Caṭial Thiam A Khyi Taw A Nunnak A Liam!

Caṭial Thiam A Khyi Taw A Nunnak A Liam!
========
Mipi nih uar tukmi, caṭial thiam A Kyi Taw @ Saw Kyi Pyu (Kum 50) cu Sikpar [Nov.] 9, zaan sml 8:23 hrawng ah a nunnak a liam tiah theih a si. A Kyi Taw cu caṭial in mipi thinlung a la tu pakhat a si. Biazai le capo ṭial lei zong in mipi nih uar tukmi caṭial thiam pakhat a si.

Thailand ah cancer damlonak in aa va thlop. A rak tlun hnu Pinlung siizung ah aa thlop lio ah a nunnak a liam hi a si. Ca lei ah bochan tlak arfi pakhat a ṭilh cu zaang a ram hringhran!

KNU Battalion 5 Hmunhma SAC Ralhrang Nih Vanlawng In A Kah Ca Ah Biakinn, Sianginn Le Inn Cheukhat An Rawk. Karen ramkulh, KNU battalion 5 hmunhma cu SAC ralhrang nih nihin Sikpar 9, zinglei sml 1:00 hrawng ah vanlawng in a kah tiah theih a si.

Vanlawng in kah ruang ah Tataw (တာတော) khua le Kawde (ကော်ဒဲ) khua chung um Khrihfa Biakinn le siangniamrun telh in minung umnak inn hna zong tam ngai a rawk tiah Mizzima nih a langh ter. Ralhrang hna hi mipi i sel in an kahmi a si hrimhrim ko, Biakinn pawngkam inn pawl a rawkmi an um nain zeizat set a si a fiang rih lo,” tiah KNU nih thawng an thanh.

SAC ralhrang nih khua a hun pau deuh, Tho thla thok in tlangcung hriamtlai phu hna hmunhma cheukhat ah vanlawng hmang in tu le tu a kah pah lengmang cang.

CDF-Mindat Le Ralhrang Karlak Ah Kahdohnak A Chuak, Ralhrang (2) An Thi. Mindat peng Palontwi(ပလုံတွီ) khua ah CDF-Mindat le ralhrang hna cu Sikpar 8 chun ah an i kap i ralhrang lei in minung (2) an thi tiah Zalen nih a langhter.
Ralhrang hna hi minung 100 hrawng an si i Thilin(ထီးလင်း) in a ra mi an si. Sikpar 8 ah palontwi khua ah meithal puah pah in an luh hnu ah kahdohnak a chuah hi a si.

Kahdohnak a um caah ralzam hna le ngakchia (50) hrawng cu an i erh ko tiah theih a si. Ralhrang hna cu Sianginn ah hmun an khuar i an riak tiah theih a si.

Poh (ပေါက်မြို့) Ah CDF He Pehtlaihnak Nan Ngei Tiin Matupi Mi Nu Pakhat SAC Ralhrang Nih An Tlaih. Sikpar 7, zinglei sml 11:00 hrawng ah Poh peng, Tazat-taw (သရက်တော) pawng check gate ah Matupi mi nu pakhat tlaih a tong tiah theih a si.

Pakoko lei in a rak ra mi motor cu an check i motor aa cit ve mi pakhat Nuh Te phone chung ah CDF training a dih cangnak hmuh a si caah kan tlaih,” tiah ralhrang lei nih thawngthanhnak an tuah.

Sarah Boih Cu Mrs. Grand International 2022 Ah Myanmar Aiawh In I Zuam Ding Ah Mandalay A Phan Cang. “Mrs Grand International 2022 zuamnak ah i tel dingin Mandalay, Swallow Hotel ah tluang tein ka phan cang. Nu le pa, u le nau hna i nan zapi thapeknak hi hlawhtlinnak ka hmuhnak ding ah a biapi bikmi pakhat a si caah zuamnak a dih hlan tiang thazaang nan ka pek rih naklai kan sawm hna. Mahhlan ah thazaang nan ka peknak cung zong ah kaa lawm tuk” tiah Sarah Boih nih a tarlangh.

Kawl ram ah Sikpar (November) 7-16 tiang ram 30 in innchungkhar nu bik hna zuamnak Mrs. Grand International ah Chin nutung Sarah Boih cu kawlram aiawh in aa zuam ding mi a si. Sarah Boih cu Yangon khuasa, fanu(3)ngeimi a si tiah theih a si.

SAC Hriamngan Kahnak In Minung(2) An Thi I Minung (2) Hliam An Tuar. SAC ralhrang hna nih sulthonglo in hriamngan an kah ruangah Sagaing ramṭhen Wetlet(ဝက်လက်)peng Shein Ma Kar(ရှိန်းမကား) khua mi minung (2) an thi i minung(2) hliam an tuar.

Sikpar 7, zaan sml 7:50 hrawng ah Wetlet peng Shein Ma Kar khua i ralkap sakhan in hriamngan an kah ruang ah khuachung inn pakhat ah a tla i minung (4) kuan nih a khen hna. Hriamngan kuan khennak in nu pakhat le a fanu kum (2)hrawng a si mi an thi.

Ngakchia nu hi hriamngan kuan nih a cal ah a khen i a hnu ah a nunnak a liam ve. Cun kum(60) hrawng a si cangmi nutar pakhat le kum(40) hrawng a si mi pa pakhat zong fakngai in hliam an tuar tiah The 74Media nih a langhter.
Hriamngan tlakruang ah nunnak a liammi hna nufa cu Nihin chun sml 1:00 hrawng ah an vui cang hna tiah theih a si. Credit: CCN