CDF kan pasaltha le an kal sual cang e!!

Kan Tum Ram Ah Federal Kalpi Awk Ah Democracy Kalpi Mi Ah Fascism Asi Sual Maw? (Catialtu Joseph R. Thang) Na Rel Dih Lawngah Na Fiang Lai!!
===========================
Democracy sullam hi tampi aum ko lai. Democracy cu Power From People & Majority Vote timi 2 hi i ruah tuah hna usih. Lai holh cun Mipi nawlngeihnak le Tam deuh duhnak in biachah in khuakhan Lairelnak ti asi lai. Federal ram ah lut awk ah Democracy phunglam hi hman ah a tha bik. Democracy cu Greek Holh in a ra mi asi. Demo (Mipi) + Kratos (Uknak) ti asi. Demokratos cu Mirang holh in Democracy ti asi.

Mipi duhning in uknak tinak asi. Power from the People – Mipi sin in uknak le nawlngeihnak cu a ra. Mipi sin ah pennak aum tinak asi.
Kawlram, Chinram, CDFs ukhruainak, Pengtlang bu le Khuaram ahcun biktaling in Democracy cu kan hman. Power From People timi kha Power To People tiah kan thlen. Mipi cung ah Power ngeih ngai in kan LAL hnawh hna. Mipi nih celh lo ding le huattlai tiang in Mipi cung ah Power le nawl kan ngei. Cucaah nan sin ah Democracy aum lo, Fascism timi Ralhrang ziaza lawng aum. Federal he cun nan i hlat tuk rih.

Mipi nih uktu cu anmah duhmi an thimh lai tiah Democracy nih a ti. Cheukhat CDFs nih nanmah nih nan uk hna, asilo le nanmah duhmi tu kha Khuabawi le bawitlang ah nan thimh hna. Nan tlau cang. Federal lei ah Democracy in kalpi loin, khoika lei ah dah kalpi nan kan timh? Federal le Democracy cu kan ram ah len ter ding asi nain, Fascism (Fascist) tu nan len ter, pangpar bang in Fascism nan par ter cang. Khuabawi nih khuami cu biaceih loin CDFs nih biaceih asi cang. Kalsual asi ngawl cang uh. Ziaza le phunglam thlen cang uh.

Democracy cu Tam deuh duhnak (Vote) in biachah asi, Khuakhan Lairel asi. Cucu Direct Democracy an ti. Minung 5000 – 10000 karlak ah hmangrua asi. Pengtlang, Khuaram le CDFs ukhruai nak cu Direct Democracy hi kan hmang awk asi. Senthang le Zotung ah CDF phu hnih ah an um hi tamdeuh duhnak an zulh lo caah asi. Meeting ah tamdeuh nih an tei hna ahcun AMEN le YES ti khawh hi Democracy asi. Global Senthang Meeting ah CDF Hakha he i fonh siseh timi nih vote a tei.

Federal ram ah lut pi tu ding le Democracy in hruaitu Mino kan si ko ahcun, bu dang siam ding kan si ti lo. Federal le Democracy mumal le dundan a ngeih lo mi kan si mi le Fascism kan si kha kan i phuang bia asi. Global Zotung Meeting biachahnak le vote a zulh duh lomi Supreme Council – Zotung Organization zong hi Fascism nan si. Fascism le ralhrang ziaza kha kal tak uh law Bukhat ah i fonh cang rawh uh.

Khuaram, Krifabu le Zatlang nun ah rualremnak le pumkhat sinak aum khawh lo mi cu kanmah / Keimah bia in biatlu seh kan ti i. Mipi tam deuh duhnak kha zulh kan duh lo caah asi. Democracy kan i fian lo caah asi. Meeting ah vote in kan sungh hnu ah kan i lungsak ti lo, a leng ah kan chuahpi, he chet tiah kan chimrel i mi kan dohhna, cucaah khuaram le Krifabu ah rualremnak aum khawh ti lo.

Democracy timi hi a dik bik tinak asi lo. A hman lo mi le a dik lomi biachahnak zong tampi aum ko lai. Tamdeuh duhnak in biachah asi caah buaibainak a tlawm, rualremnak aum, pumkhat sinak aum, cucaah ram le miphun ah kan thancho i, kan puitling tu khi asi. Mifim cathiam pa, Mirum thli ti khawh pa ruahnak le mipi ruahnak cu van le vawlei bang in aa dan ko lai nain, Mipi nih an duh lo ahcun na bia a nung lai lo. Cucaah pah chih duh ti hlah, Democracy in nan tlau kha i hngalh cang law a tha.

Mifim cathiam le Uktu duhning in a kal khawh lo caah, Greek Mifim bik Socrates nih Democracy hi a huat tuk. Nang zong Socrates btkin Mipi duhnak cu an huat tuk ko lai nain, Democracy asi, Federal ah lutpi tu asi, Na duhlo in na / nan pah chih ko rih ahcun, Fascism kungcung hmin bak an / nan si lai. Ram le Miphun dam ter loin a zawt ter chin tu cancer le Virus tu na si deuh cang.

Tutan American (President Midterm election ) thimhnak nih na lung an fim ter ko lai. Tamada nawlngeih nak chakhri tlaih khawh tu Congress le Senate cu an i cuh mi asi. A pahnih in Republican nih tei dawh asi. Democratic Party Tamada Joe Biden duhning in thil pipa cu a kal ti lai lo tinak asi. Fianternak; CDF soisel le thangchiat asi lo. Federal, Democracy le Fascism hi then thiam hna seh, an ziaza le policy thlen hna seh, Politician puilting si ve hna seh, timi saduhthahnak lianpi he asi.

American President Joe Biden Nih SAC Ralhrang Sinah Nawlnak A Tuah Mi Cu Tlangcung Hriamtlaih Remdaihnak Min Thu (PPST) Phu Nih An Cohlang!! ASEAN zulhphung Biatung phun (5) tlamtlinter, hlawhtlinter nak ah SAC ralhrang lei nih i teltum tuanvo lak tti dingin American President Joe Biden nih nawlnak a tuah mi, an cohlan nak kong cu kahdoh daihnak min a thu mi tlangcung hriamtlai phu hna nih an cohlang.

NCA ah minthutnak a ngei mi tlangcung hriamtlai phu hna ii kahdoh daihnak, remdaihnak lei hruaitu phu (PPST) nih ASEAN meeting ah American President Joe Biden nih Myanmar kongkau a chimphuan mi cungah, Atu bantukin cohlannak cathanh an chuah nak hi a si.

ASEAN nih lungtlinh mi Biatung hlawhtlinter khawhnak ah SAC ralhrang lei nih i teltum tuanvo lak tti dingin American President Joe Biden nih nawlnak a thuah mi cu PPST nih an cohlan nak kong le ASEAN Chairman in Indonesia ram sinah thlen nawnnak a tuah mi cu an lomhpi cohlan nak kong zong, an langhter.

Cu pinah Daw Aung San Suu Kyi nih rankhel sining a ruah ning cu NLD (central) Bahu phu hna he tonbiaruhnak nawl ngeih lawngah langhter in chimphun khawh a si lai nak kong a chim mi zong an cohlan nak kong, an langhter. ASEAN Secretary General athar, Cambodian Prime Minister’s Office Secretary a si mi H.E Kao Kim Houm cu rian an khinh nak cungah an lomhpi nak kong le ASEAN rotating chairman Indonesia nih Myanmar buainak cu hlawhtling tein a hmaimilh kho lai, tiah ruahchannak an ngeih nak kong zong PPST nih cathanh ah an langhter.

Paungbyin Pengkulh Ah Chungkhar Khat Thah An Tong!!
================
Saing ramthen, Mawlaik pengkomh, Paungbyin pengkulh, Thayaung (သရောင်း) khuate komh, Tawma (တောမ) khuate, Sikpar ni 15 ah chungkhar khat minung pa 3 thah an ton pinah an inn chungah a um mi thilri a si mi Sui le Phaisa zong a tlau, tiah theih a si. “Tawma khuate ah a um mi U Win Naing, An nu Daw Lae Lae Win le an fanu Ma Thet Thet Mar hna cu an pa 3 in Sikpar ni 14 zaanlei suimilam 9:00 hrawng ah thah an tong.

An ruak cu Sikpar ni 15 ah lak an si.” tiah tualchung mibomchantu pakhat nih a a chim. Cu kong he pehtlai in Paungbyin pengkulh humhimtu phu he aa neihniam mi pakhat nih, ” Tawma khuaah a um mi U Win Naing te chungkhar minung pa 3 hna cu min theih lomi hriamtlai phu minung pa 10 nih an thah hna hi a si.

Cu pinah an ngeih mi thilri Sui le phaisa an fimtawl mi zong a tlau. Rankhel kong he pahtlai in U Win Naing te chungkhar cu an pa 3 tein NLD party chungtel an si. Thawngpang kan theih ning ahcun an fanu Ma Thet Thet Mar sianginn an kai ter ruangah a tubantuk in thah an ton hi a si, tiah kan theih. A hmuh (case) cu zohfelnak an tuah cuahmah lio a si.” tiah a chim.

A luancia mi thla 20 chungah Sagaing ramthen chung Shwebo, Khin-U, Tantse, kalay, Paungbyin Kani, Minkin, Depeyin, Myuang, Sagaing, Myinmu, Kawlin, tbk; pengkulh , khuate cheukhat ah chungkhar 30 nak tlawmlo thah an tong tiah theih a si.

Ni hin Nov-16 ah Rakhine ram, Mawngdaw peng chaklei um Mahyuh Tlanghram i a um mi Gate- Chawng-Myo ti mi khua cu SAC nih chun Sml 12:30 hrawng ah hriamngan ankah mi (3)nih thlak in a puahhnawh hna caah Ngakchia rel chih in minung (10) an nun nak a liam leng ah (27) hliam an tuar tiah theih a si.

“Nihin ah hriamngan thawng theih a si le cang ka khuami hna cu mah le inn cio chuahtak in hmunkhat ah ipum in kan i dor hna nak ah hriamngan kuan nih tlak in thi le hliam um hi a si”, tiah tualchung mi pakhat nih a chim. Hriamngan tlaknak ruang i a thi mi tualchung mi hna cu U Swe Lin (kum-65) ၊

Ko Min Ya (kum-27) ၊ U Ka Tui (kum-30) ၊ Ko Cawh Aung (kum-25) ၊ U Sine Hla Mg (kum-35)Mg Nai Wan (kum-5) ၊ U Sin Hauh (kum-60) ၊ Mg Kat Pho (kum- 15) ၊ Mah Swe Seing (kum-6) ၊ U Khine Mg Kyaw (kum-55) hna an si tiah theih a si.

Hi khua hi inn (63) um nak khua a si i a taang mi mipi hna cu hmunhim fuk in an zaam hna ,hliamtuar mi minung (27) cu Cingchawng sii inn le Mawngdaw sii inn fuhpi an si tiah theih a si. Tu lio dirhmun ah cu ka pawngkam cu kahdohnak a um lo leng ah hriamngan hi khua zei in dah an rawnkah i apuah ti hi an theih khawh rih lo nak khuami pa khat nih cun a chim.

SAC nih Mon ram ,Tathung peng Win Sein ti mi khuate cu an ralbawi Bohmu Chit Win Tu telh in ralkap (3) Nov -10 ni zing Sml 5:30 ah thanh an rakton ruang ah teirul cham phun in nihin nov-16 zing Sml 10 hrawng ah raltuknak thirphaw motor -2 le ralkap phor tu motor (10) he luhhnawh in ralser nak an ngeih hna tiah theih a si.

Khua mipi hmuitinh in hi SAC nih ralser nak an tuah mi kong ah mipi lei aikhawngdeng le thi le lo an um le um lo bel theihfian a si rih lo.

SAC Ralkap Nih Hriamngan An Kah Caah Ngakchia Pakhat A Nunnak A Liam, Minung 8 Hliamhma An Pu, Demoso peng ah SAC ralkap nih hriamngan an kah i, inn pakhat cungah a tlak caah kum 5 tluk ngakchia pakhat a nunnak a liam, minung 8 hliamhma an pu, tiah Demoso PDF nih cathanh an chuah.

Zeihmanh kahdohnak um loin Demoso peng Ngwetaung ah umhmun a khuarmi SAC ralkap Battalion 102 nih, 120mm hriamngan in voi 9 nak tlawm lo an kah caah nizan November 15 zanlei sml 6:00 hrawngah Demoso peng nitlaklei ah hriamngan kuan lung 5 a tla i, chungkhar minung 9 an umnak a khen caah an inn cu a rawk dih, tiah an langhter. Kum 5 ngakchia nu pakhat cu a hmun ah a thi colh.

Hliamhma pumi hna cu an thlopbul cuahmah hna. Cu chungah bawhte pakhat zong aa tel, tiah theih a si. Cu pinah SAC ralkap nih ralhrialmi an umnak khua pakhat zong hriamngan in an kah caah biaknak lei he aa pehtlaimi inn telh in khuami inn cheukhat zong an rawk, tiah Demoso PDF nih cun an langhter.

SAC ralkap nih kahdohnak zeihmanh um loin hriamngan atu le tu an kah caah biaknak he aa pehtlaimi inn, ralhrial an umnak le tualchung mi inn le lo a khen hna caah an rawk ngaingai, tiah theih a si. A luancia November 13 lio zong ah Loikaw peng Konesut(ကုန်းဆွတ်) khua chungah SAC ralkap nih hriamngan an kah caah naupawi lio nu pakhat le tualchung mi pakhat hliamhma an rak pu cang. November thla chungah SAC ralkap hriamngan kuan in Karenni rammi 20 leng hliamhma an pu cang, tiah theih a si.

Trump Nih 2024 Ah President Kaa Cuh Lai Tiah A Thanh Cang, US President hlun Donald Trump nih 2024 US President thimnak ah kaa cuh lai tiah tuni, November 15 (Tuesday) ah a thanh cang. Trump nih cun Florida i amah inn Mar-a-Lago ah “America cu a rak kir ṭhan cang, atu ah thok usih (America’s comeback starts right now)” tiah a chim.

Cu lawng si loin “Mah hi a donghnak a si lo ti kan theih. American mi hna chunmang tlamtlin nakdingah kan i zuamnak a thok lawng a si rih. America ram ṭhawnter ṭhan dingin tuzan ah US President thimnak ah kaa cuh lai ti hi ka phuan” tiah a chim.

Buthidaung SAC Brigade 22 kuttang ralkap pawl AA nih bom an puah hnawh hna, Rakhine ram, Buthudaung peng, Hngatpyawchaung khuate hnulei ah a um mi SAC Brigade 22 kuttang ralkap pawl cu November 15 zinglei ah AA nih bom an puah hnawh hna i kaphnih karlak kahdohnak a chuak, SAC ralkap a thi mi an um tiah AA lei nih an chim.

“November 15 zinglei ah SAC ralkap pawl bom puah hnawhnak a um. SAC ralkap lei in a thi mi an um. A thi mi cazin bel a fiang in kan thei rih lo” tiah AA biachimnak nawl a ngeitu Khine Thukha nih Western News ah a chim. Maungdaw peng chaklei, Watcing khua chaklei November 14 chun sml 12:00pm hrawng ah SAC kuttang Brigade 77 chungtel pawl le AA karlak zong ah kahdohnak a chuak tiah theih a si.

Tanintharyi ah SAC ralkap voi 2 an kah hna i 9 an thi, Taninthary peng ah SAC ralkap pawl cu Myeik peng – PDF nih Nov 15 zinglei ah voi 2 an kah hna i SAC ralkap lei in a thi mi an um tiah PDF-Myeik battalion 2 nih a thanh. November 15 zinglei sml 6 hrawng ah Myeik peng -PDF battalion 2, Company 1 le Taninthary Guerrilla phu hna nih Taninthary peng, Mawṭung khua hnulei ah SAC ralkap LIB 557 le 558 hna an kah hna i SAC ralkap 6 an thi i 6 an i hliam tiah theih a si.

Cu kahdohnak ah PDF phufonh lei in hriamtlai 1 a ban ah kuan nih a khen i aa hliam caah an kir ṭhan tiah theih a si. Cu ni zinglei sml 8 hrawng ah Taninthary peng, Bawdikan khua hlei pawng ah SAC ralkap pawl cu Myeik – PDF phufonh hna nih an kah ṭhan hna i kahdohnak chung ah SAC lei in 3 an thi tiah an thanh.