Ramri Hngak SAC Palik 29 Cu Hriamnam He Bangladesh Ram Ah An Zaam Ṭhan. Rakhine ramkulh, ramri hngak SAC palik 29 cu nihin March 11 ah Bangladesh ram ah hriamnam he an lut, tiah Bangladesh nih an thanh.
Nihin March 11 ah Maungdaw peng, Aungthapye ramri hngak palik sakhan in SAC kuttang palik 29 cu hriamnam i put in Bangladesh ram ah an zaam i Bangladesh ṭuanvo ngeitu nih an hriamnam cu an laakpiak hna, tiah theih a si.
SAC palik 29 Bangladesh ram i an zaamnak kong cu Bangladesh ramri hngak phu in ṭuanvo ngei le chimnak nawlngei Md Shariful Islam nih nihin March 11, chunhnu suimilam 2:30 hrawng ah fehter in a chim.
A luancia February 4-7, ni 4 chung Rakhine ralkap AA he an i kahdoh ruang ah SAC ralkap le palik 330 cu Bangladesh ram ah an rak zaam i February 15 ni ah tilawng in Myanmar ram ah an rak kuat ṭhan hna. The Chin Post
Relchap: Chin ramkulh, Matupi pengkomh, Lailenpi khuapi pawng um, Pasei khua ah tualchung mi 1 le khuabawi pa cu Maraland Defence Force (MDF) nih an tlaih hna i an kalpi hna, tiah tualchung mi hna sin in theih a si.
2024, March 9, zanlei sang ah Pasei khua khuabawi pa le tualchung mi 1 cu MDF nih an inn ah an tlaih hna i an kalpi hna, tiah tualchung mi pakhat nih a chim.
“MDF hriamtlai pawl cu khuachung ah an rak lut i khuabawi pa telh in tualchung mi 2 an tlaih hna hi a si. Zeiruang ah an tlaih hna timi an chim lo i atu tiang an thlah rih hna lo” tiah Pasei khuami pakhat nih a chim.
Tlaihkhih a tong mi hna cu khuabawi Pu Kyaw Aung le Pu Ra Khei hna an si i nihin tiang an thlah rih hna lo bantuk in pehtlaih khawh zong an si lo, tiah theih a si.