CDF hi Zuu an rii zungzal an ti, zeitindah nan si e? tiah kan naupa pakhat ka hal!

CDF hi Zuu an rii zungzal an ti, zeitindah nan si e? tiah kan naupa pakhat ka hal!
===========
CDF hi Zuu an an rii zungzal an ti, zeitindah nan si e? tiah kan naupa pakhat ka hal I tihin a ka leh”Ka upa cangvak, fikfa, khuasik le nganfah ka tuarmi hi cu um ko rihseh, kan lungre a theih tuk tawn, kan li a leng tuk tawn, khua faktuk in kan i ruah sual tawn i zaan ah kan i hngilh kho tawn lo caah kan philh deuh nak dingah asi e.

Kan din zongah zaankhat ah minung 5 ti bantuk tete in a ding dingmi le ding lo dingmi kan i thiah hna e, rian tlolh hi kan duh hrimhrim lo” tiin a ka leh i ka rak halmi hmanh kai chir! An mawh loh ee, Zu duh ruah i din cu si lai ka zum loh Kan mah nih kan ton loh mi hi hehtiah mi vasoi rai si hlah.

An diinmi lawng a hmu mi an um cuh…a harnak liangluang khi zu hraikhat nih a phenh dih cuh…Ramlak i zaan khat te khuasik laki va riah hmanh aa tiim duh lomi le nunnak thaapin aa pe mi hna hi cuai thlai tlaak hmanh a si lo eh. CNA -CDF har ton can ruat lo hmu lo in…. thangchiat long chim aa zuam tu cuh doh si ve seh.

CDF-KKG sin ah Matupi ralkap Captain pakhat hriamnam he CDM a tuah. Matupi hrambunh Ralhraang Tactical Command ah Captain rian a tuan i, atu caan karlak Monywa ah rian khinh chung mi Captain Kaung Thu Win cu uknak chuttu kuttang ah riantuan ka duh ti lo ti in hriamnam le kuanzen tling he 2021 December 23 ah, CDF-KKG (Chinland Defense Force – Kalay Kabaw, Gangaw) sin ah i ap in CDM a tuah.

Captain Kaung Thu Win cu a voi 52nak DSA (Kawl ralkap sianghleirun) chuak a si i, a pumpak number cu ကြည်း ၅၅၇၂၅ a si. Uknak chuttu Ralhrang Council nih rammi zapi cung an tuahsernak thalo a duh lo i, CDM a rak tuah mi Captain Kaung Thu Win le a chungkhar cu CDF-KKG nih laksawng tangka an pek hna hnu ah himnak hmun ah an thlah hna tiah CDF-KKG sin in theih a si.

Hakhalay ah SAC Ralhrang nih an Thahmi “Pu Tin Thang” Ruhro pawl Khor chung ah an Hmuh. Aluancia December 29 ah Kalay peng, Hakhalay khua ah SAC ralhrang pawl an rak phak lio ah Pu Tin Thang (60) zong an rak thah i, a ruhro pawl cu nihin January 9 ah khor pakhat chung ah an hmuh, tiah thawngpang kan theih.

Pu Tin Thang i hringtu a nu (kum 80) zong Hakhalay khuachung ah SAC ralhrang nih a phei ah an rak kah i December 30 zinglei ah a nunnak a rak liam. An nufa in SAC ralhrang nih December 29 ah an rak kah hna hi a si. Pu Tin Thang i a ruhro pawl cu khuami nih ttha tein an fimhlawn i nihin ah thlan an thlak, tiah thawngpang kan theih.

Matupi Ah Ralhrang Nih Minung 9 an tlaih i an thah mi ah Mara 2 an i tel ve! kanmah Mara mi 2 zong Matupi ah Ralhrang nih Mi 9 an tlaih i an thahmi hna lakah an i tel ve ti a si. A poi tuk. Kawl ralhrang hi kanmah nig kan doh hna lo zongah anmah nih an duh paoh in an kan tuahto lai i an kan thah lengmang ko lai. Hi ralhrang ram ah mizei rammi nunnak hmanh a him lo. Mah ruangah pengtlang kip nih doh le kah bak ding an si.

Matupi ah SAC Ralhrang nih an Thahmi hna Minung 3 Tiang an Fehter Khawh, Ngakchia Pakhat aa Tel. Matupi peng ah SAC ralhrang nih an tlaihmi hna minung 9 lak ah minung 3 an thah hna, tiah atu tiang ah an fehter khawh. January 7 ah Matupi ralzaam minung 9 cu SAC ralhrang nih an tlaih hna i lamhmuhsaktu ah an hman hna hnu ah thah an ton hi a si.

Matupi khuami pakhat nih, “Atu tiang ah minung 3 thah an tong tiah an chungkhar hna sin in kan fehter khawh. A dang zong hi thah an tong ve kho tiah kan zumh. Asinain, kan fehter kho ngaingai rih lo,” tiah The Chin Journal ah a chim.

Atu tiang ah SAC ralhrang kut in an nunnak a liam tiah an fehter khawhmi hna cu: (1) Pu Tui Dim (55), (2) Salai Steven, (3) Pa Le Nang (13) hna hi an si.

Kawl Ralkap Kut in CNF/A Upa Pu Tui Dim A Thi! Chin National Front/Army (CNF/A) ah caan sau riantuan cangmi le miphun caah kum sau a pumpemi minthatnak CNF nih pekmi Pu Tui Dim cu Kawl Ralhrang kut in thi tiah theih a si. Pu Tui Dim hi 1989 ah Chin National Army (CNA) ah a rak lutmi a si i 2007 kum dih tiang CNA ah caantling a tuan mi a si. CNF bel ahcun, a nunnak a dih [January 7] tiang a tuanmi Chin miphun pasaltha pakhat a si.

CNF/A an tuanbia hlun le cawlcanghnak kong tial tawnmi upa pakhat nih, “CNF hruainak in Government of Chinland (GoC) chan lio ahhin, Home Ministry ah Asst. Secretary siseh, Chin Human Rights Organization (CHRO) ah Chairman siseh, Khonumthung News ah tlaitu le editor hna a rak tuan mi a si” tiah a tial.

CNF Vice Chairman Dr. Lian Hmung Sakhong nih Pu Tui Dim a thihnak kong he pehtlai in mirangca in a pumpak Facebook ah hitin a tial; “Pu Tui Dim, the CNF Hero!, Chinland, Chinram, Chin miphun ca lawng silo in, Ramkomh Kawlram ah Federalism, Democracy le Human Rights a um khawhnak hnga caah nunnak pemi. Ka Hawi, Rest in Peace!”

Hi kong he pehtlai in, a thih thawngpang thanh hlan ahhin, January 6 zingka CDF Matupi, Zotung le Lautu bawm in ralhrang kahdohnak a um hnu ah, Kawl ralhrang ralkap nih minung 7 an tlaih hna tiah CDF Matupi nih January 7 ah cathanh a chuah. CDF Matupi cathanh ning ah, khuami 7 an si tiah a tial, zei bantuk dah an si timi fiang in a langhter chap mi a um lo.

Chin Human Rights Organization (CHRO) nih “minung 7 tlaihmi hna chung ah a telmi a si lai tiah ruahmi minung pakhat a ruak hmuh a sinak kong cu January 8 ah a thanh. A tangmi minung 6 ca zong ah thinphan a sinak kong a langhter”.
Kawl Ralhrang nih Matupi peng Kihlung khua an luh hnawh lio ah, an tlaihmi hna lak ahhin nau ngeika nu pathum le kum khua upa an i tel. Fekter rih lomi thawngpang hlat khawh ning ah, Kawl ralkap nih khuami an tlaihmi hna cu Ralvennak (human shield) ah an hman hna tiah, CHRO nih cun a thanh chih.

Pu Tui Dim hi mitha, midai le holh tlawm a si, nain diate in mi capo hmang le a thiammi a si. Kawl Ralkap nih, nawlngeihnak hramhram in lak an timh thawkka lio ahkhan, Kawl lei in siseh, Laitlang chung siseh, NLD chungtel pawl tlik a haumi le zaampi a haumi hi Camp Victoria lei ahhin amah pumpak bak nih a rak ratpi hna, ramri lonh in Mizoram lei tiang ah a kalpi mi hna a si, tiah thil sining theihmi pakhat nih a chim.

Cuti Mizoram lei ah zam ding a bawmhmi a hawi pakhat nih, “Ka Kawi Pu Tui, Kan kawifa in saduh kan thahmi cu ka rak pehzulh ko lai eee. Ka pa nih kan kawifa in a kan bochan tuk i a thlacamnak ah a kan philh bal [lo] eee… Camp Victoria ah caan saupi um awk that lo caah kan chungkhar hnih in Tio ral kan peh lio i, kan i ruahmi cu kan tuah veve ko ee…” tiah a tial.

“Covid Lockdown ruang ah caan saupi kan i tong lo nain messenger in bia kan i ruah tawn kha ka philh lo eee. Kawi, caan sau rau in ka tlung lai tiah na ka chimh kha a tu hi maw si hnga? Kawi, nang cu Miphun caah nunnak thap in rian na tuanmi cu kan hmaihngalpi tuk ee. Nain ka celh lo eee. Techinfapar chan tiang uknak tha pennak tha a chuah hlan lo tiang na neh hnu cu na tuan hawi hna nih kan rak zulh ko lai…” tiah a pumpak Facebook ah ngaichiatnak a hlawimi cu hmuh khawh a si.

Pu Tui Dim cu CNF in Khonungthum Media a tlaih lawng silo in, a dangdang media cawlcanghnak tete ah mino he a teltummi a si tik ah, media riantuan a hawile cheukhat nih an lungfahnak, an i zumhlonak le an ngaihchiatnak cu an pumpak in an langhter cio mi hmuh khawh a si.

2022 January 6, cacawn nili ni ah Matupi peng Lunghlaw le Kihlung khua karlak ah khuami pawl he an tlai ttinak ah 2022 January 7 ni ah an thah hna tiah a cheukhat nih cun an langhter. Nain, a dang a tangmi an nunnak le an himnak kong zeihmanh theih chapmi a um rih lo.

Cun, Pu Tui Dim hi zeitindah an thih ning a si zong fiang in hngalh a si rih lo, a thi timi thawngpang hi Kawl Ralkap nih tlaih hna hnu in theih hmasa bikmi a si. CHRO zong nih, ruak pakhat lawng hmuh a sirihnak le a dang a tangmi caah thinphang a sinak cathanh in a langhtermi hmuh khawh a si. Credit: The Chinland Post