SAC Ralkap Nih Kalaymyo Chaklei Nansaungpu Khua An Khangh. Sagaing ramṭhen, Kalaymyo chaklei, Nansaungpu khua umnak inn hna cu SAC ralkap le Pyusawhti pawl nih March 13 zan thawk in an khangh, tiah theih a si.
“Kaphnih kar i kahdohnak a um lo nain SAC ralkap nih khuachung ah hriamngan an kah i, March 14 ah inn an khangh ṭhan, inn a kaang mi zat belte hngalh a si rih lo,” tiah tualchung hriamtlai phu chungtel pakhat nih a chim.
SAC ralkap le Pyusawhti 80 hrawng cu tualchung hriamtlai ṭangṭi phu nih an rak laak mi Kangyi khua le Kantharyar khua laak ṭhan ding in rallam an sial caah Nansaungpu khua le a kiangkap khua tualchung mi cu a himnak hmun kawl in ral an zaam hna, tiah theih a si.
A luancia March 10 ni ah cuka hrawng hmunram chung ah cun SAC ralkap le tualchung hriamtlai ṭangṭi phu an i kap i SAC ralkap pathum an thih pinh hriamnam tam ngai an laak kong No.1 ral hmunram um mi nih an thanh. The Chin Post
Relchap: Letpanchaung Ah SAC Hriamngan Kahnak In Tualchung Mi 2 Nunnak A Liam. Sagaing ramṭhen, Kalaymyo peng chaklei, Letpanchaung khuachung ah SAC ralhrang nih hriamngan an kah i tualchung mi 2 an nunnak a liam, tiah theih a si.
2024, March 14, zanlei suimilam 9:15 tluk ah Letpanchaung khuachung ah SAC ralhrang nih an sakhan in hriamngan an kah caah hriamngan khennak in Pi Zuali le Pu Ramdika hna cu hmakhatte ah an nunnak a liam i hliam a tuarmi zong an um, tiah theih a si.
SAC ralhrang nih hriamngan an kahmi ruang ah Letpanchaung khuami minung 7nak tlawm lo nunnak a liam cang i minung 15 tluk nih hliamhma an tuar cang, tiah khuami hna sin in theih asi.
Kalaymyo thlanglei le chaklei ah kahdohnak a faak i SAC ralhrang nih Kalaymyo khua le a kiangkap khua hna cu duhpaoh in hriamngan an kah caah khuami a thong leng nih ral an hrial, tiah theih a si. Lungmili Post