Breaking News: Tuzing Falam inn kanghnak ah a kal ve mi pakhat telh, minung pathum sin in COVID-19 zawtnak hmuh

Breaking News: Tuzing Falam inn kanghnak ah a kal ve mi pakhat telh, minung pathum sin in COVID-19 zawtnak hmuh
========
2021 January 12 zing suimilaam 3:00 le 4:00 karlak i Falam khuapi, khuachung lam aa tonnak hmun i inn kanghnak ah a kal i rian a tuan ve mi pa pakhat le minung pahnih dihlak fonh minung pathum sin in COVID-19 zawtnak hmuh a si tiah kan theih.

Hi kong he pehtlai in rian ngei pakhat nih, “Atu zawtnak hmuh thar mi hi an dihlak ah minung pathum an si. An pathum ning in Falam i Tonzaang pa zawtnak hmuh mi pa he Falam Golf (kouh-ti) kun honnak ah Glof an tu ti hna. Zawtnak hmuh mi he Glof an tuk ti hna ca ah amah he aa naihniam mi poh zawtnak kan chek hna i atu minung pathum sin in zawtnak kan hmuh hi a si. An pathum ning in Falam khuachung ah a ummi an si,” tiah a chim. Chin Ramkulh chung COVID-19 zawtnak a chuah ka 2020 March 23 in nihin tiang ah zawtnak ngei minung 339 an si cang i chung ah minung pathum nunnak liam.

An pathum chung ah pakhat hi Falam Sipin Zung Lutlai pakhat aa tel. Zawtnak hmuh mi minung pathum hna chung ah pakhat hi tuzing inn kanghnak hmun ah a kal ve i rian zong tlawmpal a tuanpi ve hna. Cun, atu hi Sipin zung riantuan zong an dihlak in zawtnak an chek lio hna tiah kan theih.

Myanmar ram chung ah nihin tiang COVID-19 zawtnak ngei dihlak 131,186, zawtnak in a dam than mi minung 114,609 le zawtnak in a thi mi minung 2,858 an si cang tiah 2021 January 11 zaan suimilaam 8:00 ah Ramkomh Ngandamnak Zung nih a thanh. Credit: The Hakha Post