India Ram Nilinhnak In 100 Tluk Nunnak Liam Cang Ca Ah Kum 60 Cung Leng Chuak Lo Ding In Ralrin An Pek Hna
=========
India ram ṭhen pahnih chung ah nilinhnak in ni zeimawzah chung ah minung 96 naak tlawm lo an nunnak a liam ti ah theih asi. Mi thi an tamnakbik hmun Prayagraj ramṭhen le Bihar ramṭhen ah hin cozah nih kum 60 cung upa hna leng chuak lo ding in ralrin an pek hna.
Prayagraj ramṭhen in nunnak liam mi minung 54 tluk an si cang. Nunnak liam mi tam deuh hna cu kum 60 cung u pa deuh hna hi an si ti ah ngandamnak lei zohkhenh tu phu nih an chim. Biliya si-inn lei nih thawngthanhnak an tuah ning cun, khualum tuknak in zawtnak phun phun a chuak i si-inn pi ah minung 300 tluk zohkhenh an si ti ah an langhter.
Manipur Imphal khuapi ah Venhimnak rianṭuan tu le mipi an i nam ṭhan ca ah tualchung mipi pahnih hliam an tuar. BJP hruaitu inn zong khangh an timh ti ah ṭuanvo ngeitu hna nih an chim. Imphal pin ah Kwakta, Bishnupur peng le Kangvai, Churachandpur peng ah kahdohnak a chuak ṭhan fawn.
Imphal nitlak-chaklei Iringbam palik station in ralthuam zong fir an timh a sinain zeihmenh an la menh lo. Army, Assam hriamtlai phu le Manipur Rapid Action Force hna nih khuapi chung buainak chuak ding veng in zankhuadei joint march an ngei tiah theih asi. Mipi a fun mi hi 1,000 tluk an si i palace compound kam ah inn khangh an timh tiah kan theih.
Sinjemai ah zantlai hnu ah BJP pisa thah ding in an kulh asinain, ralkap nih an ṭhawl khawh hna. Imphal zong ah BJP women’s wing president Sharda Devi inn cu luhhnawh an timh chih asinain, hriamtlai tu phu nih an ṭhawlkhawh ṭhan hna. Union Ministee RK Rangjan Singh umnak inn zong kan hnu cacawn ningani khan luhhnawh in khanghpiak a si