Cakei Fim hi Zophei le Senthang peng in aa thok ning tuanbia

Cakei Fim hi Zophei le Senthang peng in aa thok ning tuanbia
“”””””””””””””””””””””””””””””””””””””””””””””””””””
Leitak Ral Hnin Hlawnceu phun unau nih, an farle pa2 lakah pakhat cu, Mar lei va a ngei, pakhat aṭa le sinah aum an dawt sunsak tuk mi cu, a ṭale Lo lam an kalkar ah, Ṭhingṭang donhhlei cungah thiam a tah lio ah Cakei nih a rak seh i, a thiamtah mi he ramlak ah a rak kalpi.

A ṭale cu Lo lam in an hun tlun tikah, Cakei nih an farnu a sehnak nehnang cu an hmuh, an lung afak, an mit-thli atla, a ṭale nih Cakei cu, kan thah hlanlo kan dawi lai tiah biachahnak an ngeih hnu ah, Fungvoi reu kha sawngkhoi zalkhat cio rawn, Li le thal he, Cakei neh cu an rak zuldawi i, Senthang peng Sakta khua Riva tiva timi pawng ah cakei cu an hmuh, Li le thal in an rak kah thah khawh.

An lung afak tuk, mei phu an kau, cakei sa cu an can an can i, meiphu ah an rawh, Ti din chih he a ei mi kha Ti Keirawh, ti dinlo in a ei mi kha Tlang keirawh tiah Hlawnceu phun unau cu, #Keirawh phun tiah an rak iti. Cakei an dawi in, Leitak khua aphan ṭhan tiang hi ni (13) an rau. Cakei lu cu Leitak khua ah an rak tlunpi, Hlawnceu unau (5)hna nihcun, Cakei fimnak cu an rak thawk.

Hlawnceu unau cu, kan farnu thihnak hmun bak ah khua kan sa lai an ti i, Senthang peng Sakta khua lei ahcun an pem i, Senthang zongah Cakei fimnak cu kumtin in an tuah ve. Leitak Hlawnceu phun cu Senthang peng ahcun Keirawh phun tiah an i ti ṭhan. Cakei fim hi Zophei ram ah Hlawnceu unau nih an thawk ning cu asi.

Kan Nunphung hrimhrim ah Far le ca’h thih a rak ngamh mi kan si… Nihin ah ṭalefar a remlo mi nan um ahcun nihin ni thawk in rak i Daw cikcek cang uh tiah. October 8, 2016 Nunphung &Zatlang can hman lio ah ka rak chim .
Cakei fim kong hi, Kum 2002 lio ah, Pu Hre Mang Hlawnceu (tleicia) nih Muko ah a rak ṭial i, a tuanbia hi amah nih a rak ka chimh bal.

Kum 2002 Hakha “Lai Miphun Ni” ah Pu Hre Mang (tleihcia) Pi Ni Kil (tleicia) Pu Khar Mang, Pu Kum Thar nih a rak kan chimh i, zophei mino nih Cakei fim kan rak lam lio a si. Ks 10,000 laksawng a rak kan pek. Kum 2002 Hakha CND puai lio le,Leitak khua Kum 600 tlinnak puai tuahlio Cakei fim rak Laam mi hmantlak. Mino deuh nih theih awk ah tiah, a tawinak in. Salai Ṭialsang Bawitlung