Karenni Ramkulh Ah SAC Ralhrang Nih Jet Vanlawng In Bomb A Thlak, Kum 17 Nu Pakhat A Nunnak Liam
=========
Karenni ramkulh, Baw-la-khe peng, Sawlon khua cu SAC ralhrang nih tuzing ah jet vanlawng in bomb a thlak caah kum 17 nu pakhat a nunnak a liam khuami hna sii peknak inn telh in mipi inn 8 a rawk, tiah theih a si.
“May 17, zinglei suimilam 4:00 tluk ah SAC ralhrang nih jet vanlawng in bomb a thlak caah nu ngakchia pakhat a nunnak a liam i kum upa pa 4 nih hliamhma an tuar. Sii peknak inn (Building) 2 telh in mipi inn 8 a rawk. Cu pinah phungki sianginn zong tlawmpal a rawk i mipi hliamhma faak lo a tuarmi zong an um” tiah Bawlakhe PDF in ṭuanvo ngeitu pakhat nih a chim.
Bawlakhe pengkomh cung ah SAC ralhrang nih mipi hna umnak inn bomb a thlak hi a voi 3 naak a si cang i mipi hna nih cunglei kahdohnak kong ah ralrin a herhnak, tiah Bawlakhe PDF in ṭuanvo ngeitu pakhat nih Khit Thit ah a chim.
Tonzang Khuapi Nih Abik In An Hman Mi Tipeknak Tidong An Fir Piak Hna; Chin ramkulh Tonzang khuapi nih a bik in an hman mi le ti an lak nak tidong cu meizei ti theih lo mi nih an fir piak hna tiah kan theih. Hi ti laknak tidong cu 90mm HDPE phun Unicef nih bawmh in an tuah piak mi hna a si i May 16 zinglei ah ti a zuh an theih hi a si. Afir tu zong kawlhawl nak an tuah lio a si.
An fir mi tidong hi Tonzang khua pi nih a bik in an din ei mi a si caah khuami cu a tulio ah harnak an tong. Mah pumpak miakmai nak ruang ah mipi harnak pe mi hna cu zeitik hmanh ah khua awng an tong lai ti i theih hna seh tiah Tozang mipi nih ralrinnak an pek hna.
Monywa Khuapi GTC Sianginn Ah Umhmun Khuami SAC Ralhrang An Kah Hna, 3 An Thi; Sagaing ramṭhen, Monywa khuapi um GTC sianginn ah umhmun a khuarmi SAC ralhrang le Pyusawhti ralhrang luhhnawh in an kah hna caah ralhrang 3 an thi, tiah Monywa Fighter Group nih thawng an thanh.
May 15, zing suimilam 9:00 tluk ah GTC sianginn kulhchung ah umhmun a khuarmi SAC ralhrang le pyusawhti pawl cu a bu in an um lio ah mipi hriamtlai phu hna nih a thli thop in an luhhnawh hna hnu ah an kah hna i ralhrang 3 an thi, tiah theih a si.
Cu kahdohnak cu Monywa Fighter Group, Bo Tathaung People’s Defense Force. BTT PDF le Monywa PDF Intelligence Corps hna fonh in kan si. Mipi ralkap hliamhma tuarmi umlo in hnulei kan tolh ṭhan kho, tiah an langhter chih.
SAC Ralhrang 2 An Thlaihmi Hna Cung Ah Zeirel Lo In A Tuahto Tu KNDF Ralkap Dantat An Tong; Karenni ramchung kahdohnak ah SAC ralhrang a nungin tlaih mi hna cu dat leih in le zeirel lo in a tuahto tu KNDF ralkap cu dan kan tat cang tiah KNDF nih May 15 ah thanh ca an chuah. SAC ralhrang tlaih mi chungah minung pakhat cu KNDF ralkap pakhat nih dat leih nak seh pakhat in a leih ter nak Vedio file cu April 27 ni ah Social Media ah an tar langh.
“An leih ternak seh kha a tak a si lo, a thawngpang a awn mi sawh lawng a si, an ti hram nak hna sawhsawh a si. Si nain mipi hmuhnak ah a zohchia ngai mi a si pin ah nuhrin covo buar nak he aa pehtlai mi zong a si. Cu caah SAC ralhrang tlaih mi pakhat zong kha biatak tein a thin phang i a tih tuk nak a lang.
Mah ruang ah a tuahto tu KNDF ralkap cu ralkap upadi ning in dan kan tat hi a si. SAC ralhrang kan tlaih mi hna hi tha tein kan zohfel ko hna” tiah KNDF Information tlaitu pakhat nih a chim.
SAC ralhrang an tuahtonak Vedio file konghe pehtlai in ramchung ram leng um mipi hna nih lungnuam lo in nan um mi kongah KNDF nih ngaihthiam kan in hal hna tiah an langhter chih. credite ; Lungmili Post