Breaking News; Twan Mrat Naing a ralkap nih a zaam tak e!!

AA Ralkap Pakhat Tatmadaw Ralkap Sinah A Zaam, Tiah SAC Ralhrang Thawngzamg Tatmadaw Daily Activity Nih A Tial !!
====================
Tatmadaw Daily Activity nih a tial ning ahcun, “Nizaan Maungtaw, Yan-Aung-Pyin pawng kahdohnak ah AA le a thi mi le hliamh mi an tam tuk ii a lung rawh tuk caah AA-23572 in ralkap Kyauk Taw pengkulh , Thinn Ma khua mi Kyaw Min Htay (17) cu zaan lei ah Tatmadaw ralkap pawl an um nak lei ah a zaam i, hriamnam a chia.

AA nih hmunhma an laak nak hmun hma pawl cu an hrawh dih caah nikhat ah minung 50 leng an nunnak a liam ii hliam a tuar mi tam tuk a hmuh hna caah hliamtuar mizaw pawl an lak hna lio ah, ka zuun ka zung ta lai, tiah a ti hna i Tatmadaw sinah hriamnam chiah in a zaam nak hi a si.

AA chimphuan ngeitu Khaing Thu Kha a chim ning ahcun AA phu chungah a rak lut mi an tam ko nain tualchungah kum tlinglo mino pawl an duh nana loin an khawmh hna ii ral tuk dingah an thlah hna caah a thimi tampi an um.” tiah Tatmadaw Daily Activity nih a tial. Cakilk-Fehter kho mi kan ngei lo. Kan fehter mi zong a si lo.

Kalay Peng Ah SAC Ralkap Nih Lamkam Thingkung An Hau Tiah Tualchung Mi Nih An Chim! Kalay-Tamu motor lampi telh in Kalaymyo pengchung hmun tampi ah a ummi thingkung hna cu SAC ralkap nih tuthla chung ah nitin ngawt in thingkung an hau kan hmuh, tiah tualchung mi hna nih an chim.

Kalaymyo pengchung lamkam ah cinmi thingkung hna SAC ralkap nih an haunak a ruang hi khuapau a si cang caah vanlei kahdohnak ding timhtuahnak an ngeih caah a si kho, tiah tualchung mi hna le PDF nih an zumh. “Thinkung a nganmi pawl cu a luancia thla hnih hrawng in an hau cang hna, PDF cawlcanghnak hmunhma lawng siloin hmun tampi ah thingkung cu an hau.

Van lei kahdohnak tuah a timh caah a si lai tiah an lunghrinh cio. Ruahchanmi ngei tein tuahmi thil a si,” tiah Kalaymyo khuami pakhat nih a chim. Tualchung hriamtlai phu hna nih lamkam ah a ummi thingkung cung ah bomb hmanh in kahdohnak an rak tuah caah SAC ralkap hna nih lamkam thingkung an haunak a si tiah thawngpang a rak leng bal cang. Asinain atu ah PDF thazaang a ṭhawnnak hmun lawng ah siloin pengkulh chung hmun tampi ah SAC ralkap nih thingkung an hau, tiah tualchung mi hna nih cun an chim.

“SAC ralkap nih thingkung an hau kan hmuh, vanlei kahdohnak tuah a timh tiah thawngpang zong a leng, kanmah lei zong nih a hlankan in timhtuahnak kan ngei ko,” tiah Kalaymyo peng tualchung hriamtlai phu chungtel pakhat nih a chim. SAC ralkap hna nih cun anmah pumpak in thingkung cu hau lo in Department of Construction cu an hauter hna. Cucaah Construction zung rianṭuantu hna cu SAC ralkap fialmi ṭuan lo ding in tualchung hriamtlai phu hna nih ralrinnak an pek hna.

Mandalay Ramṭhen, Matayar Peng Ah Bomb Puahnak In SAC Ralkap 9 An Thi Mandalay ramṭhen, Matayar peng Muaitalaing(မြွေတလိုင်း) khua um SAC ralkap pawl cu bomb in kan puahhnawh hna caah SAC ralkap 9 an thi, tiah bawino Tea nih a chim. Mandalay ramṭhen, Matayar peng Muaitalaing khua ah umhmun a khuar i, Ayeyarwaddy a tlaklei Wetlet peng ah hriamngan in a kaptu SAC ralkap pawl cu nizan November 14 zing sml 9:00 hrawngah Muaitalaing khua in an chuah lei ah bomb in kan puahhnawh hna i, SAC ralkap 9 an thi, pakhat hliamhma fak ngai a pu, tiah Bawino Tea nih cun a chim.

Bomb kan puahhnawh hna sml pakhat a rauh ah Matayar khua in SAC ralkap 300 hrawng cu Ayeyarwaddy tiva thluan in an chuak i, khuate cheukhat ah umhmun an khuar, tiah tualchung mi hna nih an chim. Cu kahdohnak ah cun Tawkyi Myaway pyaw(တောကြီးမြွေပွေး) le Daung Shwe Bo pengkomh Battalion 17 hna i bawm in an kah hna, tiah theih a si. SAC ralkap nih Matayar peng Ayeyarwaddy tiva thluan ah a ummi khuate tam ngai ah rallam an sial i, khuami tam tuk ralhrial in an zam, tiah theih a si.

SAC Nih Thimnak An Tuah Dingmi Kan Cohlang Lai Lo – Malaysia, SAC nih a ra laimi thimnak tuah an timhmi hi kan cohlang hrimhrim lai lo, tiah Malaysia ramdang minister Saifuddin Abdullah nih a chim. Thimnak he aa pehtlaimi upadi vialte SAC nih an remhmi hi hramhram in an remhmi a si i, mi zeihmanh nih an fehter lomi a si caah kan cohlang lai lo, tiah a chim.

“A luancia Myanmar thimnak kha cu a za longmi le a dikfelmi thimnak a si. Vawleipi nih a cohlanmi zong a si. SAC nih thimnak tuah an timhmi hi cu upadi he aa kalhmi a si caah kan cohlang lai lo, tiah online in thawngpang fianternak tuah lioah atu bantukin a chim.
A luancia thimnak lioah Democracy a dirpi hna nih teinak an hmuh ko nain Hluttaw tonpumhnak an ngeih hlan ah SAC nih nawlngeihnak an lak. Cucaah SAC nih thimnak tuah an timhmi hi Malaysia le ASEAN nih cohlan dingah a si kho lomi thil a si pinah tlukruannak a um lomi a si, tiah Malaysia minister Saifuddin Abdullah nih cun a chim.

Indonesia ram Bali tikulh ah tuah dingmi ram ngan 20 (G-20) lutlai upa hna tonhpumhnak ah a kai ve dingmi UN General Secretary António Guterres he zong online in Myanmar ram kong ceihmainak kan ngei, tiah Saifuddin Abdullah nih a langhter. Myanmar rammi har tongmi hna hi vawleicung ramkip nih bawmhchanh an i timh ko nain SAC nih an cohlan lonak kong zong Malaysia minister Saifuddin Abdullah nih thawnglatu pawl sinah a chim chih.

Nutung Muidawh Zuamnak Ah Chin Nu Sarah Boih Nih Laksawng Phun Li A Co, Mandalay ah nutung muidawh zuamnak tuahmi, Mrs Grand International 2022 ah Chin nu Sarah Boih nih nizan November 14 zan ah laksawng phun li a co, tiah theih a si. Sarah Boih nih laksawng a comi hna cu:- (1) Mrs. Grand International Standard Winner . (2) Mrs. Friendship Award.

(3) Mrs. Popularity Award. (4) Mrs. Best Talent Award hna an si. Mrs Grand International 2022 zuamnak Winner laksawng cu Vietnam ram aiawh in aa zuammi nu nih a co i, nutung muidawh zuamnak ah ram 30 an i tel, tiah theih a si. Sarah Boih cu fanu pathum a ngeimi a si i a fanu pathum le a vapa he Yangon ah khua a sami an si.

Myanmar Buainak Kong Kan Tlangtlak Kho Hna Lo – UN General Secretary, Myanmar buainak kong he pehtlai in vawleicung ramkip le UN nih remhdaih khawhnak dingah kan tlangtlak kho hna lo, tiah a luancia November 13, Cambodia ram ah tuahmi ASEAN lutlai upa tonpumhnak ah UN General Secretary Antonio Guterres nih a chim.

Myanmar rammi hna cu a fak bikmi harnak nih a den hnanak kong le SAC nih thong an thlakmi hna zong a rannak in chuah ding le hramhram in SAC nih thil an tuahmi ngol ding zong UN General Secretary Antonio nih a chim. A ra laimi ASEAN Chairman a ṭuan dingmi ram cu Indonesia an si lai i anmah nih Myanmar ram kong ah biatak thlak in thil an tuah lainak kong a zumhnak zong UN General Secretary Antonio nih a chim chih.

Myanmar ram kong tawlreltu UN palai le ASEAN ram kong tawlreltu Myanmar palai he i bawm in Myanmar ram Democracy co ṭhan khawhnak ding ah fak piin kan i zuam lai, tiah UN General Secretary Antonio nih cun a langhter. US President Joe Biden zong nih Myanmar ram Democracy hmuh ṭhan khawhnak ding ca ah fak piin kaa zuam lai i, ASEAN nih biahren an chiahmi phung hi SAC nih an zulh awk a si, tiah a forhfial hna.

ASEAN nih biahren an chiahmi 5 cu SAC nih kum khat le a cheu chungah pakhat hmanh a zulh lo caah SAC nih ASEAN biahren a zulh ṭhannak ding ah caan ri khiahpiak in ASEAN hruaitu hna nih bia an chah, tiah theih a si. SAC nih cun Myanmar ram kong ah ASEAN cu zeihmanh i thlak lo ding in cathanh an chuah. Crd-The Chin Post