Chaung U Lah-wa-kah Zung Hngak SAC Ralhrang 4 An Kahthah Hna; Meithal Zun 4 An Lak
==========
Sagaing ramthen Chaung-u khua Lah-wa-kah zung hngak SAC ralhrang hna cu PDF tangti phu nih an kah hna caah ralhrnag 4 an thi i meithal zun 4 zong an lak piak hna. June 4 zinglei suimilam 6 tluk ah Manywa-Mandalay lam pawng um Chaung-u Lah-wa-kah zung cu PDF phu komh hna nih ruah lo piin an kah hna caah ralhrang 4 an thih hi a si.
“Hi ka zawn zung pawng ah hin tuan deuh ah cun ralhrang 7 an um. Tuni ah cun 4 lawng an um cang, Minute 5 tluk lawng kan kah hna i an 4 ningin an thi, an meithal zong kan lak piak hna. Kan mah lei cu kan him” tiah Farmers Revolution Force -Monywa pengkomh PDF Battalion(in tuanvo ngeitu pakhat nih a chim.
Hi kahdohnak ah PDF lei nih meithal G-3 zun 4, kuan bawm 4 le kuan 49 an lak piak chih hna. Kahdohnak ruangah SAC ralhrang motor 3 in Chaung-u Lah-wa-kah zung pawng ah um hmun an khuar i mipi aa chok mi hna zong checkhlat nak an tuah hna tiah khua mi hna nih an chim.
KNU Brigade-5 Humhaknak Thla Khat Chung Kahdohnak Ah SAC, BGF Ralhrang Commander Hna Telh In 120 Leng An Thi; Karen National Union (KNU) Brigade-5 humhaknak hmun a luancia 2023, May thla (thla khat) chung lawng kahdohnak ah SAC ralhrang le an kuttang hriamtlai Border Guard Forces (BGF) Commander le Deputy Commander hna telh in 122 an thi, tiah KNU nih cathanh an chuah.
May 1 in 31 tiang ah KNU Brigade-5 humhaknak Mutraw pengkomh hmunram chung ah SAC ral hrang, an kuttang hriamtlai BGF ralhrang pawl le KNU Brigade -5 karlak ah kahdohnak a chuak, tiah theih a si.
Hi thlakhat chung ah kahdohnak voi 200 tiang a chuak i SAC le BGF ralhrang pawl 122 an thi pin ah hliam a pumi 48 hrawng an si. Mah a thimi ralhrang chung ah Commander le Deputy Commander 7 an i tel, tiah theih a si.
Cu pinah SAC ralhrang hriamthil le ei-din a chantu motor 6 kan hrawh khawh chih pin ah rang, khacer 6 zong kan thahpiak hna. Tualchung hriamtlai in minung 2 nih ram le miphun caah an nunnak a pek i, 10 nih hliamhma an tuar, tiah cathanh an chuahmi ah an langhter.
Hi thlakhat chung ah SAC le BGF ralhrang fonh nih mipi hna umnak hmun le rian an ṭuannak hmun cu tinh chih te in hriamngan kuan lung 59 in an kah hna caah mipi 1 a nunnak liam i 2 nih hliamhma an tuar, tiah theih a si.
SAC ralhrang nih mipi tangka (Thailand tangka in) sing 280,000 le (Myanmar tangka) sing 100,000, phone 3, icom 1, vainam 3 hna zong an firpiak hna, tiah Karen National Union (KNU) nih cathanh an chuahmi ah an langhter chih.Lungmili Post