Kenya Ram Ah Rawl Ulh Thlacamnak In Minung 300 Leng Nunnak Liam!
=========
Kenya ram ah rawl ulh thlacamnak in a luancia ni hnih ni tiang ah khan minung 300 leng an thi. Nunnak liam mi hna hi Good News International Khrihfabu chungtel an si hna i, an ruak hi ramlak tuhmawng ah hmuh an si.
Rawl ulh thlacamnak ah an hruaitu pastor Paul Mackenzie nih a cawnpiak hna ning ah, “Nunnak pek in rawl ulh thlacamnak nan ngeih ahcun vawlei dongh hlan ah vanram nan phan lai,” ti a si. Kum upa hna lawng si loin an fale zong rawl ulh thlacamnak ah cun an telter hna, tiah theih a si.
Kenya ram nichuah thlanglei Shakahola tuhmawng chung ah a bu in a thi mi ruak phumnak hmun hmuh a si i, cu hmun cu an hlai tikah ruak 19 an hmuh ṭhan. Nunnak liam mi dihlak hi 303 an si cang. Cu pin ah minung 600 leng an tlau rih, tiah ṭuanvo ngeitu nih an chim.
Minung zeimawzat cu bawmhchanh an si i ‘rescue centre’ ah chiah an si. Cuka hmun a ummi chung in minung 65 cu June 6 in 10 tiang ah khan rawl ei an duh lo, tiah tualchung media nih an langhter. Rawl ei a duh lo mi hna cu mah le mah nun laak timhnak case in tazacuai an si. A luancia April thla ah khan pastor Paul Mackenzie cu palik sinah amah le mah aa ap, tiah The Guardian nih a ṭial.
Uknak Laak Hnu In SAC Ralkap Nih Chinram Ah Inn 1637 An Khangh Cang, Myanmar Ram Pum Ah Inn 70,000 Leng! Uknak latu SAC ralkap nih Chinram ah Inn 1637 an khangh cang. Myanmar ram pumpi ah mipi umnak inn an khangh mi chu a luancia May 31 tiang ah inn 70,000 leng a si cang, tiah Data for Myanmar nih an thanh.
Data for Myanmar nih February 28 i an thanh ning ah ram pumpi huap in SAC ralkap nih an khangh mi inn hi 60,456 a si i, March thla in May thla tiang ah inn 9,865 an khangh chap, tiah an langhter.
Uknak laak hnu in SAC ralkap nih an khangh mi dihlak hi inn 70,324 a si i, inn kaang mi lak ah hin mipi umnak, siizung, sianginn le biaknak he aa pehtlai mi inn an i tel. Cu chung ah Sagaing ramṭhen cu innkaang a tamnak bik a si, tiah an langhter chih.
Sagaing ramṭhen chung lawng ah hin inn 53,816 a kaang. A pahnihnak Magway ramṭhen ah inn 10,541 an khangh. Chinram chung zong ah uknak lak hnu in inn 1,637 an khangh cang, tiah data for Myanmar cazin ning in theih a si.
Cu pin ah Chinram telh in, Mandalay ramṭhen, Taningtharyi ramṭhen, Bago ramṭhen, Kaya ramkulh, Shan ramkulh le Karen ramkulh chung ah inn 4,000 leng an khang, tiah an thanhmi ah cun an langhter chih. Crd; The Chin Post