Breaking News: Tuzing Ralhrang nih sakhan an lakmi cu Mipi ralkap phu nih an phomh ve cang hna!

Breaking News: Tuzing Ralhrang nih sakhan an lakmi cu Mipi ralkap phu nih an phomh ve cang hna!
==========
Kalay PDF Sakhan A Latu SAC Ralhrang Ralkap Cu Tualchung Hriamtlai Fonhmi Phu Nih An Kahdoh Than Caah Kahdohnak A Fak! Sagaing ramthen Kalay peng Pyitawtha khua chungah tualchung hriamtlai fonhmi phu le SAC ralhrang ralkap karlak ah April 13 zinglei sml 10:30 thawkin chun sml 1:00 tiang an i kap tiah thawng kan theih.

SAC ralhrang ralkap nih April 12 ah PDF Kalay Battalion (3) sakhan an laaksak i, hriamnam tampi an chuhsak pinah sakhan zong mei an khanghpiak tiah thawng kan theih. Cucaah lehrulh chamnak in tualchung hriamtlai fonhmi phu nih SAC ralhrang ralkap rual an kahdoh than hna i, cu kahdohnak caan chungah hriamngan vawi (40) lengkai a puak tiah pawngkam tualchung mipi nih an chim.

Nihin kahdohnak ah SAC ralhrang ralkap leikap ah 100 tluk an um lai tiah ruahdamh a si i, kahdohnak a chuahnak pawngkam khua (6) i khuami dihlak cu himnak hmunah an zaam tiah thawng kan theih.

SAC ralkap nih PDF-Kalay Battalion 3 sakhaan an lak, hriam tampi chuh an si. Nitlaklei Kalay ah a ummi PDF-Kakay battalion 3 cu SAC ralkap nih April 12 zinglei ah an luhhnawh hna i sakhaan an lak tiah theih a si.

SAC ralkap pawl cu Kalay 9 miles lei in Chin ram Tedim tlang cungah ke in an kai i an hnulei in sakhaan an lak hi a si. SAC ralkap pawl he aa tongmi, sia kawl ah a vakmi, Chinmi 2 zong zaan 1 chung an hren hna i an thlah ṭhan hna.

SAC ralkap nih PDF-Kalay battalion 3 sakhaan chung in pistol zuun 11, 2MM 1, bom kuan 5, RPG 4, Kuan 2,700, AK-47 kuan 50, kuttuah bom 25, kuttuah bom hlonhmi 8, miset 1, icon 1, tents 22 le a dangdang tampi kan chuh khawh hna tiah SAC nih a thanh.

An chuh khawhmi hna thilrii a zapi te man hi sing 100 leng a si. Cun, sakhaan chung eidin le fenaih vialte cu SAC ralkap nih an khangh dih. SAC nih sakhaan an laknak ah PDF-Kalay in minung 1 a nunnak a liam i 1 an tlaih tiah theih a si.

ZRA cu “Ralhrang Bu” an Si tiah CJDC nih a Fehter. Tu thla April 7-12 tiang Chinland Joint Defense Committee (CJDC) meeting cu CNF/A Headquarters Camp Victoria ah an tuah i, Zomi hriamtlai ZRA cu “Ralhrang Bu” an si, tiah Chin ramkulh chung hriamtlai bu 18 nih an fehter.

“ZRA (Eastern Command) nih Chinmi hna cung ah thahnawnnak, hremnak le dohdalnak pawl an tuah timi tehte fek tein kan hmuh. Cun, SAC ralhrang he an i bawm timi zong tehte kan hmuh. ZRA nih Tedim le Tonzang an aiawh lo. Cucaah, ZRA (Eastern Command) cu Ralhrang Bu an si tiah kan fehter,” tiah CJDC nih nihin ah cathanh an chuah.

CJDC tonpumhnak ah CNF/A, CDF-Paletwa, CDF-Kanpetlet, CDF-Daai, CDF-Hualngoram, CDF-Hakha, CDF-Thantlang, CNO/CNDF, CDF-Mindat, CDF-Mara, CDF-Zotung, CDF-Lautu, CDF-Zophei, CDF-Matupi, CDF-Tonzang, CDF (CDM)-Siyin, CDF-KKG le ZFU/PDF-Zoland in aiawhtu hna an kai kho.

Hmandaw Khua Mino 3 SAC Ralkap Nih An Thah Hna! Hmandaw khua mino 3 Pu Thang Bik (kum 29) le a naupa Salai Ni Dun Sang(kum 19) le Pa Lian Thio cu (kum 31) SAC ralkap nih an tlaih hna i an thah hna hnu ah an ruak van la uh tiah an chungkhar an ti hna.

Kan hnuzarh cacawn ninga ni, April 8 ahkhan Pu Thang Bik le a naupa Salai Ni Dun Lian le an hawipa Pa Lian Thio hna cu ralzam in an i dornak hmun ah an eiding facang a dih cang caah Hmandaw khuachung ah an lut i facang an va rial, an rak kir lei ah Biakinn hmai ah SAC ralkap he an i tong an tlaih hna hi asi a thaizing April 9 ah an ruak van la uh tiah an chung le thawng an thanh hna.

Hmandaw khua cu khuami nih an chuahtaknak thla 2 hrawng asi cang caah khuami nih an ruak zong an la ngamlo i Taungkhayan khua an sahhlawh hna nih nizaan April 11 ah khan an ruak cu an va lak i an vui hna tiah kan theih.
”April 9. Saturday ah khan cun an thi cang tiah thawng kan theih i, An ruak hmuh rih lo si tik ah kan zum kho rih lo, (တောင်ခရမ်း) Taungkhayan ummi Kan chungkhat kan va zoh ter hna le, Aaa kan si ngai ngai ko e, an kan ti e, Sunday lawng ah bia fiang kan thei ve” tiah Pu Thang Bik i a farnu nih The Chin Post ah a chim.

Ralzam nak ah eiding facang a um tilo caah ka pa nih khuachung ah facang rial a fial hna i an rial dih i an kir lei ah SAC ralkap he an i tong i an tlaih hna hi asi, Hmandaw khua cu khuapi tein kan chuahtak cang i minung pakhat hmanh khuachung ah an umlo tiah a chim chap. Credit: The Chin Post

Paletwa Peng AA Cawlcanghnak Ruangah Tualchung Mi Thinphang An Um! Chinram thlanglei Paletwa ah Rakhine ralkap AA nih an herh mi tuahpiaktu ding ah khuate pakhat ah minung pali cio ṭuanvo an pek hna i, ukhruainak hrampi an ser ning ah Paletwa khua mi(Chin) hna cu thinphang a um, tiah Khonutum nih a langhter.

“AA ralkap pawl nih Pii tiva thluan um khuate hna cu, khuakhat ah minung pali cio in an thim hna i, Chin mi lawng te an si hna. AA pawl bia an al ngam lo caah ṭuanvo an khinh mi poh cu an tuahpiak hna,” tiah Paletwa khua mi pakhat nih a chim. AA nih Paletwa nitlak lei um Pii tiva le chaklei khuakomh 20, khua 100 hrawng cu khuakhat ah minung pali cio an thim hna i, anmah an herhmi tuahtu ding ah ṭuanvo an pek hna, tiah a chim chap.

Khua mi an thim mi pawl cu AA nih an auh tik hna ah an kal te lai, atu zong ah khua cheukhat auh mi hna cu AA sakhan ah an kal pah cang ti zong theih a si. Rakhine ralkap AA nih mizapi cu hramhram in an auh hna i, ngunkhuai zong an laak. AA ukhruainak tang ah ṭuanvo an pek mi hna nih an ṭuanvo an cohlan lo ahcun Kin(ကင်း) khua mi harnak an kan pek lai, tiah Paletwa mi nih cun a chim.

Paletwa peng ah khuakomh 196, khuate 400 hrawng a um i, AA cu 2015 thok in Paletwa peng ah umhmun khuar in an cawlcang. Atu lio zong ah Paletwa khua chaklei: Kuanbauh, Kyaukpindaung, pingneytapin, themachaung, cuaidaung, kyilay, maungnamah, cawngchaung le chindauh khua hna ah AA nih umhmun an khuar, tiah theih a si.