Breaking News; ZRA Ritsii (Bing) Cinnak Dum CDF-Hualngoram nih an Hrawh!

ZRA Ritsii (Bing) Cinnak Dum CDF-Hualngoram nih an Hrawh
=======
Tedim peng chung ah ZRA nih ritsi (ဘိန်း/opium) an cinnak dum cu CDF-Hualngoram nih an hrawh i ritsi an cinmi pawl mei in an khanghpiak hna.

CDF-Hualngoram chimnak nawlngei nih, “Mah ritsi cinnak dum hi ZRA nih an tuahmi a si i, minung pakhat an zohkhenhter. Cu pa cu bia ttha tein kan hal hnu ah le ZRA pawl ritsi cinnak hmun ah an ratmi a hmu tawntu khuami pawl bia kak hal hna hnu ah hi sitsi dum hi ZRA tuahmi a si tiah kan theih,” tiah a chim.

Hi ritsi dum hi Tedim peng, Thinhle khuate pawng ah a ummi a si i, nizaan April 8 zinglei ah CDF-Hualngoram ralkap pawl nih an hrawh hi a si.

Atu bantuk in Chinram ah ZRA nih zalong ngaiin ritsi an cin khawhmi hi SAC ralhrang nih nawl an onh hna ruang ah a si, tiah CDF-Hualngoram chimnak nawlngei nih a langhter chap.

Ayadaw le Chaung U kahdohnak ah SAC ralkap 14 nak tlawm lo an thi. Sagaing ramṭhen, Ayadaw peng le Chaung U peng hna ah kahdohnak a chuak i SAC ralkap lei in 14 nak tlawm lo an thi tiah PDF nih an thanh. April 8 ah thazang 80 hrawng a simi SAC ralkap pawl cu Ayadaw peng Shoihkha khua zing sml 4:30am ah hriamngan kah pah in khua chungah an lut i mipi 1 an thah leng ah mipi inn 30 leng mei in an khanghpiak hna.

SNAKE EYES-PDF, PDF-Shwebo, ALPHA-7, Daungman phu, PyungShwin phu (Depeyin), Shwebo peng phukomh 2, Ayadaw mipi hriamtlai phu hna fonh in SAC ralkap cu Zuatazua-Baungkya khua tiang an dawi hna i an kah hna caah SAC ralkap 7 an thi i 15 nih hliamhma an tuar tiah C&T SHWEBO phu nih an thanh.

Cun, Sagaing ramṭhen, Chaung U peng ah April 5 zaan sml 10:00pm ah Pakokku in Mandalay lei ah a chuakmi SAC ralkap phu 7 aa telmi mawṭaw cu Chaung U mipi hriamtlai phu nih bom an puah hnawh hna caah ann-sa-tone mawṭaw hrap khatlei a rawk. Bom puah hnawh ruangah a thimi cazin theih a si lo tiah PDF-Chaung U nih a thanh.

Cun, April 7 zinglei 2:30am ah Mandalay in Monywa lei ah SAC ralkap pawl an i citnak Express mawṭaw 2 le mawṭaw a hmemi 4 cu Chaung U le Myaung mipi hriamtlai phu hna nih bom an puah hnawh hna caah mawṭaw 3 a khen i a thimi an tam tiah PDF-Chaung U nih a thanh.

April 7 zing sml 7:30am ah bom a thianh liomi SAC ralkap phu cu PDF-Chaung U le Immortal Guerilla Force nih bom an puah hnawh hna caah SAC ralkap 7 an thi tiah PDF-Chaung U nih a thanh.

KNU battalion 5 nih a tlaihnak hmunhma ni 3 chung kahdohnak ah SAC ralkap 6 an thi. Karen National Union (KNU) battalion 5 nih a tlaihnak hmunhma Papun ah a rak lutmi SAC ralkap, BGF le Karen National Liberation Army (KNLA) karlak ah nithum chungah kahdohnak voi 10 a chuak. Cu kahdohnak hna ahcun, SAC ralkap 6 an thi i 5 nak tlawm lo nih hliamhma an tuar tiah KNU nih a thanh.

April 6 chun sml 1:59pm hrawngah nyapawkalo le kahawkalo lam karlak himnak a lami BGF phu cu voikhat, 2:30pm ah Kyebuhlu ah voikhat kahdohnak a chuak i BGF lei in a thimi an um kho nain a fiang lo tiah KNU battalion 5 nih a chim.

April 7 ah Lutaw peng chungah kahdohnak voi 5 a chuak i SAC ralkap 2 an thi, a hliammi an um kho men. Dwelu pengah SAC ralkap le BGF phu hna cu KNLA nih voi 3 an kah hna i SAC ralkap 4 an thi, 5 hliamhma an pu tiah Mutaw thawngzamh nih a langhter.

SAC ralkap pawl cu fur a tlak hlan ah ralram ralkap buk pawl caah eidin le hriam chap khawhding aa zuam caah KNLA battalion 5 he nifatin ngawt in kahdohnak a chuah hi a si. Credit: The Chin Journal, The Chinland Post