Kachin Ram, Sihkamgyi Sakhan Thianhfelnak Ah SAC Ralkap Ruak 70 Leng Hmuh A Si. Kachin ramkulh, Mansi peng, Sihkamgyi khua SAC ralkap sakhan cu tualchung hriamtlai ṭangṭi phu nih an laak i hmunram thianhfelnak an tuah ah SAC ralkap ruak 70 leng an hmuh pinah ke hra ngei motor khat in hriamnam an laak, tiah theih a si.
SAC ralkap nih caan saupi chung umhmun an khuar cangnak Sihkamgyi Byuha sakhan cu KIA, KPDF, AA le LPDF ṭangṭi phu nih a luancia February 19 ni ah an laak i hmunram thianhfelnak an tuah ah SAC ralkap a thi mi ruak 70 leng an hmuh kong Shweko peng LPDF in ṭuanvo ngei pakhat nih Kachin News Group ah a chim.
Sihkamgyi Byuha sakhan laak ni February 19 ah sakhan chung ah SAC ralkap ruak 48 an hmuh i tualchung hriamtlai ṭangṭi phu nih hmunram an thianhfel hnu ah sakhan pawngkam le ramlak ah ruak an hmuh chap mi he ruak 70 leng an a si.
Sihkamgyi Byuha sakhan kahdohnak ah cun tualchung hriamtlai ṭangṭi phu nih hriamngan, hriamhme, bomb le kuanfang cu ke 10 ngei motor khat in an laak nain sakhan laak ni ah SAC ralkap nih vanlawng in hriamnam chiahnak innpi ah bomb an thlak caah hriamnam cheukhat cu an rawk.
Cu sakhan kahdohnak ah cun KIA le KPDF lei in minung 8 an nunnak a liam, AA ralkap Company Commander pakhat a nunnak a liam ve i an zate minung 9 nunnak a liam, midang 10 leng hliam an pu ve, tiah theih a si. The Chin Post