Karenni Ramkulh Ah Ummi BGF 1004 Nih SAC Ralhrang An Kah Ve Cang Hna; BGF In SAC Kahdohtu Hmasabik Phu An Si
=========
Karenni ramkulh, Mese peng ah umhmun a khuarmi ramri hngaktu Border Guard Forces (BGF 1004) nih June 14 ah SAC ralhrang an kah ve cang hna i, ramri hngaktu BGF phu chung in SAC ralhrang a kapdohtu hmasabik phu an si, tiah kan theih.
1993 kum in SAC ralhrang he kahdeihnak a tuahtu Kareni ramkulh cung miphun dihlak fonh mipi luatnak hriamtlai phu an dirh hmasa bikmi Karenni National People’s Liberation Front (KNPLF) le SAC ralhrang pawl cu atu June 14 ah an i kah ṭhan hi asi, tiah BJV News nih June 20 ah a ṭial.
A liamcia 1993 kum in SAC ralhrang he kahdeihnak minsen an thut hnu in 2009 kum ah ramri hngaktu (BGF) hriamtlai ah min a thlengmi KNPLF Battalion pahnih simi BGF 1004 le BGF 1005 hna nih cu hlan bantuk in KNPLF (4878) le KNPLF (7894) ah an min thlen ṭhan in an nu ram hriamtlai phu hna he SAC ralhrang an dohṭi hi asi, tiah Progressive Karenni People Force PKPF nih June 20 ah a langhter.
June 14 ah KNPLF nih SAC ralhrang pawl umhmun an khuarnak Thailand- Myanmar ramri um BP 14, BP 15, BP 16 hna cu kahdoh in a laak i, cu hlan ah an umnak simi BGF 1004 le BGF 1005 sakhan hna zong anmah kut ah an um cang, tiah Progressive Karenni People Force PKPF nih a langhter chih.
Sagaing ramṭhen Shwebo peng Kinpyar khua le Ubo khua karlak ah a a um mi SAC ralhrang cu mipi hriamtlai tu phu nih sniper hmanginan kah hna 2 an thi ti ah Shwebo battalion 23 in ṭuanvo ngeitu pakhat nih a chim. June 18, zanlei suimilam 12:00 tluk ah Kinpyar khua lut in a khang tu SAC ralhrang cu Kinpyar khua le Ubo khua karlak an um lio ah mipi hriamtlai tu phu nih sniper in an kah hna 2 an thi ti ah an langhter.
Kahdohnak ah a tel mi ṭangṭi phufonh hna cu, Shwebo battalion 23, MDF Shwebo battalion 4 le BGF ṭangṭi phufonhhna hi an si ti ah an langhter. Sagaing ramṭhen, Kani peng ah kahdohnak a chuak i palek 3 an thi, meithal zuun 1 an lak khawh tiah Yinmarbin pengkomh B30 DRPA phu nih an thanh.
June 19 zinglei sml 7:00am hrawng ah Kani peng, Kyopinhla ah mi ngiat ding in aa chawk mi palek 17 cu Yinmarbin pengkomh B30 nih an kah hna i palek 3 an thi tiah theih a si. Kahdohnak chung in G3 zuun 1, G3 kuan 90, G3 kuanbawm 3, Phone 1, walky talky 1, tangka sing 2 le kuan khamnak 2 hna an lak khawh i zinglei sml 8:15am hrawng ah mipi hriamtlai pawl him tein an kir kho tiah theih a si.
Magway ramṭhen, Myaing khuachung ah a um mi palek sakhaan le SAC ralkap pawl cu mawngtu ngei lo vanlawng hme in bom an thlak hna tiah Myaing PDF sin in thawng theih a si. June 19 chun ah Myaing peng PDF B02, C03 le C04 hna nih Salingyi Special Task Force, Shar Htoo Waw, Royal Eagle phu hna nih Myaing khuachung palek sakhaan le SAC ralkap pawl mawngtu ngei lo vanlawng hme in bom lung 16 an thlak hna tiah theih a si.
Karenni (Kayah) ram, Hpasawng peng kahdohnak ah SAC ralkap 4 nak tlawm lo an thi tiah Hpasawng PDF nih an thanh. June 18 zaan sml 9:30pm hrawng ah Hpasawng peng, Thanlwin ni chuahlei Kyaukpanngyo khuate ah SAC ralkap 100 hrawng an rak luh caah Hpasawng PDF, Bawlakhe PDF, Loikaw PDF le EAO phufonh pawl nih an kah hna.
Kahdohnak chung ah SAC ralkap a tlawm bik 2 an thi i hliam a tuar mi zong an um tiah theihternak an tuah.
Cun June 17 zong ah Thanlwin ni chuahlei ah kahdohnak a rak chuak i SAC lei a tlawm bik 2 an thi i hliam a tuar mi cheukhat zong an um tiah theih a si. June 17 kahdohnak chung ah Hpasawng PDF chungtel 2 hliam an tuar tiah theih a si. Hpasawng peng ah SAC Infantry 134 le 135 hna nih hmunhma an khuar tiah theih a si.