Catang nei lo Kawl ralkap le ralbawi bantuk thinlung put le ziaza a neimi, Laimi lakah kan tamtuk

Catang nei lo Kawl ralkap le ralbawi bantuk thinlung put le ziaza a neimi, Laimi lakah kan tamtuk
———————————
Cathiam lo ralkap pawl, ralkap bawi le Myint Aung Hlaing te pawl kan mawhchiat hna le sual kan phawt hna bantuk in anmah bantuk lungput le ziaza a neimi, Laimi cathiam lo le zei huaha thei lo pawl nih duh paoh in politics kongah ca an ttial len ve i an chim len vemi zong khi mawhchiat ve hna ding an si. Laimi (Chinmi) lak ahhin 100 ah zatuak 65 hrawng hi ralkap le ralbawi pawl bantuk thinlung put le ziaza a neimi kan um ve ti khawh si. Ka rak chim cang bang tang 4/5 awng lo ralkap le an bawi pawl nih meithal hmang in an hnak in mifim le mithiam, le catang neimi pawl cu kum 60 leng nawn an kan uk ruangah Kawlram cu a rawk dih cikcek tikhawh a si. Kawl ralkap lungput le ziaza cu Laimi tampi nih kan i cawn ve. Kan i cawn lawng siloin kan thisa chungah a lut dih i kum tampi kan i tthangpi. Cutik ah Laimi lak zongah cathiam lo le tang 4/5 hmanh awng lo le zei huaha thei lo pawl nih ralkap tthalo pawl ziaza cu kan i cawn ve i pastor, catang nei le cathiam le vawlei lei hruaitu pawl zong uk dih nan kan duh/uk nan kan timh/kan cungah nawl neih nan duh tuk. Kan chimmi le kan ttialmi kong zongah hehtiah a phun2 in nan kan ti, bia chiakha le holh dawh lo hmang in. Mah cu Kawl ralkap pawl zia a si.

Kan thiamnak in kan chimmi le kan ttialmi zong zeiah nan kan rel piak lo pinah nan kan upat lo. Hehtiah nan kan volhpamh i thah lai le nawng lai tiang in nan kan ti. Holh dawh lo le holh chiakha a phun2 in ralkap ziaza bantuk in nan kan ti. I tuak ko u law zeitin dah thluachuah cu nan hmuh khawh lai nan lam cu a tluang khawh hnga. Mi volhpamh le duh paoh in mi ti cu ar-hla fungkhat tlaih in nan i tlaih.

Miphun dang cu cathiam le catang nei le hruaitu cu an upat hna i an chimmi an ngaih i an nawl an zulh hna. Mah ruangah an fim chinchin i an thangcho chin lengmang nak a si. Laimi cu cathiam lo, catang nei lo le zei huaha thei lomi nih catang nei le cathiam le hruaitu cu uk nan kan duh i kan cungah nawl neih nan i tim peng. Khoika miphun le ram hmanh ah cathiam lo nih cathiam an uk hna ti kan thei bel lo. Ralkap lungput le ziaza bantuk a neimi, Trump a ttanhtu Laimi nih US politics le Kawlram politics kongah nan i tel tuk ruangah le nan i sawhkalh tuk ruangah US politics le Kawlram politics a rawk dihnak a si cu. Thei huaha lo le mi volhpamh lawng in politics ah a tel vemi pawl cu zeihe dah nan i lawh ti ahcun motor mongh a thiam lomi nih motor a mongh bantuk he nan i lo. Mahtik ah a phichuak cu harnak chungah nan kan tlakpi dih cang.

Ka rak ruah cangmi cu US thimnak ah zei huaha thei lo buin hehtiah Laipawl politics ah nan i tel tuk ruangah thil tthalo pakhat khat cu a chuak te lai ti hi ka zumh cang. Ka ruah ning bantuk tein Myint Aung Hlaing nih uknak a lak taktak ko. Ralkap ziaza le lungput bantuk in US politics le Kawlram politics zongah nan i tel tuk le nan i sawhkalh tuk ruangah US politics le Kawlram politics a buai dih cang. Asinan US ram cu kum 250 nawn Democracy uknak an kal cang tikah Biden le a dirpi tu pawl nih Trump le a ttanhtu misual pawl kutchung in an chanh manh. Kawlram cu democracy uknak leiah bawhte bantuk ceo kan si rih ruangah atutiang MAH le ralkap uknak tthalo kutchung in kan chanh kho rih lo. Kan i zuam cuahmah liopi a si.

Laimi lak zongah catang a nei lo nan degree (boih) a neimi tluk in thil tampi a theimi le mirang holh le Kawlholh a thiammi le politics le upadi kong a thei ngaimi an um ve ko. Nan cu bantuk minung cu hmuh ding an tlawmtuk. Laimi tam deuh cu cathiam lo kan si i upadi kong zong kan thei lo, politics kong zongah kan theihmi a tlawmtuk rih. Asinan hehtiah kan i tel ve kan chim len ve. Mah nih a chuahpi mi rawhralnak lawngte a si ko. Catang nei lo ralkap le ralbawi pawl nih meithal he kum tamtuk an kan uk tikah a sifak bik ramah kan i tel ve cang. An puarhrang i an bohngal tuk fawn. Saram bantuk thinlung put an nei. Fimcawnnak an nei lo i meithal lawng an i bochan tikah midang cungah zaangfahnak le upatnak zong an nei kho ti lo. Hruhru hranghrang in an nung cang. Mah bantuk phun cu Laimi lak zongah kan tampi ve.

Atu zongkhi zoh ko hna u law cathiam lo le catang nei lo, zei huaha lo pawl nih fawh zanttim le zanlai ah anhnak in a bawi deuh le a fim deuh le cathiam deuh pawl cu phungning loin meithal he an tlaih len ko hna khi. Zeitluk ngaihchia le lungrawk dah a si. Kawlram tthangchonak ding caah hehtiah fak piin rian a ttuanmi lawngte an si. Laimi cathiam lo le zei huaha thei lomi nih pastor, vawlei lei hruaitu le cathiam le catang neimi pawl cu upat thiam hna u sih law an chimmi le an ttialmi ngaih le zulh khawh i zuam ko hna u sih. Kawl ralkap bantuk in volhpamh le biachia kha hman cu ngol cang hna u sih. Nan nu le nan pa nih sianginn kai u tiah an rak in fial len hna lioah nan kai duh ti lo i atu cu facebook ah cathiam le catang nei le a theimi nih ca kan ttialmi hi rel u law a lakka tein fimnak rak i lak ko u/rak cawng ko u.

Zei huaha thei lomi le catang nei lo pawl nih US politics le Kawlram politics an mongh ruangah Kawlram politics cu lungpang cungah a tla cang. Atu hi hehtiah kan dawh lio, chanh kan i zuam cuahmah liopi a si. US politics cu Biden le a ttanhtu pawl nih an chanh manh cang i lungpang cungah a tlakpi tupa a bia an ceih cuahmah liopi a si. Laimi, cathiam lo le zei huaha thei lomi cu politics ah ralring te le fimkhur tein i tel cang hna u. Politics cu a theimi le a cawngmi le a thiammi nih mawng ko hna seh. A thei lomi le a cawng lomi le a rel lomi cu a hnulei te ah i cit sawhsawh ve ding a si ko.

Ralkap cathiam lo le catang nei lo pawl nih meithal he Kawlram politics cu kum 60 leng nawn an mongh ruangah a lamkip in kan rawk dih cang. Cuve bantuk in Laimi cathiam lo le zei huaha thei lo pawl nih uk dih nan kan duh ruangah le politics ah nan i tel tuk ve ruangah kan thangcho lo i kan lam a tluang ti lo hi. Catang nei lo le zei huaha a thei lomi pawl nawl nan neih tuk le nan i thlak tuk ruangah Laimi kan zatlang nun a rawk dih i a lamkip in kan thangcho kho lo. Ka pehtthan te lai. Credit: Saya Van Tum