CDF-KKG Kahdohnak Thawngpang Update Thar

CDF-KKG Kahdohnak Thawngpang Update Thar
========
Kalay peng thlanglei, Yangkyiaung khua ah a ummi ralhrang phu sakhaan ah mipi rungveltu tuah dingin thawngpang theih a si.

Kalay peng chung Tanbu khua pawng YanGyiAung khua ah umnak sakhan tuahtu nawlngeihnak latu Min Aung Hlaing ralhrang ralkap rual cu mipi vengtu hriamtlai phu fonhmi nih Febuary 12 zinglei sml 1:00 ah luhhnawh in an kah. Ralhrang ralkap sakhan a rawh dih pinah hliam tuartu zong an tam tiah CDF-KKG nih cathanh an chuah.

February 13, 2022 ni ah Min Aung Hlaing ralhrang phu nih mipi pawl cu nithum chungah tlam nan tling te lo ahcun khua ningpi in mei kan khangh dih lai, tiah thitphaihnak an tuah hna. February 6, 2022 ni ah ralzam pawl an umnak hmun lei ah hriamngan zong an kah, tiah thawngpang theih a si.

Nihin February 14, 2022 ni ah, Chinland Defense Force-KKG le Chinland Defense Force-Hakha fonh in Yangyiaung khua ralhrang um hmun an khuar mi hna cu tuzing suimilam 6:00 hrawngah an kahdoh hna, tiah thawngpang theih a si. Hi kong he pehtlai in kaphnih karlak kahdohnak hi suimilam 1 hrawng a rau tiah an chim.

Hi kahdohnak ruangah ralhrang lei minung 5 an thi i, hliamhma an pu mi zong an um, tiah theih a si. CDF-KKG le CDF-Hakha hriamtlai phu lei in zeihmanh khawndennak um lo tein hnu lei ah an kir than khawh, tiah thawngpang tha tuk theih a si. Chinland Defense Force – Kalay Kabaw Gangaw.

Mino Hna I Fimnak Le Zuamnak Thawngin Caan Rau Lo Teah Hriamnam Serchuah Khawh A Si Tiah Runvennak Lei Nih Chim!
Generation-Z mino hna i fimthiamnak hmangin caan rau lo ah hriamnam searchah khawh a si tiah NUG cozah i runvennak zung leiah chungtel pakhat U Naing Htu Aung nih a chim. Generation-Z hna i zuamnak le fimthiamnak ruangah kum tampi lawngah serchuah khawh dingmi cu caan rau lo teah hriamnam serchuah a si.

Hriamnam cawknak leiah harsatnak a um hmanhah atu ahcun serchuah khawh a hung si cang tiah U Naing Htu Aung nih NST he tonbiaruahnak an ngeih nakah a chim. Kum khat chungah tlangcungmi hriamtlai phu i tel in chain of command timi tuah khawh a si cang i, hmunkip ah aa then cheumi Local Defence Force hna zong zeimawzat cu hmunkhat ah fonh khawh a si tiah a chim.

Atu ahcun mipi vengtu ralkap dihlak cu zulhphung ningcang tein kan tuah khawh dih cang pinah mipi vengtu hna cu code of conduct zong a hlei in cawnpiak an si cang tiah a chim chih. PDF phu cu an tam tuk i, hmunkip ah an um ko nain SAC ralhrang ralkap he zulhphung kongah tahchun awk um lo tiangin an tha/an ngei tiah amah nih a chim.

Runvennak ministry department nih kahdohnak caah a herh taktakmi minung thazaang cu tlamtling in kan ngei dih cang bangin hriamnam lei zongah zeimawzat tiang cu kan tlamtlin khawh cang tiah amah nih a chim.

Class Chungah NUG Le PDF Huatnak Bia Chimtu Sayama Inn Cu Bomb Puah In Ralrinnak An Pek! Class chungah NUG le PDF huatnak bia chimtu Kata peng sayama inn cu bomb puah hnawh in ralrinnak an pek tiah theih a si.

Febuary 14 zinglei sml 4:00 hrawngah Kata khuapi chung sang (4) nak zawnah a ummi sayama Daw Phyu Phyu Win inn cu a vawikhatnak bikah ralrin peknak in bomb puah hnawh a si. Pehzulh in NUG le PDF huatnak biachim a hmang rih ko ahcun ralrin peknak si ti loin chungkhar ah ngaihchiatnak chuak ding tiangin kan thuat cang lai tiah Katha Underground Revolutionary Force-KURF nih cathanh an chuah.

Pawngkam ummi nih NUG le PDF huatnak biachim lo dingin an thlauh nain duh loin a chim thiamthiam. A chim ngam rih ahcun chim ko seh. Harnak a tong zongah Katha mipi nih a cungah zangfahnak kan ngeih lo ding pinah cai seh tiah kan ti lai tiah Katha khuapi chung sang 5 nak zawnah a umtu pakhat nih a chim.

Non-CDM saya/sayama hna nih pehzulh in SAC ralhrang ralkap kuttang ah rian nan tuan rih ko ahcun theihternak kan tuah ti lai lo i, direct in kan in kahdoh cang hna lai tiah an chim. Sianginn le fimcawnnak zungah riantuantu hna zong tuzing ah ralrin peknak ah bomb an puah hnawh tiah theih a si.

SAC Ralhrang Caah Bawmtu A Simi Paoh Cu Hrial Cio Dingin Mube PDF Nih Forh! Mipi cu ral bantukin kahdohnak le thahnawnnak a tuahtu SAC ralhrang caah bawmtu a simi paoh cu hrial cio dingin Shan ramkulh Phe Khung peng chung Mube PDF nih cathanh an chuah.

Phe Khung peng chungah a ummi mipi hna nih SAC ralhrang ralkap i serchuahmi thilri cawk, zuar lo dingin Mube PDF nih cathanh an chuahmi ahcun an langhter. Phe Khung peng chung mipi hruaitu ပအဖ nih Febuary 3 ah khan cathanh an chuah tikah SAC ralhrang ralkap serchuahmi thilri paoh cu zuar lo ding, cawk lo dingin cathanh an chuah cang i, Febuary 28 hnuin a zuartu le cawtu umti lo dingin ralrinnak an pek.

Pehzulh in a zuartu le cawtu kan in hmuh hna ahcun nanmahle umnak cioah a ummi mipi ralkap hna he i fonhin dantatnak kan in pek hna lai tiah ralrinnak an pek chih. Phe Khung PDF zong nih ပကဖ nih a chuahmi zulhphung hi mipi dihlak nih rak zul cio dingin Febuary zarh hnih nakah zohfelnak ni hnih chung kan tuah tikah mipi leikap zong nih lungtho tein tel an duh cio tiah cathanh an chuah.

CDF Ratnak Ding Lampi Ah Bomb Cu Vawlei Tangah Phum Hratin A Lamh Sual Ruangah Thantlang Ummi ခလရ ၂၆၉ Battalion-hmu Myo Yin Htun Ke Khat Lei Aa Taan! Chin ramkulh Thantlang khuapi ah SAC ralhrang ralkap ခလရ ၂၆၉ battalion-hmu Myo Yin Htun cu Febuary 13 ah bomb a lamhsual ruangah a ke khatlei aa taan tiah CHRO sinin theih a si.

Cubantukin bomb puahnak kong he pehtlai in CHRO nih thawngpang fehter kho dingin aa zuam liopi a si i, Yangon Khik Thit nih fehter kho dingin kan i zuam ve. CDF ratnak ding lampi ah bomb cu vawlei tangah a chiah i, amah lila nih a lamhsual tiah CHRO nih a langhter. Battalion hmu bomb nih a puah sual ruangah a kuttang ralhrang ralkap nih Thantlang khuapi chungah a ummi inn cu a vawi (25) mei in an khanghpiak than tiah theih a si.

Thantlang ah umnak sakhan tuahtu SAC ralhrang ralkap nih mipi nih an kaltakmi inn chungah bauh in an lut, thilri an firpiak hna pinah mei an khanghpiak ruangah mipi vengtu CDF he atu le atu an i kap lengmangnak a si. SAC ralhrang ralkap i meikhanghnak ruangah Thantlang khuapi chungah a ummi inn a tam deuh cu mei nih a kaang dih cang. Credit: The Federal Times