Canadian raltuk thiam pawl Ukraine vun bawm dingin Poland khuapi

Breaking News: Russia Missiles nih Poland ramri um Ukraine ralkap training an kah!
==========
Poland ramri tein i a ummi Ukraine ralkap training kainak hmun cu Russia nih missiles voi 30 a kah i minung 35 tluk thi in minung 134 nih hliam an tuar ti asi. NATO member asimi Poland ramri i Russia nih missile hmang in a vun kahnak hi NATO le US nih hriamnam a vun kuat tawnmi duhlonak i ai hrocer asi tiin an ruah. Sunday night ah tlamtling tein ka vun peh te lai.

Canadian raltuk thiam pawl Ukraine vun bawm dingin Poland khuapi Warsaw International Airport (Warsaw Chopin Airport) an phan cang ko hi! Khua fakpiin a ka ruahter, Russia bomb le kuan lakah Ukraine hngakchia pate ralkap lakah mir cimciam tein a dir ve. Raldoh cu a that lo ning le a sual ning hi mu!

Ukraine vs Russia War Lastest Update, Russia ralkap thimi le hriamnam sungmi zah: Minung 12,000 an thi cang, Tanks 374 an hrawh cang, Armoured Vehicle 1226, Miakpi 140, Rockets kahnak motor 62, Vanlawng kahnak motor 34, Vanlawng 74, Helicopters 84, Ralkap motor 600, Tilawng 3, Datsi phur 60, Drone (UAV) 7, Ukraine’s Ministry of Defense.

Vladimir Putin nih a tlerh hna caah direct in Ukraine sinah phakter an ttih! Ukraine vs Russia war kong ah US politicians an hmurka a lang cio i, Obama he President a rak icuh i a sungmi pa, Mitt Romney biachim hi uar a um cem ko rua ka ti. UKRAINE 🇺🇦 nih an duhmi, MiGs/ Russia tuah Jet-fighters cu pek zawk ding an si ko. Holh lengmang awk a um ti lo. Kap hnih party lungtlingmi a si tiah a zai hnawh hna.

Rusia tuah jet MiGs 29 cu Poland nih an ngeih i, Vladimir Putin nih a tlerh hna caah direct in Ukraine sinah phakter an ttih. Cucaah, US ralkap an umnak Germany ah va chiah in, US tu nih Ukraine sinah phakter dingin Joe Bidden cu an chawnh tikah, Joe Bidden nih Vladimir Putin thinhung ding a ttih ve caah, “no way” tiah a ngamh ve lo i, a reject colh hna.

Cucaah, Republican Senator, Foreign Relations Committee zong ah aa tel vemi Mitt Romney nihcun, MiGs 29 cu pek zawk ko hna u! Vladimir Putin nih a kan ttihmi nakin NATO nih Kan ttih deuh ahcun, Ukraine ram ah thah-nawnnak hi kan hngolter kho tung lai lo? A cung ah zeidah kan tuah lai timi hi, amah tu nih a kan ttih/fear ve ding caan a si cang” tiah a ti.

Mitt Romney nihcun, “Party pahnih/ D he, R he lungtlingmi a si ko caah, phakter ding lawng a tang. Phakter khawh lonak – ruang a um ahcun, a ruang cu thate in chim u” tiah a ti hna. NATO article 5 ningin, NATO ram pakhat, Inches 5 aa tongh sual ahcun, NATO ram vialte ibawmh phawmh colh ding ti a si ko tikah, Poland cu NATO chungtel a si.

US zong a si ve ko i, US based in kuat le Poland in kuat cu aa dang nak a um lo ah ruah a si ko nain, Joe Bidden nih Putin a ttih tuk caah, Vladimir Putin hi a lung a tthawng chinchin rua ti awk in a um cang. Ukraine sinah MiG 29 phakter ding kong ceih dingin a Vice President cu Poland ram ah a kuat. News conference ah REFUGEE kong an hal lio ah kak thluahmah in a ni/ laugh.

Mi ngaichiat lio le vanchiat kong hal ah fakpi in nih le ilawm cu, tiah fak ngai in soisel a tong. Media nih bia an halmi zong thate in a leh kho hna lo- preparation a ngei lo caah a si kho men tiah a kong a chimtu zong an tam ngai. Joe Bidden hi US foreign policy ah experiences a ngei taktakmi a si nain biakhiahnak a rak tuahmi tete hi caan a von liam tikah a rak palhmi a tam deuh ti a si.

Tutan Ukraine nih an herhmi MiG 29, Poland nih an ngeihmi pek in, Poland tu US tuah cham tthan ding in kaphnih lungtlingmi, Ukraine sin phakter nak kong ah a buaimi hi khuaruah a tam ko. Democratic nih Foreign Policy ah an ipalh/ decision tuah an ipalh tawnnak cu a herhnak ah an ral a chia tuk deuh tawn caah a si in a lang lengmang.

Prisoner’s Dilemma of President Biden; Prisoner’s Dilemma ti mi hi game theory pakhat asi i economic theories tampi lak ah chim lengmang mi pakhat asi. A tawinak cun mah hi biachahnak ka tuah ahcun ka sung ve lai ti i theih buin, siloah ka caah a hlawkbik a chuah ter tu asi lo ti theih ko buin thim ding dang a um ti lo mi khi ”Prisoner’s Dilemma” ti asi.

Cubantuk a ttha dih lo, a hlawk bik lo ti theih bu in a tu dirhmun ah thim ding dang a um lo, mah hi biachahnak hi a ttha bik ko tiin tuah mi a um tawn. Cucu “Nash Equilibrium” ti asi ve. Russia nih Ukraine a tuk ruang ah US nih a fak bik in lehrulhnak tuah a duh. EU le USA nih a fak khawh chung in economic sanctions an tuah.

Bank le financial sector kha fak piin sanctions an tuah. Nain, Russia nih ram dang ah oil le gas export a tuah mi cu an hnur ngam lo. Zeicatiah Russia oil le gas ah ai hngat mi ram tampi an um tik ah oil le gas import cu an phit ngam lo. Cucaah US nih Putin cu fak deuh in dantat a duh caah Russia oil le gas import a tuah tawn mi kha phih a duh. US nih hin nikhat ah Russia Oil hi 100 000-barrels tluk import a tuah (TV2 Nyheter).

Russia oil import ka phih ahcun USA ah caan zeimazet chung oil shortage a um lai i meiti man fak piin a kai lai, mipi nih an tuar lai ti a theih ve ko bu ah thim ding dang a um lo tiin Russia oil import cu cacawn nihnih ni in a phih taktak cang. A mak ngai mi tu cu mah hi Russia oil import phih nak ding ah Democratic le Republic pawl an lung ai rual ngai, aw khat tein Russia oil import phih duhnak an langh ter.

Putin kha fak piin dantat an duh tik ah dictators dang pawl va lemsawi ve an hau ai. Russia oil import kan phih a hau tiah US cozah nih an ceih cang ka in US diplomats pawl cu Venezuela ah an va zuang. Venezuela cu Russia zinaan an phih ding mi airawl tu ah zeitluk dah zinaan a kuat khawh hna lai ti kha an va ruah hna ti asi.

Venezuela dictator Nicolas Madura cu Trump administration nih oil sanctions an rak tuah ve mi asi nain a tu ahcun va komh a hau ve hoi. Dilemma pakhat a um hawi mi cu Iran cozah cu oil supply kong ah Biden administration he chonhpiak nak an ngei i “nuclear deal” kong a thar in hnatlaknak tuah i sanctions zong phoih piak khawh ding phun in an um. A dang pakhat a um rih.

Saudi Arabia zong tam deuh in oil supply tuah ding in Biden cozah nih an chonh ve hna. Saudi Arabia hi Yemen ram ralthawhnak ah ramchung mipi thahnawnnak le nuhrincovo buarnak kong ah a min a chia ngai mi asi ve. Cucaah Russia ral teinak ding ah, siloah Putin kha a thari cat lak in dantat khawhnak ding ah USA cozah limhang a zawr ter ve ding mi dictators dang kha va komh le va chonh biak ve an hau.

Cucu Biden nih hrial a duh ve ko lai nain a tu dirhmun ah hrial awk a ttha lo mi le thim ding dang ngeih ti lo in biachahnak a tuah mi kha “Prisoner’s Dilemma of President Biden” ka ti nak cu asi. Cucaah thil pakhat tuah kan duh tik ah a dang pakhat kha duh lo buin va char tthan hna a hau, siloah sian lo buin hlonh hna a hau tawn ti nak a si cu! Zeidang thawngpang update cu um rih ko seh. Mah hi dilemma pawl hi lukheuh pah in van ruat ta phawt ve uh. Credit; Sangukceu Zinhlawng, Zasang Cinzah