SAC Ralkap Southeast Region Uktu General Myat Thet Oo Cu Laos Ambassador Ah An Thim
=========
Mawlamyaing hrambunh Southeast region(nichuah thlanglei) SAC ralkap headquarter uktu ralbawi, General Myat Thet Oo cu a rian in an dinhter i, Lao People’s Democratic Republic(Laos) Ambassador ah SAC nih June 17 ah an thim, tiah theih a si.
2022 August ah nichuah thlanglei SAC ralkap headquarter uktu ah an rak thimmi General Myat Thet Oo cu 2023 March thla ah a rian an thlen i, Naypyidaw ah chekhlatnak an rak tuah, tiah theih a si. Cu hnu ah General Myat Thet Oo cu a rian in an dinhter i ramdang palai zung ah Laos-Myanmar Ambassador rian an pek.
SAC ralkap Regional Headquarter pakhat uktu rian cu dinhter in ramdang palai an ṭuanter mi hi dantatnak phunkhat a si, tiah CDM ralbawi cheukhat nih an chim. SAC ralkap sianghleirun DSA 38 in a dihmi General Myat Thet Oo cu SAC nih nawlngeihnak an laak hnu in Myigyina khuapi hrambunh chaklei headquarter uktu rian an rak pek i, 2022 August thla ah nichuah thlanglei SAC ralkap headquarter uktu ah an rak thlen.
Nichuah thlanglei headquarter uktu rian thla 7 chung a ṭuan i, 2023 March thla dongh ah a rian in an dinhter ṭhan. Hi kong he pehtkai in CDM ralkap hna nih cun, Karen ramkulh kahdohnak ah teinak a hmuh lo caah an dinhter a si lai, tiah an zumh.
Kalaymyo Bazar Ah Nu 20 Leng SAC Ralkap Nih An Tlaih Hna! Sagaing ramṭhen, Kalaymyo Nyaungpinthar sang ah pangpar aa tonhmi nu 20 leng cu SAC ralkap nih an tlaih hna, tiah mithmutu hna nih an chim.
Nihin June 19 cu Aung San Suh Kyi a chuahni a si caah rammi hna nih pangpar i tonh cio ding in dohthlennak lei cawlcangtu hna nih forhfialnak an tuah caah pangpar aa tonhmi nu 20 leng cu an tlaih hnanak a si, tiah tualchung mi hna nih an chim.
Nihin June 19 zinglei suimilam 8:00 tluk ah SAC ralkap pawl cu mi sawhsawh thuam i hruk in Myoma bazar ah a kal i thilzuartu le thlicawtu nu pawl cu an tlaih hna, tiah tualchung mi hna sinin theih a si. Tlaih a tongmi hna cu palik sakhan ah an kalpi hna, tiah theih a si.Nu 20 tlaih an ton lio ah Myoma bazar pawngkam vialte ah cun SAC ralkap an khat, tiah an chim. Crd;The Chin Post