Thawngpang Fonh!
=============
Internet Ah Myanmar Ralzam Ca Ah Bawmhhalnak A Tuahtu Pa Pakhat Cu Mizoram Palik nih An Tlaih-Internet ah min deu hmang in Myanmar ralzam bawmhnak halpiaktu, Siaha khuasa mi pakhat cu kan tlaih, tiah Mizoram palik nih an facebook page ah an tar.
Mizoram khualipi Aizawl, Zarkawt sang i khuasa mi nu pakhat sin in, Instagram ah a fapa min le hmanthlak hmang in account deu(fake) ser a si i, myanmar ralzam hna ca ah account deu nih cun bawmhhalnak a tuah kong palik a chimh hna i palik nih cun an dothlat colh.
Ṭha tein dothlatnak an tuah hnu ah S. Malsawmdawngzuala(kum 27), College veng, Siaha khuasa mi cu hi kongkau ah sualnak a tuahtu a si tiah an theih i, nawlngeitu hna May 12 ah khan Siaha khua ah an tlaih. Mizoram palik nih cun, internet ah min deu hmang in mi hlen cu Cyber Crime nganpi a si tiah an langhter.
Thailand-Myanmar Ramri Ah Hriamnam An Tlaih; Myanmar Mi Nu Pakhat Telh In Minung 3 Palik Nih An Tlai Hna-Thailand-Myanmar ramri a si mi Thailand ram Trok (တာခ့်)pengkomh May-la-mat hmunram inn pakhat cu tuanvo ngeitu hna nih check hlatnak an tuah i meithal le hriamnam he aa pehtlai mi thilri le Myanmar mi nu pakhat telh in minung 3 an tlaih hna tiah Thailand ram thawngzamh ca nih an langhter.
May 14 May-la-mat ramchung inn pakhat cu check hlatnak an tuah hnu ah motor pakhat chung ah thuh mi meithal le hriam nam a thong renglo cu palik nih an tlaih hna hi a si. “Hriamnam thilri he Myanmar mi nu 1 le Thailand ram mi minung 2 zong an tlaih chih hna. An tlaih mi hna chungah Pistol, M- 16 menthal le a thilri, M -15 meithal le a thilri pin ah hriamnam he aa pehtlai mi thilri a thong renglo an tlaih hna” tiah an langh ter chih.
An tlaih mi hna minung 3 cu taza cuai dingin palik zungah an chiah chung hna i hriamnam an lak nak zong hlathlai ding in Palik nih an i zuam lio a si. Aluan cia May 1 lio zongah Thailand-Myanmar ramri a si mi Mae Sot khua pawng ah Myanmar mi minung 2 cu cycle cungah hriamnam he Thailand palik nih an rak tlaih bal cang hna tiah kan theih.
SAC Ralhrang Nih Monywa Nightking Sakhan An Luhhnawh; PDF Uniform Le Hriamnam Cheukhat An Lak Piak Hna-Sagaing ramthen Monywa PDF Battalion 4 tang um, Monywa Nightking sakhan cu SAC ralhrang nih an luhhnawh hna caah PDF Uniform le hriamnam cheukhat an lak piak hna nak kong Monywa Nightking nih May 15 ah thanh ca an chuah.
“Kan mah PDF Uniform cu SAC ralhrang nih an lak caah kan mah thilthuam bantuk i hruk in hman an i thlak khawh caah tangti phu hna nih nan kan palh sualnak hnga lo rak i ralring te uh” tiah thanhca chuah mi ah an langh ter. Monywa Nightking sakhan cu SAC ralhrang nih May 13 zanlei sang ah an luh hnawh hna hi a si.
Ralhrang nih PDF thilri a si mi kut serchom meithal zun 21, RPG zun 8, Uniform zun 50, kutser mi Bomb 8, hriamngan bomb 235, thir ah nak, bomb fuel pin ah hriamnam ser nak thilri dang le riahcawh kan i chiah mi tiangin an kan lak piak tiah an langhter chih.
Pago Ramthen Hluttaw Palai Pakhat Kum 19 Thongthlak Hnu Ah Thihdan Pek Khawhnak Upadi In Taza An Cuai Than-Pago ramthen Pyay khua ah SAC cozah nih Upadi poh-mah 6 in kum 19 thong an thlak lio mi NLD Hluttaw palai Kyaw Zay Ya cu thih dan pek khawhnak upadi phun 2 in taza an cuai than tiah chungkhar neihniam pakhat nih a chim.
Amah cu SAC cozah nih lainawnnak, phungning lo thimnak kong, zuu zuar zamhnak kong le 505 (a) case phun 2 in kum 19 thong an thlak lio mi a si pin ah Lainawn nak upadi phun 2 in sual an puh than hi a si. “A ra lai mi May 19 ah biaceih zung ah an chuah pi lai ti kan theih caah sihni hlan a hauh caah a tu lio cu sihni hlan ding an har ngai, an duh hna lo.
Upadi phun 2 an chap piak mi hi kum 10 thong pin ah thih dan tiang pek khawh mi a si caah a si khawh chungin sihni kawl kan i tim” tiah chungkhar neihniam pakhat nih a chim. Amah cu SAC cozah nih 2022 June 9 ah an rak tlaih i Pyay khua thonginn ah 2022 December 19 ah kum 19 thong thlak dingin bia an rak ceih piak mi a si. Kyaw Zay Ya cu Pago ramthen Pyay peng ah ramthen Hluttaw palai hmunhma 2015 le 2020 ah voi hnih tiang teinak a hmu mi a rak si tiah kan theih.