Camp Victoria ah upatmi kan miphun caah rianttuantu hna Hmanthlak!

Camp Victoria ah upatmi kan miphun caah rianttuantu hna Hmanthlak!
====================

(Kan miphun ah Upat mi Pastor le Khrihfabu rianttuantu hruaitu vialte, CC rianttuannak ah CNF rianttuan tu lawng kan ni phazo kho hrim hrim lo i, kan Chimpi ve uh, kan bawm ve hram uh tiah kan nin sawm hna) Chin Miphun Unau vialte, Kan Chinram a luat lo. Kan miphun kan zalawng lo. Hi luatnak le zalawnnak hmuh ding, a kan uk tu pawl teinak ah kan Chin miphun thazang tthawng tak tak kan ni ngei ko. Cu cu kan hman thiam lo, kan hman khawh lo caah mikut tang ah kan tang rih. Hi kan thazang hi kan hman khawh lo, kan zaapi kan cawl cio lo chung pauh cu miphun dang kut in kan Chinram kan luat ter kho ti lai lo.

Chin miphun thazang ttha tuk kan ni ngeih ko nain hi kan thazang le, kan tthawnnak hi mi tampi nih kan hmu kho lo. Hlan lio kan rak der tuk lio bantuk khan kan ni tuak sual lengmang. Kan thazang tampi lak ah ramdeng i a um mi kan miphun sin ah a ummi phaisa thazang kan hman khawh rih lo mi kong hi tuzing kan ruah cio ding ah vun langhter ter ka duh. Human resources le a dang pawl ka chim rih lai lo. Ramleng (ram thumnak) ah Chin miphun a um mi hi a tlawmbik 80,000 hrawng kan si i, USA lawng hin 65,000 a tlawm bik kan um lai tiah kan tuak. Chin Baptist Churches of USA (CBCUSA) lawng ah hin Church 115 um a si i, member minung 32,000 a tlawm bik kan um. Hi a um mi lak ah hin cheu li ah cheu khat (25%) nih riang kan ttuan i, CBCUSA lawng ah hin rianttuan tu 8,000 kan um i, USA ah hin 16,000 kan um. Million in phaisa a ngei cang mi zong um a si nain, kan miphun caah kan thawh cio mi belte cu a tlawm ngai rih.

Chinland Club (CC) tiah kan ti mi kan Miphun Security Fund (kan miphun a himnak Fund) ah hin Chin Miphun ramthumnak rianttuan tu vialte nih kumkhat ah $200 cio thawh ve in, kan miphun a himnak caah CNF bawmh ding in CNF rianttuan tu nih kan nin sawm hna i, 2010 in kan au pi cuah mah. Hi kan saduh that hi tling kho seh law, CBCUSA chung lawng hmanhhin Rianttuan 8,000 x 200= $1,600,000 ($1.6m) a chuak ding a si i, ramleng kan miphun 20,000 rianttuan tu sin hin $4,000,000 ($4 m) fawi te nih hmuh ding a si. Kumkhat ah $200 thawh cu thlakhat ah $16.67 lawng a si i, nikhat ah Cent/pia- 56 ($.56) te khi a si ko. Thil har a si hrim hrim lo. A tu kan dir hmun hnu ah Phaisa dollar million 4 i, a rianttuannak aa chap ah cun kan va si ding le kan thazang zeidah a va lawh lai ti cu carel tu zaapi mitthlam ah cuan ter khawh dih mi a si.

Kan Kan miphun kan ttan tti dih i kan ni timh ning i kan kal khawh ah cun Dollar Million 4 hi fawi tuk in a chuak ko lai nain, kan miphun caah nihkhat Pia-56 hmanh a thawh kho, a thawh duh lo mi miphun kan si rih ah cun miphun dang kut ah a zungzal a tang ding tlak hrim hrim kan si ko lai. Kan keihram ah phaisa Million 4 fawite in charkhawh awk a um ko nain, kan laa kho rih lo. Ziah a fawi tuk ka ti ti ah cun, kan miphun hi mahzawn lawng aa ruat mi kan si lo, pakhat le pakhat zawn ruahnak kan ngei i kan ram caah ttuan a duh mi kan si ko. Kan ni chimh khawh cio rih lo ca tu ah a si. Hi pia-56 nihkhat thawh ding hi ttha tein kan ni chimkhawh ah cun kan miphun ah a tho duh lo mi kan um lai lo. CNF rian rianttuan tu kum 10 chung kan ni zuam lengmang ko nain, kan thazang nih a phanh lo ca tu ah hin a si. Hi CC phaisa Million lak khawh nak ding ah kan miphun vialte rak kan bawm ve uh tiah kan nin sawm hna. A tho rih lo mi vialte nih rak kan thawh pi ve cio uh. Cun kan Chin miphun hawi vialte kan thawh cio khawhnak ding ah kan chim pi ve uh tiah kan nmin sawm hna.

Hi CC rianttuannak mipi nih an theihnak ding hmun tthabik cu kan miphun kan ni tawnnak hmun ttha bik kan Biakinn hi a si. Nihin kan miphun le kan biaknak si ning hi kan theih dih bantuk in tthen thiam a si lo. A biakinn kip ah kan miphun kong hi chimh a herh i, chim zong ah chimh a thiang mi a si ko. Mah caah cun kan miphun ah mipi he pehtlainak a ngeih a tam bik mi kan Pastor hna, kan Evangelist hna le Khrihfabu rian ttuan tu vialte nih nan Biakinn cio ah kan chimpi ve hram uh tiah a hlei in kan nin sawm hna. Hnu lei can ah nan kan ttanh ban tuk in a raa lai mi caan via te zong ah nan bia pi chin chin naih te in kan ttuan tti zungzal a herh. Kan ni lawm tuk hringhran! Credit: Daniel Sakhong