SAC Jet Fighter Kan Thlak Khawh Tiah KPLF Hruaitu Pakhat Nih A Chim
====================
Karenni ramkulh, Bawlakhe peng, Thanlwin tiva kam BGF battalion 1005 umnak pawng ah SAC ralkap raltuknak vanlawng pakhat kan kah i kan thlak khawh, tiah Karenni People’s Liberation Front(KPLF) in hruaitu pakhat nih a chim.
Nizaan June 30, zinglei suimilam 11:00 hrawng ah SAC ralkap raltuknak vanlawng pakhat cu kan a thlak, a tlaknak pawngkam ah cun a dang ral tuknak vanlawng, helicopter le vawlei lei ralkap nih an ventuk caah a tlami raltuknak vanlawng cu kan zoh kho lo, tiah a chim.
Kaphnih kar kahdohnak ah SAC ralkap hna cu KPLF, KNLA, KNDF, Bawlakhe PDF le Central Region PDF phufonh nih an kah hna. Kap hnih in a thi mi le hliamhma tuarmi hna kong fiang tein theih a si rih lo. A luancia June 23 in SAC ralkap nih Bawlakhe ah hmun hnih in rallam an sial pin ah meng 12 hmunhma zong ah hmun li in rallam an sial i kaphnih kar kahdohnak a fak ngai, tiah Khit Thit Media nih a ṭial.
Rohingya miphun kong ah biatak tein a cawlcangmi Aung Kyaw Moe cu June 30 ah NUG nih nuhrin covo zung ah Deputy Minister rian an pek, tiah CRPH nih an thanh. Mizapi nih Democracy phungning tein an kan pekmi nawlngeihnak hmang in Federal Democracy cahren ning he Aung Kyaw Moe cu NUG nuhrin covo zung ah Deputy Minister ṭuan ding in kan thim, tiah CRPH nih an langhter.
Aung Kyaw Moe cu NUG nih cozah chung ah Islamic bianak a zulmi lakah Minister a pakhatnak a si. Aung Kyaw Moe nih cun, “Rohingya miphun chung ah keimah an ka thim hi Myanmar ram ramkhel rian ah miphun kip le biaknak tlukruang tein zohkhenh le kilven ding langhternak ca ah a si,” tiah a chim.
Anih hi NUG nuhrin covo zung ah ruahnak petu rian dirhmun in 2021 thawk khan a rak ṭuan cangmi a si. Aung Kyaw Moe cu remdaihnak le nuhrin covo kong a aupi ruangah France cozah tang um nuhrin covo laksawng, 2019 kum ah khan EU Schuman Award telh in international laksawng 4 a co cangmi a si.