Hpakant Peng KIO Zung Cu SAC Ralkap Nih An Luhhnawh I Zung Ummi 7 Nunnnak Liam!
=============
Kachin ramkulh, Hpakant peng Saitmu no.3 sang ah a ummi KIO zung cu nihin June 21, deilei suimilam 3:00 hrawng ah SAC ralkap nih hriamngan le hriamhme in an kah i minung 7 an thih pinah zeimawzat tlaih an tong, tiah tualchung mi nih RFA ah an chim.
A thimi hna hi zung hngaktu le KIO nih an tlaih mi thongtla hna an si i, hliamhma tuar zong an um pin ah cu zung cu SAC ralkap nih an khangh, tiah Saitmu ummi pakhat nih a chim.
KIO thawngzamhtu chungtel pakhat nih cun, “Cuka zung ah cun ramkhel thongtla 20 le zung hngak 5 an um i, cu chungah cun minung 7 an thi. Thongtla mi hi rithai-sii ruangah tlaih a tong mi an si, zeidang sualnak nganpi a tuah mi cu an si lo,” tiah RFA ah a chim.
Hpakan peng, Saitaung khuate ah a um mi Kachin Independence Army (KIA) zung pakhat cu June 20 zaan sml 10:00am hrawng ah an luh hnawh hna i 30 nak tlawm lo an tlaih hna i a thi mi zong an um tiah The 74 Media nih a langhter.
“Minung zong an tlaih hna. A pawngkam inn minung zong an kalpi hna.
Nizaan mi tampi zong an kah hna. Zatlang bawmhnak mawṭaw 5 zong an kalpi caah kahdohnak chung ah kaphnih lei in minung zeizah dah an thih zong a fiang in theih a si rih lo”tiah KIA bawi pakhat nih The 74 Media ah a chim.
KIA nih an tlaih mi pawl zong SAC ralkap nih an kalpi hna i June 20 i kaphnih karlak kahdohnak chung ah a thi mi zong an um tiah theih a si.
“KIA nih bia an ceih ding thongtla pawl zong an um. A thi mi zong an um. Nizaan ah an rak kan kah caah zinglei sml 5:00am tiang kahdohnak thawng a thang” tiah a chim. Cu KIA zung pawng ah a um mi inn pawl zong SAC ralkap pawl nih an khangh tiah The 74 Media nih cun a langhter. A luancia March 1 zong ah Hpakan khua Hpapin khuate ah a um mi Kachin Traditional zung ah meeting a tuah mi KIA bawi pawl SAC ralkap nih an luh hnawh hna i 30 hrawng an rak tlaih hna.
Mandalay ramṭhen, Madaya peng, Kyatpin khua phungki sianginn ah hmunhma a khuar mi SAC ralkap pawl Sniper in an kah hna i 2 an thi tiah Myananda Operation phu nih an thanh. June 20 chun sml 11:00am hrawng ah Yongpin khua in Kyatpin khua ah hmunhma khuar ding in a rak lut mi SAC ralkap 40 hrawng cu Myananda Operation phu nih Sniper in an kah hna caah SAC ralkap 2 an thi tiah theih a si.
Myananda Operation phu nih SAC ralkap pawl hmual ngei deuh in kan doh khawh nak hnga bawmhnak kan herh rih ko tiah mipi hna sin ah bawmhhalnak zong an langhter chih. Karen ram, Kyondoe khua pawng, Electric zung pawng ah hmunhma a khuar mi SAC ralkap pawl 010 Fixed-Wing Drone in bom an thlak hnawh hna i 2 an thi tiah Kalon phu nih an thanh.
June 19 ah Kyondoe khua in Kawkareik peng lei ah chuahnak, Electric zung ah thazang 30 hrawng in hmunhma a khuar mi SAC ralkap pawl Kalon phu nih 010 Fixed-Drone in bom an thlak hnawh hna i SAC ralkap 2 an thi, 3 hliam an tuar tiah theih a si. Kahdohnak chung ah Fixed-Wing Drone phu, Spring UAV Force – G3 hna bawm in kahdohnak an tuah tiah theih a si.