantuk in an kah hna hi a si.

Cun, CDF pasal tha hna lei in a nunnak a liam mi hi, raltuknak hmun ah kal an i thawh lio ah SAC lei he ruah lo pi in an i tong i kahdohnak a chuak. Kaphnih kahdohnak a chuah hnu ah a nunnak a liam hi a si tiah kan theih.

Thantlang kahdohnak ruang ah khua mi an zaam, khuahngak zong zaam dih ding in thawng an thanh. Chin Ramkulh, Thantlang khuapi chung ah hmunhma a laa i khuami hna ralphaw ah a hmangtu SAC ralkap le tangti unau CNA le CDF hna he September 7 hnu kahdohnak a chuak i, khuami 1 million leeng an zaam cang lawng si loin a taang mi zong khua chuah tak ding in nawl an chuah tiah thawng kan theih.

An zaamnak kong he pehtlai in khuami pakhat nih, “Kan zaam lai lo tiah kan rak I timh mi bak a si ko nain, kan dirhmun nih a pek ti lo ca ah kan zaam a hau cang ko. Meithal le bomb an duh ning poh in an kan hman hnawh tik ah hliam a tuar mi inn a rawk mi tampi a um. Kan dirhmun hi rak kan theihthiampiak ve hram uh.

Nunnak cu a sunglawi tuk mi a si, kan inn le lo tu cu a rawh than zong ah kawlhawl khawh than a si. Cu a si ca ah nunnak him nakding hmun ah kan zaam ve hi a si,” tiah The Hakha Post ah a chim. Cun, atu khuahngak ah a taang mi khuami cheukhat hna zong zaam dih ding in thawngthanhnak le tlangaunak an ngei tiah theih a si.

Zaam dih ding timi kong ah, “Nihin September 20 thok in Thantlang cu kan chuah tak dih ko cang lai e. A dam lomi le tarnu tarpa kan fimtawl khawh in kan zam ve cang lai. Thantlang khua mei niih a kangh lo nakding tu thla rak cam cio ko u tiah,” Thantlang khuanu khuapa Chairman Pu Lawm Bik nih a Facebook cahmai ah a langhter.

NUG nih D-Day a thanh September 7 hnu Thantlang khuapi chung ah kahdohnak le tlerhkhawnnak nifatin zaan fatin a chuak. SAC ralkap lei kut in khuami hliam a tuar mi le nunnak a liammi zong tampi an um cang.

Breaking News; CNA Le CDF – Thantlang Hriamtlai Phu Nih Ralhrang 30 Leng An Thah Hna! September 18, 2021 ni ah Chin ramkulh, Thantlang khuapi chungah ralhrang mithah phu le CDF/CNA hriamtlai phu karlak ah kahdohnak a chuaknak kong cu CDF – Thantlang nih cathanh an hun chuah cang. Thantlang khuapi chungah zing suimilam 10:00 to zanlei suimilam 4:00 tiang kahdohnak a chuah, tiah thawngtheih a si.

Hi kong he pehtlai in CDF – Thantlang le CNA hriamtlai phu hna nih ralhrang mithah phu cu minung 30 leng an kah thah hna, tiah an tarlangh. Cun, CDF- Thantlang le CNA hriamtlai phu lei in hliamhma a pu zong pakhat hmanh an um lo, an him dih, tiah thawngtheih a si.

Ralhrang mithah phu lei nih Thantlang khuapi chungah mipi pawl harnak nan pek rih hna i, zan ah innkip luhhnawh i, checkhlaitnak nan tuah peng rih ahcun CDF – Thantlang le CNA hriamtlai phu nih fakpi in kahdohnak kan i tuah rih hna lai, tiah ralrinnak an pek chap hna.

MAH Ralkap a doh tu vialte le kan Chin Ralkap hna PATHIAN nih in tthawnter hna selaw ral tthat nak le tei nak he lam inhruai ko hna seh, thla kan in campiak ko hna. Bawipa nih tei nak he lam an hruai peng ko hna seh thla kan ni cam piak peng hna.

Zekhariah 2:8b “Nanmah an tawngtu hna cu anmah an mit falai aa tawng mi an si”. CDF Thantlang, Bawipa nih in dirpi camcin ko hna seh law. An ci mit ter thluh law2 seh. CDF Bawipa in lo kil him in lo bawm hai hramseh.

Thantlang ah Inn 19 a Kaang, Pastor Pakhat Nunnak Liam. Nihin zaanlei ah Thantlang SAC ralhrang nih bomb le meithal in khuachung an kah ruang ah inn 19 an kaang i, pastor pakhat a nunnak a liam, tiah Thantlang upate sin in thawngpang kan theih.

“Inn a kaangmi zapi hi inn 19 a si. Bokyok lam lei hi kan hmih khawh. Thlanglei Bangla lei a kaangmi zong a dang inn a tlai ti lo,” tiah pastor pakhat nih The Chin Journal ah a chim. Thantlang khuachung ah inn 19 a kangh pin ah meithah ding in aa thawhmi TCBC pastor Cung Biak Hum cu lampi ah SAC ralhrang nih an kah i a nunnak a liam.

Pastor Cung Biak Hum cu motorcycle in a kal lio ah SAC ralhrang nih a ttang le a baan ah an kah hi a si. “A ruak cu kan lak i an inn ah kan phakpi cang,” tiah a cunglei pastor nih a chim chap.

Thantlang SAC Ralhrang nih Pastor Cung Biak Hum an Kah. Thantlang innkaang meiphalh ding in aa thawhmi TCBC pastor Cung Biak Hum cu Sianginn sang lampi ah SAC ralhrang nih an kah i a nunnak a liam, tiah Thantlang upa sin in thawng kan theih.

Meithal kuan nih a ttang le a baan ah an khen i a hmun ah a nunnak a liam. Pastor Cung Biak Hum hi awttha Sui Tha Par vapa a si. Fa pahnih an ngei i, a nupi hi pumlawnglo in a um lio zong a si.

A ruak cu Thantlang pastorte hruainak in an lak i an inn ah an kalpi cang, tiah ttuanvo ngeitu pastor pakhat nih The Chin Journal ah a chim.

Thantlang Inn 15 Leng a Kaang Cang Lai tiah an Ruahdamh. SAC ralhrang nih an kahmi bomb le meithal ruang ah nihin zaanlei sml. 3:30 hrawng in Thantlang khuachung Bangla sang ah inn an kaang i atu tiang ah inn 15 leng a kaang cang lai, tiah an ruahdamh.

Thantlang pastor pakhat nih, “Atu hi a kangh cuahmah lio a si. Sianginn sang First Line lei hi inn pakhat kan tthehpiak i, hnangam deuh a si. Bangla lei hi a kaang cuahmah i khika lei cu zoh awk a ttha hrim lo, a kaang cuah mah ko,” tiah The Chin Journal ah a chim.

“Inn 15 leng a kang cang lai. Cu lak ah cun Bangla sang i a ummi Pyidaungsu Yeihta (ပြည်ထောင်စုရိပ်သာ) zong a kaang cuahmah ko,” tiah a chim chap. Inn zeizah dah a kangh ngaingai timi The Chin Journal nih fehternak kan tuah kho rih lo. Inn a kangh biknak Bangla sang lei hi funhpanh ngam a si rih lo.