SAC Jet Fighter Nih Timit Ah Voi 10 Leng Bomb A Thlak!
============
Chin ramkulh, Hakha peng Timit hmun ah SAC Jet Fighter nih nihin May 27 ah voi 10 leng bomb a thlak, tiah theih a si. “Zanlei suimilam 1:10 tluk ah SAC Jet Fighter nih bomb thlak hram a thawk i voi 10 leng a thlak,” tiah ralhmun a ummi pakhat nih The Chin Post ah a chim.
SAC Ralkap Nih Kawlin Ah Mipi Vengtu Ralkap Telh In Pa Panga An Thah Hna; Sagaing ramṭhen, Kawlin peng ah SAC ralkap nih Mipi vengtu(pah kah phah) ralkap pakhat telh in pa panga cu May 23 ah an thah hna, tiah theih a si.
Thah a tongmi hna cu mipi vengtu ralkap Nay San Aung(kum 22), Kyaukkar khuami sii saya Thein Aye(kum 44), Min Hlaing, Kyaw Min Thein le Phu Wa hna an si, tiah Kawlin PDF in ralkap pakhat nih a chim.
Mipi vengtu ralkap pa hi Loimauk khua pawng kahdohnak ah SAC ralkap nih an tlaih i an thah. Sii sayapa hi Loimauk khua pawng ah an thah i, ek khor ah an thlak. Pa 2 hi an khua ah an thah hna i pakhat hi Caw a cawnghnak ah an thah, tiah PDF pa nih cun a chim.
SAC ralkap pawl cu May 21 in rallam an sial i, May 23 ah Loimauk khua ah an lut. Khuami inn an hrawhpiak hna hnu ah PDF he kahdohnak a chuak. Loimauk khua ah zan khat an riak i, PDF hna cycle 10 zong an khanghpiak hna, tiah theih a si. Cu pinah Kutaungbu, caan karlak SAC ralkap sakhan in a chuakmi ralkap 70 leng zong May 22 in rallam an sial i, Yartaung le Maungkaw khuami inn zong an hrawhpiak hna, tiah theih a si.
Thailand Ram Ah Phungning Loin A Lutmi Myanmar mi 49 Tlaih An Si; thailand ramchung Myanmar ramri Kanchanaburi pengkomh ah phungning loin a lutmi Myanmar mi 49 cu May 24 zinglei ah Thailand nawlngeitu hna nih an tlaih hna, tiah Bangkok Post nih a langhter. Kanchanaburi pengkomh ramlak ah aa thupmi Myanmar mi hna thawngpang cu palik sinah thawngpang petu an um ruangah palik nih an va tlaih hna, tiah theih a si.
Tlaih a tongmi hna chung in pa 29 le nu 20 an si i, an dihlak in phungning loin Thailand ram ah a lutmi an si. Yangon, Mawlamyaing, Bago le Rakhine ram in an si hna, tiah an chim.
Tlaih a tongmi hna cu Thailand ram ah rianṭuan ding in a kalmi an si i, Thailand luh khawh nakding hin minung pakhat ah Baht 20,000 in 30,000 kar agent sinah an pek, tiah theih a si.
Myanmar rammi hna cu Thailand nawlngeitu hna nih upadi ningin bia an ceih hna lai i Myanmar ram ah kuat ṭhan an si lai. May thla chung ah phungning loin Thailand ram chung ah a lutmi Myanmar rammi 350 tluk an si cang.
Banmauk Peng Kahdohnak Ah SAC ralbawi 1 Telh In Ralkap 20 An Thi; Sagaing ramṭhen, Banmauk peng Kyawnglay khua pawng kahdohnak ah SAC ralbawi 1 telh in ralkap 20 an thi, tiah Banmauk Revolution – BR in ṭuanvo ngeitu pakhat nih a chim.
Banmauk peng Kyawnglay khua ah umhmun a khuarmi SAC ralkap cu May 24 ah Banmauk Revolution – BR nih an va kah hna i SAC lei nih vanlawng in kah an bawmh hna, tiah theih a si. Cu kahdohnak ah cun ralbawi 1 a thi i, a ruak la ding in a kalmi SAC ralkap pawl cu an kah ṭhan hna i 20 an thi. Kyawnglay khua zong an laak khawh i, vanlawng nih atu le tu kah a bawmh hna, tiah theih a si.
Kyawnglay khua pawng ah ni 6 chung hrawng kahdohnak a chuak i SAC ralkap a thimi an tam. Indaw peng in bawmtu ralkap an kalmi hna zong ABSDF le PDF nih nihin May 25 tiang an kah hna, tiah theih a si. Credite; The Chin Post