Rithaisii A Zuartu Le A Tawngtham Mi 6 Tamu- PDF Nih An Tlaih Hna
==========
Sagaing ramthen Tamu khua, Nan-kala sangchung ah Rithaisii a zuartu minung 1 le a tawngtham mi minung 5 hna cu May 26 zanlei suimilam 1 tluk ah PDF-Tamu Battalion 4 nih an tlaih hna tiah kan theih.
Tamu khuachung ah rithaisii cu langsar ngaiin a zuar mi le a tawngtham mi an um tiin thawngpang pek nak in PDF nih check hlatnak an tuah i a zuartu telh in minung 6 an tlaih hna hi a si.
“Rithaisii a zuarmi cheukhat hna cu meithal i ken in a zuarmi zong an um hna, rithaisii a tawngmi an tam bantuk in tangka herh ah cycle tlau zong a tam, thiltha lo tuah mi cu an hnulei in firnak le thatnak nak tuah duhnak nih a zulh colh hna.” tiah PDF- Tamu Battalion 4 tuanvo ngeitu pakhat nih a chim.
“Tlaih a tongmi hna cu a voikhat nak ralrin pek nak ah voi 30 cio kan tuk hna, hihnu ah sualnak an tuah than ah cun thong kan thlak cang hna lai” tiah a cunglei upa nih a chim. Mah hna 6 sin in Rithaisii bawm 1, Palang 1, WY tlang 2, phone 4, tangka le Rithaisii he aa pehtlai mi thilri dang zong an tlaih chih hna. Tamu peng May thla chung ah Rithaisii ruangah minung 10 leng PDF nih an tlaih cang hna tiah kan theih.
Bible Sianginn Kai Aa Timmi Chin Mino 3 SAC Ralhrang Nih An Tlaih Hna I An Hrem Hna; Chin ramkulh, Mindat peng mino pa 3 hna cu Bible sianginn kai dingin an kal lio ah SAC ralhrang nih an tlaih hna i an hrem hna hnu ah minung pakhat lawng an thlah ṭhan, tiah theih a si.
A luancia May 23 ah khan Bible sianginn kai dingin motor he an kal lio ah Magway ramṭhen, Chauk (ချောက်) khuapi um SAC Checkgate ah pa mino 3 hna cu SAC ralhrang nih hramhram in an tlaih hna i an hrem hna, tiah mit hmutu hna nih an chim.
“Mino 3 chung ah 1 cu an thlah ṭhan, an tukvelh hnu ah an thlah ṭhan hi a si. A dang 2 hna cu kan thlah hna lai lo an ti i, an kalpi hna caah nihin tiang an thawngpang kan thei kho ti hna lo” tiah mit hmutu nih May 25 ah a chim.
Sualpuh in tlaihkhih a tongmi mino 3 hna cu Mindat peng tualchungmi hna an si i, SAC ralhrang nih an kalpimi mino 2 hna hi nihin tiang an thawng theihkhawh a si ti lo caah an chungkhar hna nih theih an duhnak kong cu The Mindat Post ah an chim.
Mindat Khuachung SAC Ralhrang Hriamngan Tlaknak In Nu Pakhat A Nunnak Liam; Chin ramkulh thlanglei Mindat khuachung ah May 24 zing suimilam 11 tluk ah SAC ralhrang kah mi hriamngan tlak hnawhnak in kum upa nu pakhat a nunnak a liam tiah kan theih.
Mindat khua Vuan Thu Maung pangpar dum ah pawng ah dum a thlo lio mi kum upa nu pakhat cu hriamngan nih a tlak hnawh caah a hmun ah a nunnak a liam hi a si. “Hi hriamngan cu Mindat khua hrambunh Khah-lah-yah (ခလရ) 274 in an kah mi a si. Hriamngan nih a tlak hnawh mi nu cu a ruak zong lakawk tlak lo tiangin a rawk dih i chungkhar hna nih a ruak vui an timh nain SAC ralhrang hna nih a ruak an pe duh hna lo” tiah khua mi hna nih an chim.
“Mah ni zingka in hriamngan an kah i zan suimilam 8 tiang pehtlai in an kah peng, hriamngan le meithal pehtlai in an puah paoh ah raltuknak Jet Fighter le mingia tu vanlawng a ra tawn” tiah Mindat khua mi Ki Shwe nih a chim. Mah ni thiam ah Kyaukhtu khua SAC ralhrang nih Magway le Chin ramri lei ah hriamngan an vun kah lengmang caah ralzam umnak pawngkam zong ah a tla i a puak tiah kan theih.