BREAKING! NUG nih Min Aung Hlaing nih timhtuahnak a ngeih mi a phuan!!

SAC Ralhrang Nih Dohthlennak A Tuahtu Hna Karah Thi Thenthek Dingah Timhlamhnak A Ngei-NGU
=======================
SAC ralhrang nih dohthlennak a tuahtu hna karah thi thenthek dingah timhlamhnak a ngeih nak kong cu, NGU cozah Pyidaungsuu vuanci Mann Win Khaing Than nih a chim phuan. October ni 4 ah tuah mi NUG cozah i a voi 70nak cozah phu chungtel online meeting tuahnak ah a cung lei bantukin a chimnak hi a si.

“SAC ralhrang nih dohthlennak a tuahtu hna kar ah thi thenthek khotu kong kau, khat le khat ruahnak khatlo ning cang loin a chuahter khotu kongkau cu pakhat hnu pakhat in timhtuahnak a ngei.” tiah a chim.

Cu pinah ” Tukum hi kan mah zapi caah a biapi tuk lio caan a si. Zeiruangahdah a biapit kan ti a si ah cun a hrang tukmi hi SAC ralhrang kuttang ah kan mah mipi vialte kan zapiin lungthawnnak he kan thut dirnak hi kum 1 le thla 8 a tling cang.

Kan mah mipi hna i thinglung in siseh, muisam in siseh zei paoh sungh kan duh ti lo. Cu ruangah kum khat leng chung timhlamhnak ngeih buin SAC ralhrang cu thawl an si cang caah resources pawl, theih hngalhnak vialte hna zong a tlin khawh tawk in a tling cang caah kan zapiin zaanghlei chuahin kan i zuam caan a phang cang. ” ti zongin a chim.

Tlangcung hriamtlai phu telin dohthlennak tuahtu zapi i fonhtom in Federal Democracy cu hrambunh mi caan karlak phunghrampi upadi chuahter khawh ding zongah NUCC nih tuanvo a lak nak kong zong a chim chap. Crd-CJP

Karen Ramkulh Ah SAC Ralkap Sakhan Pakhat Cu Drone In Kah A Ton Caah SAC Ralkap 2 An Thi, 4 Hliamhma An Pu, Karen ramkulh Gyia Ing Seikgyi(ကြာအင်းဆိပ်ကြီး) peng Chuang Hnakhuah(ချောင်းနှစ်ခွ) hlei um SAC ralkap sakhan cu, October 2 ah drone in bomb kan thlak caah SAC ralkap 2 an thi, Sergeant 1 le ralkap 3 cu hliamhma fak ngai an pu, tiah Saw Dragon Drone Force – SDDF in ṭuanvo ngeitu pakhat nih a chim.

A luancia September 29 lio zongah Gyia Ing Seikgyi peng Takey(တဂေး) khua pawngah rallam a sialmi SAC ralkap pawl cu SDDF, KNLA Battalion 17 le Red Naga hna i bawm in bomb lung 3 an rak puahhnawh hna caah SAC ralkap 3 an rak thi. SAC ralkap nih khuami an phone an chuh han i artlang in an chiah hna.

Khua leng ah an chuahter hna lo i an hrem hna caah kan kah hna hi a si, tiah Saw Dragon Drone Force – SDDF in ṭuanvo ngeitu nih cun a chim. Cu kahdohnak ah SAC ralkap 5 an thi i, 4 cu hliamhma fak ngai an rak pu. PDF ṭangṭi phu lei in a thimi le aa hliammi an um lo.

Banlaw Khua Pawng Umhmun Khuarmi SAC Ralkap Cu PDF Nih An Kah Caah Ralkap 4 An Thi, Tanintharyi ramṭhen, Banlaw(ဘန်လော) khua pawngah umhmun khuarmi SAC ralkap pawl cu PDF ṭangṭi phu hna nih kan kah caah SAC ralkap 4 an thi, tiah Myeik PDF Battalion 2 in nizaan October 3 ah cathanh an chuah. Cu kahdohnak cu October 1 zanlei sml 4:30 hrawng in ai thok i, Myeik Battalion 2, Companny 1 le Betmaleik(ဘက်မလိုက်) Guerrilla le SWDF hna i bawm in an kah hna caah SAC ralkap 4 an thi, 2 hliamhma an pu.

Cu kahdohnak a daih in SAC ralkap nih khua chungah October 2 zaan ah hriamngan in an kah caah tualchung mi hliamhma a pumi an um, asinain hliam pumi mi bel hngalh a si rih lo, tiah theih a si. Kahdohnak hi zeitik caan paoh a chuak khomi a si caah mizapi um kal kongah ralring tein um dingah Myeik Battalion 2 nih cathanh an chuah.

Nyaung U-Chauk Motor Lam Kam Ah Ruak Pathum An Char, Mandalay ramṭhen, Nyaung U peng Sinku(စဉ်ကူး) khua sii-inn pawng Ngaung U-Chauk motor lam kam ah nizaan October 3 zinglei ah ruak pathum kan char, tiah mi bawmchantu phu nih an langhter. “October 3 zinglei sml 7:00 hrawng ah pa pahnih ruak le nu pakhat ruak kan char. An thih ning zoh tikah an pum hi nam in sawhnak hma lawngte a khat,” tiah mi bawmchantu pakhat nih a chim.

Ngaung U pengkomh palik he ai naihniam mi pakhat nih, “October 2 lioah thah an tong i October 3 zinglei ah an ruak cu kan char hna. Thah a tongmi hna hi Nyaung U peng Sinku khuami Thaw Mi Mi Win(32), Win Aung Moe(52) le Ngein Chan Min(42) hna an si,” tiah a chim. “October 2 zaan ah hriamtlai minung 5 nih inn chungah an rak luhhnawh hna i an kalpi hna,” tiah thah a tongmi an chungkhar lei nih an chim.

Salingyi Peng Ah Bazar A Kalmi Palik 4 Kah Thah An Tong, An Meithal An Zong An Lak, Sagaing ramṭhen, Yinmarbin pengkomh Salingyi(ဆားလင်းကြီး) peng Ngaungpingyi(ညောင်ပင်ကြီး) khua, Nyaungpingyi-Salingyi lam tonnak pawng ah nizaan October 3 chunhnu ah bazar a kalmi palik 4 cu, kah thah an tong i an meithal zong an chuh hna, tiah tualchung mi hna nih an chim.

“Nyaungpingyi palik sakhan in thil cawk dingah a chuakmi palik 4 cu civil motor a raangmi cungin an kah hna,” tiah mithmutu pakhat nih a chim. Yinmarbin pengkomh palik he aa naihniam mi pakhat nih, “Chun hnu sml 1:00 hrawngah Nyaungpingyi palik sakhan in thil cawk ding in a kalmi palik Lieutenant Sergeant simi Ngi Ngi Thwe le Se Thu Soe, palik Aung San Win le palik Zin Ko Phyo cu Alphard motor a raangmi pakhat in an bawh hna i an kah hna caah an 4 ning in an thi.

An meithal zong an lakpiak hna,” tiah a chim. A luancia July 22 zinglei ah thil cawk dingin bazar ah a kalmi palik 4 zong lakphak dawr an ṭhut lioah kahthah an rak tong i, an meithal zong an rak lakpiak cang hna. Salingyi peng chung thla thum chungah palik kahthah an ton hi a voihnihnak a si cang, tiah theih a si.

A Ra Laimi ASEAN Meeting Ah Min Aung Hlaing An Sawm Lai Lo-Cambodia, Cambodia ram khualipi Phnom Penh ah a ra laimi November thla ah a voi 41 nak ASEAN tonpumhnak meeting le pehtlaihnak meeting tuahnak hmunah SAC hruaitu Min Aung Hlaing cu kan sawm lai lo tiin an langhter, tiah The Phnom Penh Post nih nihin October 4 ah an thanh.

SAC hruaitu Min Aung Hlaing cu ASEAN meeting ah kan sawm lai lo tiin Cambodia Foreign Minister zung in chimphuannak nawlngeitu Chum Sunry nih a fehter cang, tiah theih a si. ASEAN ram chungtel vialte cu kan sawm dih cang hna nain Myanmar ram cu kan sawm lo. Cozah he aa pehtlai lomi chungin aiawhtu pakhat lawng kan sawm,” tiah Chum Sunry nih cun a chim.

ASEAN hnatlaknak(agreement) phun 5 cu a tak in SAC nih an ṭuan lo caah Cambodia hruainak in a luancia Febuary thla ah rak tuahmi ASEAN runvennak zung palai pawl tonpumhnak(ADMM) ah SAC ramdang palai Wana Maung Lwin zong an rak sawm lo. A ra laimi ASEAN meeting le pehtlaihnak meeting cu November 8 in 13 tiang Cambodia ram khualipi Phnom Penh khua ah an tuah lai, tiah theih a si. Crd-The Chin Post