Breaking News: Sagaing ramthen, Minkin Ah Mino Le Ralhrang Buu An Kah

Breaking News: Sagaing ramthen, Minkin Ah Mino Le Ralhrang Buu An Kah
====================
Sagaing ramthen, Monywa – Zaikyi – Kalaywah lam cungah Kanimyone le Minkin myone karlak khuate cheukhat ah April 17, 2021 ni suimilam 6:00pm hrawngah ralhrang buu le khuami pawl fak ngaiin kahdohnak an ngeih tiah thawng theih a si. Ralhrang buu lei in motor 3 an rak phan i, ralhrang bu lei hi a tlawmbik ralkap 60 hrawng an si lai, tiah khuami nih an chim. Khuami nih cu Lai meithal bak in an dirhonh ve hna i, an kah hna tiah tiah theih a si. Hi kong pehtlai in a thimi le hliamhma a putmi um le um lo thawng fiang tein theih a si rih lo, tiah Khit Thit Media nih a langhter.

Asianin, VOM media nih cun a tanglei bantuk in thawng fiangternak an tuah ve. Minkin peng Sithlinchawng i khuami pakhat nih a chimnak ah Palek le ralhrang ralkap nih kan khuami Ko Aung Bah cu meithal pahnih he an tlaih, a hnu ah Ko So Wiam inn an luhhnawh i an kawl meithal pakhat an lak, minung bel an tlai hna lo, mah ahcun Palek le ralkap nih lam cungin an kan kah” tiah a chim. Mah i kahnak he pehtlai in VOM nih tu zingah a langhter ning ah a thimi le hliamtuar mi cazin ah ralhrang lei in Duh-Ye Oh Tu Yeh Kyaw meithal kuan nih a hliam, Ye-Duh-Tat-Ciat Nan Thait Tu hliam a tuar, Ye-Tat-Ta So Luat hliam a tuar, Ye-Tat-Ta Mu Min Nai a lu ah kuan fang nih a khen i a thi.

Cun, mah i kahnak ah Tat-Ta Myo Ko Lun meithal nih a khen i a thi Tat-Ciat Aung Zaw Win hliam tuar. Mah i kahnak a cannak hmun i Kani peng Chawngmace khua Ko Aung Zaw Oo hliam a tuar hlei ah an tlaih, min theih lo mi ruak pakhat ralkap nih an i kal pi. Kani peng Lapuh khua nih an chimnak ah mah i kahnak ah khuami mimung panga nak tlawnlo an nunnak a liam pasarih hliam an tuar tiah VOM ah a chim.

Relchap, Chanthar Mizo le Chinmi. Chin tuanbia thiamsang hna (historians) nih Chin le Mizo cu “miphun pakhat” kan si i, Kachin le Chin cu “unau” kan si tihi an kan chimh lengmang. Chin, Mizo le Kachin cu “chungkhar khat le phunkhat kan si” kan van ti ko lai. Mizoram cu dornak, zamnak, himnak le chawlehnak ah Laimi nih kan hmanmi zong si. Chinmi le CNF/A zeimawzet zong Mizoram ah kan um rih.

Tlawmpal theihtlei in van kir duak usihlaw – Mizo le Chinmi cu ramri in kan i-dan bang, kan holh zong ai dang. Mizo nih Chinmi hi an rak kan tthawl caan zong a rak um tawn. Cun, Mizo nih “khuachakmi, pawi, burma ho” tiah an rak auh. Vai nih “nepali” tiah India um lio cun an rak kan auh ve. Miphun dang deuh nih “burmese or myanmarese” tiah an kan auh. Vai le Mizo nih an kan auhning cu “nehsawhnak deuh” khi a rak si. Chin (Lai) in a kan theimi le aumi an tam lo ti ko usih. Nain, tuni bal ah “Chin” in an van kan theih ngai cang.

Chanthar Mizo le Chin pehtlaihnak hi a thawknak langhter har ngai kho men, nain kum 2006 in ka van thawk lai. A Voi 4nk Chin Evangelical Conference, Oct. 3-9, 2006, Hakha rak tuahnak ah Liandingpuii hi hlasa in an rak sawm ve (sermontu an rak sawmmi cu ka van philh). Liandingpuii hi gospel hlasa a rak lar saling bak si. Hakha ahcun a hla kha Lai holh in a rak sak (ka theih tawk ah a hmasa bik Mizo Lai holh in hlasa si). Cun, Liandingpuii le Daduhi hi kum 2012 USA an rak kal i, Chinmi tampi an rak hmuh hna. CBC-USA nih “Mizo chior” zong an rak sawm hna. Cu hnuah, Vanlalsailova nih Lai hla zong a van sak ve. Mizo hlasak thiam le minthang a mak bikbik pathum thawngin Mizo nih Chinmi an kan hmuhning le ruahning cu an kan thlenpiak. A phichuak cu, kum 2021 ahcun Mizo hi Chinmi dirkamhtu le ttanhtu Federal India ah an van cang.

Van chap khawhmi cu “India ralkap nih Mizoram a rak kah lioah, Chinram ah Mizo a rak kaimi le eidin hal in an rak um len ve i, kan rak bawmh in dirpi ve hna” tihi tar nih an ka chim tawn. Chinmi nih Mizo hla kan leh i, Mizo zong nih Lai hla an leh ve cang. Tawinak cun kum zabu 21 hlan cu Mizo nih Chinmi hi – zei huaha ah an rak kan chia in ruat lem lo. Cu vialte tuanbia cu ai thleng cang. Mizo le Chin dawt le bawmhchanh hram ai thawk cuahmah. Kan hmailei kong cu tuanbia nih chim tthan te ko seh. Tuanbia le thilsining cu si thleng lengmangmi si tihi cinken ah a ttha.
Note: mah vialte pumpak dairy van si rih seh. Ka lung chuak ka van thai duak. Credit: Van Nun Lian