Gangaw In A Rak Kaimi SAC Ralkap Hna Cu Sakta Khua Lei Panh In Hmai An Nor
=============
Chin ralkap hna nih fak ngai in a ṭhuat mi SAC ralkap hna cu Hakha peng Malsawm khua in Sakta khua lei panh in an cawlcang cuahmah, tiah theih a si. Hi kong he pehtlai in, “Tutan Gangaw lei a rak kai mi hna hi tat-ma 77 an si. Kan ram chung an phak bakin nifatin kan i kap i tam ngai cu kan fimhlawm khawh hna. Atu hi Malsawm khua in Sakta khua lei an panh,” tiah min langhter duh lo ralram um pakhat nih a chim.
Gangaw lei in a kaimi tatma 77 hna hi anmah lawng nih Hakha an phak khawh lo ca ah Hakha hrambunh 266 in minung 100 leng nih an don hna i Nipi khua pawngkam ah an um, tiah theih a si. CNA tat-ma-har 5 hmun i kahnak ahhin SAC nih nifatin in Jet Fighter an hman, tiah theih a si.
Falam-Hakha Lam Ah A Tlaumi 2 Cu Zarhkhat Leng A Rau Cang Nain An Hmu Rih Hna Lo; Chin ramkulh, Tedim khua Luaibual sang um Obed House ngakṭah sianginn ah rian a ṭuanmi Cin Hau Vung(kum 37) le Hakha sii-inn ah rian a ṭuanmi Lian Za Thawn(kum 32) cu a luancia May 2 ah Falam in Hakha lei ah motorcycle in an kal i, zanlei suimilam 6:00 in nihin May 12 tiang ah an pehtlai kho ti hna lo, tiah theih a si.
Pu Lian Za Thawn cu Hakha um a chungkhar hna he a donghnak an i pehtlaih lioah Chuncung khua an phanh deng tiang lawng theih a si. An chungkhar le chungkhat sahlawh rualchan hna nih an kawl len ko hna nain an thawngpang zeihmanh theih a si ti lo. An catlap le an hruk-aih thilri belte cu Thlanrawn khua thar pawng lam kam ah ṭhenṭhek dih cang in khualtlawngmi hna nih an char, tiah theih a si.
Jerome Lian Za Thawn le Cin Hau Vung hna cu an chungkhar nih an dirhmun thei ti loin le an thawngpang zong an theih khawh ti hna lo caah thinphang ngai in an ca ah i bawmhchanh cio ding in nawlnak an tuah, tiah theih a si.
SAC Ralkap Nih Nabutaw Khuami An Kah Hna I Tualchung mi 10 Hliamhma An Pu, 1 A Nunnak Liam; Sagaing ramṭhen, Yinmarbin peng Nabutaw khuami hna cu SAC ralkap nih an kah hna i tualchungmi 10 hliamhma an pu. Tualchung mi 1 cu SAC ralkap nih an thah, tiah tualchung mi hna nih an chim. May 11 zinglei suimilam 7:00 hrawng ah SAC ralkap cu Nabutaw khua ah an lut i a ruang um loin khuami cu an kah hna, tiah theih a si.
“SAC ralkap nih Nabutaw khua cu hriamngan voi tam ngai an kah. Khuami kan zam lio ah an kah kah i minung 10 nak tlawm lo meithal kuan nih a khen hna. Khuami pakhat Htey Naing cu an tlaih i an hrem hnu ah an thah. A ruak cu May 12 zinglei ah kan laak,” tiah khuami pakhat nih a chim.
Hriamngan kahnak in caw pathum an thi i, PDF he zong an i kah caah PDF lei in ralkap 2 an nunnak a liam pinah 1 hliamhma a pu, tiah an chim. SAC ralkap hna cu Nabutaw khua in May 11 zanlei suimilam 6:00 ah Banbuai khua lei an panh i cuka hmun ah cun an riak. May 12 ah Banbuai pengkomh khuate ah rallam an sial ṭhan i, tualchung mi hna zong ralphaw hman ding ah an tlaih hna, tiah theih a si. SAC ralkap pawl cu Kani peng Layshi khua lei i rallam an sial ṭhan caah tualchung mi a thong leng cu ralhrial in an zam, tiah theih a si.
Suimilam 6 Chung Ah Mocha Cyclone Thlichia A Zual Kho! Bangladesh nichuah thlanglei in aa semmi Cyclone Mocha thlichia cu suimilam 6 chung ah thazaang a ṭhawng ngai mi Cyclone thlichia ah a cang kho i, May 14 ah Bangladesh ram Cox’s Bazar le Rakhine ramkulh, Kyaukphyu kar Sittwe khuapi pawng tiang a phan kho, tiah khuacaan tuaktantu hna nih nihin May 12 zinglei ah an thanh.
Mocha thlichia cu suimilam pakhat ah meng 60-70 tiang a kal kho, tiah zumh a si. India khuacaan tuaktantu zung nih, Mochia thlichia cu nihin May 12 zinglei in a thazaang a ṭhawng chin khomi a si i, meng khat ah 135 tiang a hrang kho, tiah an ruahdamh. Mochia thlichia cu Rakhine ramkulh, Chin ramkulh, Ayeyarwaddy ramṭhen, Magway ramṭhen le Sagaing ramṭhen tiang a phan lai, tiah khuacaan tuaktantu Win Naing nih a chim. Credite; The Chin Post