Ukraine Russia Kahdohnak Ah Ukraine Nih Ni Khat Hnu Ni Khat Hlawhtlinnak A Hmuh
=========
Ukraine nih Zaporizhizhia le Donetsk hmunhma ah kahdohnak fakpi a chuak ti ah chim in, kan ralkap cu khuathlang lei an panh i Kyiv counter-offensive ah teinak hmu in hmailei kan panh thluahmah ti ah an chim.
Ukraine deputy defence minister Hanna Maliar nih a chim mi cu kahdohnak hmunhma paoh ah hlawhtlinnak kan hmu kan ralkap hna nih Bakhmut pawngkam lehmah 200-250 le Zaporizhzhia khuapi in lehmah 300-350 tluk hlat in an kulh dih hna tiah a chim. Ukraine nih caan saupi an rak hngah mi counter-offensive an ngeih khawh ruangah kan hnu zarh chung khan Donetsk ram ah khuapali an lak ṭhan tiah theih asi.
Nigeria Ah Tilawng Lehnak In Minung 100 Leng An Nunnak A Liam; Nigeria ramchung chaklei hmunlai ah minung tam ngai a phurtu tilawng leh sualnak ruang ah minung 100 leng an nunnak a liam, tiah an ram cozah in ṭuanvo ngeitu hna nih June 14 ah an chim.
“Mah tilawng hi ṭhitumnak puai in a rak tlungmi mipi hna phurtu a si i, Niger ramkulh in Quara ramkulh tivapi a tan lio ah atu bantuk in aa leh sual hi a si. Tilawng lehnak in minung 103 an thi” tiah palik lei chimphuannak nawlngei tu Ajayi Okasanmi nih Reuters thawngzamhnak ah a chim.
Tilawng aa citmi hi minung zeizat an si theihfian a si rih lo nain tualchungmi hna nihcun minung 200 leng nih an i cit, tiah an chim. Nigeria ram hi hriamtlai phu hna ṭihphan ruang ah mipi nih khual an tlawn tik ah tilawng deuh an hmannak ruang a si, tiah theih a si.
Monywa Khuapi CTC Sianginn Ah Umhmun A Khuarmi SAC Ralhrang An Kah Hna, 3 An Thi; Sagaing ramṭhen, Monywa khuapi um GTC sianghleirun ah umhmun a khuarmi SAC ralhrang pawl kan kah hna caah ralhrang 3 an thi, tiah Golden Eagle Force- Monywa in ṭuanvo ngeitu pakhat nih June 15 ah a chim.
June 14, nizan chung suimilam 1:00 tluk ah a thlithup in an luhhnawh hna i an kahdoh hna caah minute 6 chung kaphnih kar kahdohnak a chuak. Gate kutka ah a ummi SAC ralhrang 4 chung ah 3 an thi i, dot 3 naak ah a ummi SAC ralhrang pawl nih an kah hna caah mipi ralkap in minung pakhat nih a lu ah hliamhma a tuar caah mipi ralkap hnulei an tholh ṭhan, tiah Khit Thit nih a langhter.
Cu kahdohnak cu Golden Eagle Force- Monywa, Red Star Fron-PLA, Brahmin guerrilla force, Wild Buffalo Guerrilla Force hna fonh in an si, tiah kan theih. Crd; Lungmili Post