SAC Ralhrang Nih Kum Hnih Le Thlali Chung Ah Raltuknak Vanlawng Voi 1,420 Leng A Hman; Mipi 630 Leng An Thi
===========
SAC ralhrang nih uknak lak hnu kum hnih le thlali chung ah raltuknak vanlawng voi 1427 an hman i cuchung ah mipi minung 630 leng an thi tiah Nyan Lynn Thit Analytica nih May 22 ah an langh ter.
Raltuknak vanlawng voi 1,420 a hman mi hi uknak a lak hnu in 2023 April thla tiang ni 850 chung ah a cang mi a si. Raltuknak vanlawng a hman tambik nak hmun hi Karen ramkulh Maywaddy peng chungah a si i voi 164 , Demoso pengah voi 109 le Hpa-pon peng ah voi 57 an hman. A si nain Vanlawng bomb thlak hnawhnak in a thimi tambik cu Sagaing ramthen ah a si i mipi minung 188 an thi tiah a langh ter.
Kum hnih le thlali chungah SAC raltuknak vanlawng Bomb thlakhnawh nak in mipi a thi mi dih lak minung 634 an si. 2023 kum thla 4 chung lawngah raltuknak vanlawng voi 454 a hman i cuchung ah mipi minung 292 an thi.
Vanlawng a hman deuhnak hna hi Kachin, Kareni, Kaya, Chin, Sagaing, Magway le Shan ramkulh chung ah an si. A luan cia kum 2 nak in 2023 kum thlali chungah raltuknak vanlawng Bomb a hman mi a tam deuh tiah an langh ter chih.
Sadaung Khuapi Um Palik Sakhan An Kah Caah SAC Ralhrang Bawi Pakhat Telh In 12 An Thi; Sagaing ramṭhen, Sagaing peng, Sadaung khuapi um palik sakhan cu mipi ralkap PDF hna nih luhhnawh in an kahdoh caah SAC le palik ralhrang 12 an thi, tiah ZERO Intelligence Corps Battalion 7 in ṭuanvo ngeitu pakhat nih a chim.
May 12, zanlei sang ah mipi ralkap hna nih an luhhnawh hna i kaphnih kar kahdohnak fakngai a chuak caah suimilam 2:30 cheu tluk a rau. Ralhrang sakhan laak khawhnak ding ah caan tlawmpal lawng aa duh nain SAC nih jet vanlawng 2 in a hel lengmang hna caah mipi ralkap hnulei an tolh ṭhan, tiah theih a si.
“Zan suimilam 6:00 tluk in zan suimilam 8:00 tiang kan kah hi a si, ralhrang sakhan kam tiang kan phan cang an khamnak hna zong kan thlak khawh dih cang nain SAC ralhrang nih jet vanlawng 2 in a kan hel lengmang caah hnulei kan tolh hi a si. SAC ralhrang lei in 12 an thi pin ah hliam fakngai in a pumi zong an tam. Mah sakhan ummi hi thazaang 50 leng hrawng an si i a thimi lak ah ralhrang bawi pakhat zong aa tel tiin kan theih” tiah ZERO Intelligence Corps Battalion 7 in ṭuanvo ngeitu pakhat nih Khit Thit ah a chim.
Kahdohnak cu ZERO Intelligence Corps Battalion 7, Myinchain pengkomh le Red Dragon Kyaukse, Kyaukse pengkomh Battalion 4, Myinchain le Sadaung pengkomh ṭangṭi phufonh hna kan si, tiah an langhter chih.
Pyusawhti Pakhat Meithal He Mipi Ralkap Sin Ah Aa Fonh; Tangka Sing 100 An Pek Pinah A Chungkhar An Chanhchuah Hna; Sagaing ramthen, Yinmarbin peng ah SAC ralhrang he tangti a si mi Pyusaw-hti pakhat cu mipi ralkap sin ah meithal he aa fonh caah lawmman sing 100 tangka an pek pin ah a chungkhar hna zong an chanhchuah hna tiah (ULF ,Union Liberation Front)၊ Comrade Column(CC) sin in theih a si.
Pyusaw-hti ralhrang in a rak chuak mi kum 18 tluk a si mi Khaing Min Soe cu Pyusaw-hti ah thla 6 leng a um hnu ah chungkhar he an i pehtlai i a tubantuk in mipi ralkap sin ah aa fonh hi a si.
“A chungkhar hna cu khua leng ralzam nak ah an um hna, ka chungkhar he i ton ka duh tiin a upa kan chawnh hnu ah a karlak ah kan mah zong nih kan bawmh hna i an tong kho.
A dik mi a si ti a thei i kan mah sin ah fonh a duh rih mi zong lunglawm tein kan cohlan peng hna.” tiah ULF tuanvo ngeitu pakhat nih a chim. A mah cu May 20 zanlei suimilam 3:30 tluk ah meithal AK-47 zunkhat, kuanbawm 3 le kuan 90 he mipi ralkap sin ah a rak i put chih. A chungkhar minung 9 he a himnak hmun ah an kal ter hna tiah kan theih. Credite; Lungmili Post