BREAKING; Thawngpang kan theih mi vialte lak ah thawngpang tha bik!!

Thawngpang Kan Theih Mi Vialte Lak Ah Thawngpang Tha Cheukhat Pawl, Bawipa A Tha Tuk Hringhran Ko!
========================

“PDF That Dih Usih” Tiah Atitu Pyusawhti Hruaitu Soe Win Cu PDF Nih An Kah Thah, A Meithal Le Thilri Cheukhat An Lak, Mon ramkulh, Thaton(သထုံ) pengah SAC ralkap kuttang pyusawhti hruaitu Soe Win cu, nihin September 29 zing ah Thaton Pah Kah Phah nih Nan Hteik Aung(နန်းထိုက်အောင်) operation min in kan kah thah, tiah Thaton Pah Kah Phah nih an langhter.

Nihin zing sml 7:40 ah PDF cu a hram in kan phawi hna lai tiin a aupitu pyusawhti hruaitu Soe Win cu, lakphak dawr a ṭhut lioah kan kah thah i a meithal zong kan lak, tiah Thaton Pah Pah Kah Phah nih an thanh. “A min fak cu Soe Win a si i Dave Brain Phu Daung(ဒေးဗရိန်းဖိုးထောင်) tiah an auh. Anih hi pyusawhti hruaitu a si i PDF cu a hram in kan phawi hna lai tiin a aupitu a si. Cucaah kan kah thah,” tiah Thaton Pah Kah Phah in ṭuanvo ngeitu pakhat nih a chim.

Shan ramkulh, Namhkam peng ah SAC ralkap sibawi 2 nih an i citmi motor apuak, ralkap sibawi pakhat a thi, pakhat nih hliam tuar, Shan ramkulh, Namhkam(နမ့်ခမ်း) peng Hoenaung(ဟိုနောင်) sang SAC ralkap an umnak tualchung ah September 29, zaan suimilam 7:00 ah motor chungin puahkehnak a chuak i SAC ralkap sibawi pakhat cu mei kanghnak in a thi, a dang pakhat nih a kee ah hliamhma a tuar caah sizung ah an kalpi tiah tualchung mi hna nih an chim.

“Namhkam(နမ့်ခမ်း) peng Hoenaung(ဟိုနောင်) sangah SAC ralkap motor pakhat chungin bomb a puak i cu motor cu a kang, ralkap sibawi pakhat a kee a tan, pakhat cu mei kanghnak in a thi” tiah tualchung mi pakhat nih a chim. Cu motor chung in zeiruang ah bomb puahkehnak a chuah cu theih a si rih lo, SAC ralkap le palik nih hlathlainak an tuah cuahmah tiah theih a si.

Myinchain pengah khuabawi le SAC ralkap hna sinin NPDF nih meithal 7 an lak, Mandalay ramṭhen, Myinchain peng Pyawbwe Sanpiah(ပျော်ဘွယ်စံပြ) khuabawi le SAC ralkap hna cu luhhnawh in kah an tong i an hriamthil chiahtak in an zaam caah meithal 7 kan lak khawh tiah Natogyi-PDF sin in theih a si.

Nihin September 29, chunhnu suimilam 1:00 hrawngah Pyawbwe Sanpiah(ပျော်ဘွယ်စံပြ)khua khuabawi le SAC ralkap hna cu an umnak ah luhhnawh in kah an tong i, an i tlaihmi hriam MA1 pathum, shotgun pakhat, carbine pathum, kuanbawm le kuan an lakkhawh tiah theih a si.

A tubantuk in a zammi khuabawi le SAC ralkap hna cu zulhdawi in kah an si nain, kanmah humhimnak ding caah hnu kan tolh ṭhan tiah Natogyi PDF nih an thanh. Pyawbwe(ပျော်ဘွယ်) khua khuabawi cu fimhlawm ding ah voi hnih tiang timhtuah a si cang tiah theih a si.

Nikhat chungah SAC ralkap chungtel 70 leng an thi, September 28, nikhat chung a cangmi kahdohnak ah SAC ralkap chungtel 70 leng an thi tiah NUG nih cathanh an chuah. A tu i kan langhter mi SAC ralkap a thimi zat langhtermi nak in a leng ah a thimi an tamdeuh kho tiah an langhter.

Hramhram uknak latu SAC ralkap hna nih mizapi cungah thahnawnnak le hremnak an tuahmi ah mipi lei zong nih man nunnak a himnak ding caah mah le mah i runvennak an tuah. NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah an langhter.

Amarapura peng ah thongtla phortu motor pakhat doh an tong, palik 2 an thi, ramkhel lei thongtla 2 an luat
Mandalay ramṭhen, Amarapura pengah ramkhel lei thongtla minung 8 a phurtu motor pakhat cu kahdoh an ton caah SAC ralkap kuttang um palik 2 an thi i ramkhel lei thongtla minung 2 an luat tiah Truth Keeping Force- Amarapura phu nih an chim.

Ramkhel lei thongtla a phortu thongtla motor cu Truth Keeping Force le ṭangṭi hriamtlai phufonh pah-kah-phah phu hna nih nihin September 29, zinglei suimilam 9:00 ah Myitnge hleidonh pawngah an kahdoh hna hi a si tiah theih a si.

Cu kahdohnak ruang ahcun palik 2 an thi i, ramkhel lei thongtla minung pakhat nih hliamhma a tuar. Thongtla motor kahdoh a ton hnu ah ramkhel lei thongtla minung 8 ningin an zaamkho nain, minung 6 cu tlaih an tongṭhan i minung 2 lawng nih luatnak an hmuh tiah theih a si.

Mon Ramkulh Le Sangaing Ramṭhen Kahdohnak Ah SAC Ralkap 4 Nak Tlawm Lo An Thi, Mon ramkulh, Thanphyo Zayet(သံဖြူဇရပ်) khua in Ye khua ah a kalmi SAC ralkap motor 4 cu Mon ramkulh, Taungngio(တောင်ညို) Guerrilla phu nih lam hruang in an kah caah SAC ralkap 4 an thi, tiah theih a si. SAC ralkap motor 4 cu Taungngio Guerrilla phu nih Kanin Kamaw(ကနင်ကမော့) le Aungtharyar(အောင်သာယာ) khua kar Payartha(ပရာသား) hlei pawng ah zanlei sml 6:09 ah an kah hi a si.

Sagaing ramṭhen, Yunmarbin peng Banbuai khua ah umhmun khuarmi SAC ralkap pawl cu, PDF nih hriamngan in an kah hna caah a thimi le aa hliammi an um, tiah theih a si. Banbuai khua chungah umhmun khuarmi SAC ralkap cu Bar Ma Shaung YMB pengkomh Battalion 3, Companny(3) le Golden triang PDF Battalion GTF nih, nizaan September 28 zanlei sml 4:00 hrawng ah hriamngan le hriamhme he meter 50 aa hlatnak in an kah hna, tiah theih a si.

Cu kahdohnak ah SAC ralkap nih Ngwe Kabarmin(ငွေကမ္ဘာမင်း) datsi dawr in 120mm hriamngan in an kah i, Banbuai chungah hriamngan kuan lung 2 a tlak caah anmah SAC ralkap lila a thimi le aa hliammi an um kho, tiah theih a si.

Thawngpang Hlathlaitu Palik Pakhat Kah Thah A Tong, Dawei Peng Palik Sakhan PDF Nih An Kah, Tanintharyi, Yephyo peng hmun pakhat ah September 27 zaanlei ah thawngpang hlathlaitu palik Soe Moe Aung cu, PDF ṭangṭi phu hna nih an kah thah, tiah theih a si.

September 27 zaanlei sml 6:30 ah thawngpang hlathlaitu palik Soe Moe Aung cu hriamnam i bochan in tualchung mi hna cu a tlerh lengmang hna caah Dawei DGRF, LLPDF le T.PDF hna i bawm in kan kah thah, tiah PDF nih cathanh an chuah. Cu pinah Tanintharyi ramṭhen, Dawei peng Pakaryi(ပကာရီ) palik sakhan cu, September 28 zaanlei sml 6:00 hrawngah PDF nih kan kah hna i SAC ralkap nih, seh meithal le hriamngan he an kan kah, tiah PDF ralkap pakhat nih a chim.

SAC Ralkap Nih Jet Fighter In Bomb An Thlak Caah Ramri Hngak SAC Ralkap Le Palik Lila An Thi, SAC ralkap nih Jet Fighter 3 in bomb an thlak i Rakhine ramkulh, Maungtaw peng Letpan tlang cungah umhmun khuarmi AA sakhan thonginn 2 cu bomb nih a khen caah SAC ralkap le palik a thimi le aa hliammi an tam, tiah nizaan September 28 ah AA nih cathanh an chuah.

September 24 zan sml 11:00 ah SAC ralkap Jet Fighter 3 in sml a cheu chung bomb an thlak caah hliamhma pumi ramri hngak palik le SAC ralkap cheukhat cu thlopbulnak kan tuah hna i, sii-ai a um lo caah cheu khat cu an thi, tiah an langhter.

Bomb in hliamhma fak pumi SAC ralkap le palik hna cu, a ran khawh chung in rak lak ding ah SAC nawlngeitu sinah thawng kan thanh ko hna nain, ni 5 a rau cang i bialehnak zeihmanh an kan pe lo. Cu caan karlak ah SAC ralkap 1 a thi chap, tiah AA nih an langhter.

Bomb hma in hliamhma pumi ramri hngak palik cheukhat cu an nun dam khawh nakding ah sii-ai thlopbulnak kan tuah cuahmah hna, tiah AA nih an langhter. SAC ralkap pawl cu Min Aung Hlaing kuttang um an duh ti lo caah AA sinah aa fonhmi le kan tlaihmi hna hi 150 leng an phan cang, tiah an cathanh ah an langhter.

Tualchung Mi An Facang Le Thilri A Firtu SAC Ralkap Pawl Cu PDF Nih Drone In Bomb An Thlak Hnawh Hna Caah 3 An Thi, Sagaing ramṭhen, Shwe Bo peng Myinsi khuami an facang le thilri a firpiaktu SAC ralkap le pyusawhti cu, drone in bomb kan thlakhnawh hna caah SAC ralkap le pyusawhti 3 an thi, tiah DUGF(KU Dragon) nih cathanh an chuah.

September 25 lio ah Shwe Bo peng Myinsi khua um SAC ralkap le pyusawhti nih, khuami hna an facang le an thilri mansung cu hranhram in an firpiak hna i motor in an kalpi i an zuar hna, tiin thawng kan theih caah Myinsi khua chuah ah bomb in kan puahhnawh hna hi a si, tiah an langhter. DUGF(KU Dragon) le ṭangṭi phu hna nih drone in bomb lung 5 in kan thlakhnawh hna i SAC ralkap le pyusawhti 3 an thi, tam ngai hliamhma an pu, tiah DUGF(KU Dragon) nih cun an langhter.

DUGF in ṭuanvo ngeitu pakhat nih, “Myinsi khua ah SAC ralkap le pyusawhti lawng an um i khuami hna cu an zam dih. Thlakhat ah inn chungkhar pakhat ah kyats sing 250,000 ngunkhuai an khawlh hna. An duhmi hna ngaknu paoh an tlaihhrem hna. Khuami cu sentari an conghter hna. An duh lo ahcun nikhat ah kyats 5,000 an hal hna. An pek hna lo ahcun an thah beh hna,” tiah a chim. Cu kahdohnak ah DUGF(KU Dragon), Wolf Guerrilla (YE-U)၊ Fire Dragon (Khin-U), NAA-DF၊ Burmese Revolution Youths (BRY) le Khin U PDF(3) phu hna i bawm in an tuahmi a si tiah theih a si.

Hpapon-Kamamaung Lam Ah Rallam A Sialmi SAC Ralkap Cu KNU Brigade 5 Nih An Kah Hna Caah Ralkap 5 An Thi, KNU Brigade 5 hmunram Hpapon-Kamamaung( ဖာပွန် – ကမမောင်း) lam ah SAC ralkap le KNU kar kahdohnak a chuak i SAC ralkap 5 an thi, tiah KNU nih cathanh an chuah. September 26 ah KNU hmunram lei ah rallam a sialmi SAC ralkap pawl cu, Brigade 5 nih lam hruang in voihnih kan kah hna caah SAC ralkap 5 an thi, 3 hliamhma an pu. Cu kahdohnak ah KNU Brigade 5 lei in a thimi le aa hliammi kan um lo, tiah an langhter.

SAC ralkap le an kuttang BGF hna nih Brigade 5 hmunram ah rallam an sial i an cawlcangh lengmang pinah nuhrin covo an buarmi a tam tuk cang, tiah theih a si. BGF Battalion 1014 nih tualchung mi hna cu Hpapon-Kamamaung lam um Hpapon-Kataingti(ကတိုင်တိ) karah tlang lam in siseh, ti lam in siseh a hohmanh nan kal lai lo, a kalmi kan in hmuh hna ahcun nan cycle le tilawng kan in tlaihpiak hna lai, tiin an kan tlerh, tiah tualchung mi hna nih an chim.

Hlataw Palik Sakhan Ah Umhmun Khuarmi SAC Ralkap Cu PDF Nih An Kah Hna Caah Ralkap 4 An Thi, 7 Hliamhma An Pu, Sagaing ramṭhen, Walet peng Shwe Bo-Mandalay lampi cung ummi palik sakhan ah umhmun khuarmi SAC ralkap pawl cu, PDF ṭangṭi phu hna nih kan kah hna caah ralkap 4 an thi, 7 hliamhma an pu, tiah Monywa pengkomh PDF Chindwin Attack Force nih cathanh an chuah.

September 27 zan sml 10:00 in 11:00 karah Walet peng Hlataw khua palik sakhan um SAC ralkap pawl cu, 60mm hriamngan in kan kah hna. Kanmah lei in a thimi le aa hliammi kan um lo, tiah Chindwin Attack Force nih an langhter. Cu kahdohnak ah Chindwin Attack Force, Leopard Black, Peafowl PDF, Tidishin PDF le Naung Yu PDF hna i bawm in an kah hna, tiah theih a si.

KIA, KNLA, PDF le SAC ralkap karlak kahdohnak pawl ah SAC ralkap lei in 58 an thi tiah ERO sin in thawng theih a si., Chaklei Shan le Namtu khua ah hmunhma a khuarmi SAC ralkap sakhaan cu KIA le PDF phufonh hna nih September 28 chun sml 1:30pm hrawngah an kah hna tiah 7Stars News nih a thanh. Cu bantuk in September 28 zinglei zong ah Namtu le Manton karlak ah KIA le SAC ralkap karlak ah kahdohnak a chuak tiah theih a si.

Chaklei Shan ah SAC ralkap le KIA karlak ah kahdohnak a chuak peng i September 7 ah KIA battalion 9 sakhaan pakhat cu SAC ralkap nih an rak lak i cu sakhaan ah SAC ralkap pawl an i dinh lioah KIA nih an kulh hna i September 8 kahdohnak ah SAC ralkap 47 an thi tiah 7Stars News nih a langhter.

September 27 ah Wetlet peng, Hlataw sakhaan cu PDF phufonh nih a langhlat a kap khomi hriamngan in voi 15 hrawng an kah hna i SAC ralkap 4 an thi, 7 hrawng an i hliam tiah theih a si. September 28 ah Taungni khua ah hmunhma khuar ding in a timmi SAC ralkap LIB 104 cu KNLA battalion 27 le Brigade ṭhen 2 nih an kah hna i SAC ralkap 1 a thi tiah Cobra Column nih a thanh.

Karenni ram Kyainseikgyi peng Makataw khua pawngah hmunhma khuar a rak timmi SAC LIB 556 cu KNLA battalion 17 le Red Dragon phu nih September 24 ah an kah hna i SAC ralkap 1 a thi, 3 fak ngai in an i hliam tiah Red Dragon phu nih a thanh. Karen ram Brigade 5 hmunhma chung, Hpapun-Kamamaung lam cung, September 26 ah SAC ralkap le KNLA karlak ah kahdohnak a chuak i SAC ralkap 5 an thi tiah KNU nih a thanh.