Lungkhar Tlanghrawn Kahdohnak Ah CNA Pahnih Nunnak Liam!
====================
2023 June 12, Hakha le Thantlang kar Lungkhar tlanghrawn Vankham Operation zinglei sang kahdohnak ah CNA ralkap 2 nih ram le miphun ca ah an nunnak an pek, tiah theih a si. Thawng kan hlatnak ah, “Zing suimilam 5:00 hrawng in Hakha Khuhsilubo tlang in hriamngan tam taktak an kah. Tanglei zong in hmaitonh in an i kap i Chin ralkap umnak sakhan pakhat zong an laak,” tiah kan theih. Tutan Vankham operation ah Chin ralkap 17 nih nunnak an pek i SAC ralkap lei zong in tam ngai a thi mi le hliamtuar mi an um ve, tiah theih a si. crd-The Chin Post
Chin Ramkulh, Falam peng, Rihkhawdar ralkap sakhan chung in SAC ralkap pahnih cu CNDF ralkap sin ah an zaam, tiah 2023 June 10 ah cathanh an chuah. Atu a zaam mi SAC ralkap pahnih hna hi June 6 ahkhan CNDF ralkap check gate ah MA1 zuun khat, kuanbawm 4, kuan 330 le MG1 kut cheh bomb pakhat hna he an tlaih mi hna a si. Atu bantuk in a zaam mi SAC ralkap pahnih hna hi, Chungkhar he zalong tein an i chawnh khawh lo ruang ah le zalong tein an um khawh lo ruang ah a zaam mi an si, tiah theih a si. Jun 4 ahkhan , atu a zaam mi hna hi Rihkhawdar SAC ralkap sakhan in duty an tuah lio June 4 ahkhan a zaam mi an si.
Atu a zaam mi SAC ralkap hna umnak Rihkhawdar sakhan ahhin ralkap thazaang minung 55 an um i minung 10 leeng cu mipi ralkap sin ah an zaam tiah theih a si. SAC ralhrang ruangah hmun dangdang in Senthang peng chungah ralzam in aa dor mi hna cu Biaknak lei le zatlaang phu hna i bawm i hmun pakhat ah hmunhma chiah piak in bawmhnak an pek hna. Ralzam camp um mi chung in Commitee dirh le zulhding phungphai zong an ser, cu chungah a bik in Camp chungah ralthuam in luh lo ding le Camp um mi hna nih luhchuah duh paoh ah Committee theih ter hmasa ding tiah zulhphung an nei.
Cu zulhphung cu CDF-Senthang aa ti mi chungtel minung 3 nih nawlngai lo in 2023 April 10 ah tuanvo ngeitu pakhat cu velh in an hrocer. Sual a tuah tu hna cu Senthang Council nawlpek nak in CDF-Hakha Council biaceih bawi nih tlaihding in April 10 ah nawl a chuah i April 24 ni ah Palik hna nih an va tlaih hna. CDF-Senthang aa ti mi hna nih lam ton nak check gate pakhat ah an hruaitu (တပ်ရင်းမှူး) thit hruainak in ralkap minung 15 hna nih hriamnam tling he hnahnawhnak an rak pek hna pin ah thongthlak a tong mi hna cu hramhram in an chuah pi hna.
Cucaah a tuni tiang biaceih lo in an luat. CDF-Hakha Council nih ralkap thazaang le a herh ningin kan cawl kho ve ko nain a herh lo tiang thisen a chuak lai tiphan ah kan lung kan thul. Sualnak a tuah tu hna cu biaceih piak than dingin biafunnak kan nei than. Cucaah tualchung mipi nih an herh mi deihnak, biaceih khuakhan nak kongkau le zatlaang nun kongkau a dawnkhan tu mizei bantuk phu le pumpak paoh CDF-Hakha Council nih a herh ningin tuanvo kan lak cang hna lai. A cunglei CDF-Senthang nih an thil tuah mi cu fak piin kan doh i hi hnu ah hi ban tuk thil cang ti hlah seh tiah CDF-Hakha Council nih June 10 ah ralrin peknak cathanh an chuah.