Breaking News; ZRA le Kate Hriamtlai PDF-Zoland,PDF(Kalay) nih an lehrulh ve cang hna lai

ZRA le Kate Hriamtlai PDF-Zoland, PDF(Kalay) nih an lehrulh ve cang hna lai
========
PDF-Zoland i ramri riahbuk voihnih a hrawk tu ZRA le Kate hriamtlai cu PDF-Zoland le PDF(Kalay)kutsih tangrual unau nih hma kan lak cang hna lai tiah September 26 ah an thanh. Kate hriamtlai le ZRA(Zomi Revolution Army)ralkap hna cu India cozah a dothleng mi an si i Myanmar ramri ah a ummi an si.

PDF-Zoland le PDF(Kalay)kutsih tangrual nih an thanhmi ah Tonzaang peng,Tedim peng,Kalay,Kabaw hrawng i ralhrang he a fonhmi hruaitu,hriamtlai he pehtlai in,minung kawlnak zohfelnak a tuahmi cu a herh ningin lehrulh an si lai.

ZRA nih ramri ah riahbuk chiami le cawnnak a tuahmi PDF-Zoland nih voihnih an luhhnawh Hualngo PDF zong voikhat tlaih in kut an thlak hna. Kate hriamtlai hna zong Tamu peng ah ralhrang he an i fonh tiah PDF Tamu nih an rak thanh bal cang.

Monywe le Kyimon Khua 2 Cu Ralhrang nih An Khulh I Mipi hna cu An Kahthah Hna Khuachung An Khangh. Sagaing ramthen,Monywa peng chung ah Monywe le Kyimon khua hna cu ralhrang nih tuzing suimilam 5:30 in an kulh i mipi hna cu an kahthah hna khuachung ah mipi inn le lo cu khangh an i tim khuami hna nih an kham hna tiah khuami pakhat sinin theih a si.

“Monywe Kyimon khua 2 telin an kulh i zing zuimilam 5:30 thok in an kah hna.Mipi hna a hliam mi zong an um.An tlaih mi hna zong an um ” tiah khuami hna nih an chim. Tu zong khuami pakhat i ruak cu khuachung lam cung ah a um i kahthah an ton mi a si i mah a ruak cu ralhrang mawtaw nih a rial nak kong khuadang khuami pakhat nih a chim.

Monywe le Kyimon khua hna cu nifatin in ralhrang uknak duh lo nak ah a langhter mi khua an si caah ralhrang nih an rak kahnak hi a si tiah khuami pakhat nih a chim. Monywe Kyimon dohthlennak committee nih khuahnih cu an an kulh tawn caah khua pawngkam um khua hna cu bawmhchanh ding in bawmh an hal hna.

“Pakhat cu a thi tiah fiang tein kan chim khawh.A naihniam mi phu hna zong rat ding in bawmh kan hal hna.Khua zong mei in an kangh ” tiah khuami pakhat nih a chim. Mipi 2 cu kahnak ruang ah an thi i mipi 10 nak tlawm lo an tlaih hna i an tuk an velh hna a thi mi hi tam deuh khawh kan si tiah khuami cheukhat sinin theih asi.

Ralhrang mawtaw hna cu Kalay PDF nih bomb in an doh i ralhrang 8 an thi. Tuchun suimilam 12:00 hrawng ah mi sawhsawh mawtaw 3, saikel 5, thil phurh nak mawtaw 4 in Kalay lei ah a rak ra mi ralhrang mawtaw hna cu Chin Sine khua pawng ah PDF Kalay nih bomb in an doh hna i saikel 3 le mawtaw 1 cu an rawk i saikel a khaltu ralhrang 3 le thilphorh nak mawtaw a cit mi ralhrang 5 an thi an zapi minung 8 an thi.

Bombpuah hna hnu ah ralhrang hna cu Chin Sai lei cu tihphan bu in ruahdamh in an kah i bomb an puahnak in a rawk mi mawtaw cu an chiah tak i a dang mawtaw ah ruak hna cu an khin hna i Kalaymyo lei ah rang taktak in an zaam tiah Kalay PDF nih an thanh.

Thawngthanhnak; Upatmi riantuan hawi hna, Hakha Township IDPs Management Committee min in nan kut kan in tlaih hna. Tulio kan ton cuahmah harnak ruangah Hakha peng khuakip ah siseh Hakha khuachung Khrihfabu kip le sang chung ah siseh aa dormi le fuhpanhtu ralhrial le ralzaam kan unau vialte caah Hakha khuapi timhcia te kan si cang tiah mah le Khrihfabu ah thawng nan kan thanh piak cio nak lai upatnak he zangfak kan in nawl hna.

1. IDPs Camp 1 cu Chin Christian University, Cawbuk ah hun a si cang. 2. September 27, 2021 (Nikhat ni), Zing sml 10:00 ah IDPs Camp 1 ah i dor khawh a si cang. 3. IDPs Camp 1 ah tlunkalnak le fuhpanhnak cu mah he naihniam mi Khrihfabu le sang upa sinah bawmh hal in tawlrel a si lai.

4. Covid-19 zawtnak kongah test ta a duh mi nih Community Care Center & Test Center (No. 3. BEHS) ah rak i test ta khawh a si. 5. Covid-19 positive a si mi ralhrial le ralzaam hna cu IDPs Committee nih tha tein zohkhenh le tirawl lei tuanvo lakpiak an si lai.

Contact Persons: 1. Rev. Dr Thawng Hlei Thang- 09740813098; 2. Pastor Sui Mang- 09423661278. Upatnak he, Ni Cung Thang, Implementation Director.