Vawleicung Thawngpang!
========================
July 5, zanṭim hnu ah Israel nih Jenin refugee camp cu chuak taak in kum 20 chung a umnak hmun West Bank ralkap hmunhma laknak cu a phih tiah theih asi.
Israel hriamngan kah mi hi suimilam 48 chung tluk nguh in lihnin bantuk in chiatnak a tlun ter tiah an chim. Palestinian chiatṭhat zohkhanh tu phu nih an langhter ning cun, Israel hriamngan kahnak in Palestinian minung 12 an thi 141 hliam an tuar tiah an chim.
Hliam tuar 141 lak ah minung 20 hi an dirhmun a derthawm ngai hna. Israel Defence Force hraimtlai phu chung in minung pakhat a thi ve tiah an langhter.
Asia ram chung ah kum 20 a tlin in Pop star a simi Ms. Coco Lee hi 2001 khan Oscar hlasak thiam thimnak ah pakhatnak a rak la ve mi a si. July 5, ah Chinese American hlaphuah thiam le hlasak thiam “Crouching Tiger, Hidden Dragon” Oscar ti mi hla saknak in a min thang mi Coco Lee cu kum 48 si in anunnak a la tiah theih asi.
A naunu Carol le Nancy Lee nih an chim ning cun, an unu Coco Lee hi kan hnu lei zarh Pathian ni khan a umnak inn ah mah le mah nunnak lak aa timh ruang ah si-inn pi tiang a phan tiah an langhter. Hlasak thiam Coco Lee hi kum zeimawzat chung cu thinlung lei ah harsatnak a rak ngeih ca ah a mah bawmchan kho tu ding in mi fimthiam zong a rak fuh bal hna. A sinain, zeihmanh an bawmhchanh khawh lo ca ah a tu bantuk in a mah le mah nunnak aa lak hi asi tiah an chim..
July 4, Philadelphia ah meithal put in minung 5 a kapthat tu pa cu palik nih an tlaih hnu ah lainawn (Case) an siam piak tiah theih asi. Palik nih bia an halnak ah a leh mi hna cu United States holyday ah hin buainak fakpi a chuahter kho tu ka si tiah a chim.
Kum 40 tluk upa mithat tu Kimbrady Carriker hi July 5, ah Philidelphia County Municipal Court ah lainawnnak (Case) 5 awihter in july 4, zanlei buainak chuak mi zong ah aa tal chih rih tiah an chim. U.S ram pum June 29, in July 1, tiang ah mibu lak meithal kahnak in minung 16 nunnak liam cang i, minung 94 nih hliam an tuar tiah Gun Violence Archive nih a langhter.